گه‌ڕان

Shadow Shadow
سیاسه‌تی

ڕوونکردنەوەى پۆلیسی سلێمانی لەبارەی هێرشکردنەسەر غالب محەمەد: خۆی دەیناسێتەوە

2021.02.27 - 10:09
App store icon Play store icon Play store icon
ڕوونکردنەوەى پۆلیسی سلێمانی لەبارەی هێرشکردنەسەر غالب محەمەد: خۆی دەیناسێتەوە

ناس کورد-
پۆلیسی سلێمانی ڕایگەیاند، لەسەر هێرشکردنە سەر پەرلەمانتار غالب محەمەد تاوەکو ئێستا هیچ کەسێک دەستگیرنەکراوە و ئەو پەرلەمانتارەش وتویەتی "ئەو کەسە دەناسێتەوە کە هێرشی کردووەتەسەری".

 

کەناڵی ناس کورد لە تێلیگرام جۆین بکە   

 

سەرکەوت ئەحمەد، وتەبێژی پۆلیسی سلێمانی لە لێدوانێکدا بۆ "ناس کورد" لەسەر هێرشەکەى شەوی ڕابردووی سەر غالب محەمەد، ئەندامی هاوپەیمانیەتی هیوا لە پەرلەمانی عێراق (27ی شوباتی 2021) ڕایگەیاند، "کامێرای ئەو شوێنانە هەڵگیراوەتەوە و لێکۆڵینەوە دەکرێت بەڵام نازانین سکاڵای تۆمار کردبێت یاخود نا."

 


باسی لەوەشکرد، تاوەکو ئێستا هیچ کەسێک لەسەر ئەوپرسە دەستگیر نەکراوە، ئەو پەرلەمانتارە سکاڵای لەسەر کەسێکی دیاریکراو نییە  بەڵام وتویەتی ئەوکەسە دەناسێتەوە هێرشی کردووەتەسەری."


وتەبێژەکەی پۆلیسی سلێمانی ئاشکراشی کرد، "تاوەکو ئێستا نازانین هۆکاری هێرشەکە بۆ سەر ئەو پەرلەمانتارە چی بووە، ئایا کێشەی سیاسییە یان کۆمەڵایەتییە یاخود چ کێشەیەکی دیکەیە."

 

ئێوارەی دوێنێ هەینی (26ی شوباتی 2021) لە شاری سلێمانی هێرشکرایەسەر، غالب محەمەد، پەرلەمانتاری فراکسیۆنی گۆڕان لە بەغدا و بریندارکرا و بە پەلە گەیەنرایە نەخۆشخانەی شار.

 

لە یەکەم هەڵوێستدا، قوباد تاڵەبانی، جێگری سەرۆکی حکومەتی هەرێمی کوردستان لە تویتێکدا ڕایگەیاند، "ئیدانەی هێرشکردنە سەر پەلەمانتار غالب محەمەد دەکەم و سەرجەم دەزگا ئەمنییەکان ڕاسپێردراون لێکۆڵینەوەی ورد لە ڕووداوەکە بکەن و هێرشبەران ڕووبەڕووی یاسا بکەنەوە".



ئاماژەی بەوەشکردووە، "لەپەیوەندییەکی تەلەفونیدا هەواڵی کاک غالبم پرسی و دڵنیام کردنەوە ئەم کارە ترسنۆکانە لە هیچ کەسێک قبوڵ ناکرێت."

 

غالب محەمەد، ئەندامی پەرلەمانی عێراق لەدوای هێرشکردنەسەری و دواتر جێهێشتنی نەخۆشخانە، لە ماڵی خۆی لە کۆنفرانسێکی ڕۆژنامەوانیدا ڕایگەیاند، "ماوەیەکی زۆرە هەڕەشەم لێدەکرێت، تا ئێوارەی ئەمڕۆ لە بەردەم ماڵەکەی خۆم لەلایەن کەسێکەوە بە چەقۆ هێرشکرایەسەرم".



وتیشی، "بەهیچ دەستبەردارى هەڵوێستەکانم نابم ئەگەر سەرم لە پێناویدا دانابێت بەردەوام دەبم و هیچ کەس بیر لەوە نەکاتەوە من واز لە بەرەی خەڵک بهێنم".


چەختیشیکردەوە، "داواکارم لەلایەنە ئەمنییەکان بەپەلە ئەو کەسانە دەستگیر بکەن، چونکە دەبێتە هۆی ئەوەی پەلاماری خەڵکی دیکەش بدرێت، بۆیە داواکارم دادگا بە دادپەروەری لێکۆڵینەوە لەم کەیسە بکات".



غالب محەمەد، لە کۆتایی قسەکانیدا جەختیکردەوە، "بەخوا ئەگەر سەرم دانابێت واز لە هەڵوێستەکانم ناهێنم."