گه‌ڕان

Shadow Shadow
سیاسه‌تی

هۆکاری کێشەکان چین؟

ڕاگەیەنراوێک لە وەزارەتی شارەوانییەوە دەربارەی گرفتی کۆمپانیاکانی پاککەرەوە

2021.03.09 - 16:32
App store icon Play store icon Play store icon
ڕاگەیەنراوێک لە وەزارەتی شارەوانییەوە دەربارەی گرفتی کۆمپانیاکانی پاککەرەوە

ناس کورد-

وەزارەتی شارەوانی و گەشتوگوزار چارەسەرکردنی گرفتی کۆمپانیاکانی پاککردنەوەی شاری سلێمانی ڕاگەیاند و هۆکاری کێشەکانیش ئاشکرادەکات، دەشڵێت، حكومەتی هەرێمی كوردستان لەسەر بەڵێنەكانی خۆی بە بەردەوامیی خزمەتگوزارییەكان و بەرزكردنەوەی كوالیتی ئەو خزمەتگوزارییانە.

کەناڵی ناس کورد لە تێلیگرام جۆین بکە   

 

 

لە ڕاگەیەنراوێکدا وەزارەتی شارەوانی و گەشتوگوزار (سێشەممە 9ی ئاداری 2021) ڕایگەیاند، "گرفتی كۆمپانیاكانی پاككردنەوەی شاری سلێمانی چارەسەر بووە."

 

ئاماژەی بەوەشکردووە، "پرۆسەی تەندەرینگی كۆمپانیاكانی كۆكردنەوەی خاشاك، بەپێی ڕێنمایی گرێبەستە گشتییەكان ژمارە (2)ی ساڵی 2016ی وەزارەتی پلاندانان ئامادە كراوە و لەلایەن هۆبەی یاسا و كارگێڕی و دارایی و مەرجەكان دیاری كراون و هەموو ئەو كۆمپانیایانەی كە بەشدار بوون، لەسەر ئەو مەرجانە ڕازی بوون و بۆ بەدەستهێنانی ئەو تەندەرانە كێبڕكێیان كردووە."

 

ئەوەشی خستووەتەڕوو، "دوای دەرچوونی تەندەر بۆ كۆمپانیا، بۆ ئەوەی گرێبەست واژوو بكرێت، پێویستە لەسەر كۆمپانیاكان كە تەواوی بەڵگە و دۆكۆمێنتەكانیان ئامادە بكەن، گرفتی بەشێك لە كۆمپانیاكان لەوەدایە، هەندێك لە مەرجەكانیان تێدا نییە و تەندەریان پێشكەش كردووە، لە كاتێكدا هەموویان بینیویانە كە بەشێكی بڕگەكان پەیوەندییان بە ئامێرەكانەوە هەیە و لە ڕێنمایی گرێبەستە گشتییەكان ژمارە (2)ی ساڵی 2016ی وەزارەتی پلانداناندا هاتووە و هەمووشیان ئاگاداری ئەو بەندانەن و دەبوو خۆیان زوو دەستەبەری بانكی (خطاب ضمان)يان پێشكەشی وەزارەتی شارەوانی و گەشتوگوزاریان بكردایە."

 

وەزارەتی شارەوانی ڕاشیگەیاندووە، "هەموو كۆمپانیاكان دڵنیا دەكەینەوە كە بودجەیان بۆ دابین كراوە و شایستە داراییەكانیان وەردەگرن، بەو مەرجەی تەواوی ڕێنماییەكانی گرێبەستە گشتییەكان جێبەجێ كرابن، هەندێك لەو كۆمپانیایانە كە مەرجەكانی ئالیاتیان تێدا نییە و وەك خۆی جێبەجێیان نەكردووە، داوا لە هەموو كۆمپانیاكان دەكەین، كاتێك تەندەر پێشكەش دەكەن، دەبێت ئامادەییان تێدا بێت، هەموو بەندەكانی گرێبەست جێبەجێ بكەن."

 

لە ڕاگەیەنراوەکەدا ئەوەش هاتووە، "حكومەتی هەرێمی كوردستان لەسەر بەڵێنەكانی خۆی بە بەردەوامیی خزمەتگوزارییەكان و بەرزكردنەوەی كوالیتی ئەو خزمەتگوزارییانە سوورە، هەر لەو پێناوەدا مەرجەكان بەرز دەكاتەوە، تاوەكو زیاتر ڕەزامەندیی هاووڵاتییان بەدەست بهێنێت و هەر گرفتێک بێتە پێشەوە، هەموو هەوڵێک دەدات بە زووترین کات چارەی بکات."