گه‌ڕان

Shadow Shadow
سیاسه‌تی

زانیارى زیاتر

پەیمانگای واشنتۆن ئەنجامدەرانی هێرشەكەی هەولێر ئاشكرا دەكات

2021.02.26 - 13:17
App store icon Play store icon Play store icon
پەیمانگای واشنتۆن ئەنجامدەرانی هێرشەكەی هەولێر ئاشكرا دەكات

ناس کورد-

سێ توێژەری پەیمانگای واشنتۆن بۆ توێژینەوە لە سیاسەتەكانی رۆژهەڵاتی نزیك جەخت لەوە دەكەنەوە بەڵگەكان دەریدەخەن كە بزوتنەوەی عەسایبی قەیس خەزعەلی لەپش هێرشە موشەكییەكانی سەر شاری هەولێرەوە بووە.

 

کەناڵی ناس کورد لە تێلیگرام جۆین بکە   

 

تویژەرەكان كە كریسبین سمیث و مایكل نایتس و حەمدی مالكن، لە پەیپەرێكدا بەناونیشانی "Attributing the Erbil Attack: The Role of Open-Source Monitoring_ بەرپرسیارێتی لە هێرشەكەی هەولێر: ڕۆڵی مۆنتیتەرینگی كراوە" كە لە پەیمانگای واشنتۆن بڵاویانكردووەتەوە و "ناس كورد" بەدواداچوونی بۆ كردووە (26 شوباتی 2021) جەخت لەوە دەكەنەوە بەڵگە كراوەكان ئەوە دەردەخەن كە "بزوتنەوەی عەسایبی ئەهلی حەق هێرشەكەی سەر هەولێری ئەنجام دابێت و ئەگەری ئەوەش هەیە كۆمەكی لە رێكخراو و گروپیتر وەرگرتبێت".

 

توێژەرەكان جەخت لەوە دەكەنەوە پێویستە ئەمەریكییەكان هەوڵی زۆر بدەن بۆ پەیوەستكردنەوەی رێكخراوە وەهمییەكانی سەر تۆڕەكانی ئینتەرنێت بە گروپە ناسراوەكانەوە لەچەشنی حیزبولڵا و عەسایب و نوجەبا و كەتائیبی سەیدولشوهەدا لەرێگەی بەڵگە بەردەستەكانەوە بۆ ئەوەی خۆیان نەدزنەوە لە بەرپرسیارێتی.

 

شەوى (15ى شوباتى 2021)  14 موشەک ئاڕاستەى هەولێر کرا و بەهۆیەوە بەڵێندەرێکى هاوپەیمانان کوژرا و نۆ کەسى دیکەش برینداربوون کە بەشێکیان ئەمریکین.     

 

لەگەڵ ئەوەى تا ئێستا هێزە ئەمنییەکانى هەرێم بەفەرمى هیچ گروپێکیان بەئەنجامدانى هێرشەکە تۆمەتبار نەکردووە، بەڵام لەدواى ئەنجامدانى هێرشەکە گروپی "سرایا أولیاء الدم" كە تاقمێكی چەكدارە و خۆی بەخاوەنی خوێنی سولەیمانی و ئەبومەهدی موهەندیس دەزانێت، بەرپرسیارێتی خۆی لە هێرشە موشەكییەكە ڕاگەیاند.      

 

ئەمە دووەم هێرشى موشەکییە بۆ سەر هەولێر لەماوەى کەمتر لە شەش مانگدا.       

 

هێرشەکەى پێشوو لە 30 ئەیلولى 2020دا بوو کە سێ موشەک لە نزیک بارەگای دیموکرات لە گردەچاڵی هەولێر و سێ موشەکیش لە نزیک هێزی هاوپەیمانان لە فڕۆکەخانەی نێودەوڵەتیی هەولێر کەوتنەخوارەوە و هەرێم حەشدى شەعبى بە ئەنجامدانى تۆمەتبارکرد.

 

وەزارەتى بەرگرى ئەمەریکا (پەنتاگۆن) راگەیەندراوێکى لەبارەى هێرشێکى ئاسمانى ئەو وڵاتە بۆ سەر چەند پێگەیەکى چەکدارانى نزیک لە ئێران لەسنورى سوریا بڵاوکردەوە و رایگەیاند "هێرشە ئاسمانییەکە وەڵامدانەوەیەکە بۆ ئەو هێرشە موشەکییەى کە کرایە سەر بنکەى هاوپەیمانان لە شارى هەولێر".

 

بەگوێرەى راگەیەندراوێکى پەنتاگۆن (26ى شوباتى 2021)  لەهێرشە ئاسمانییەکەى سوپاى ئەمەریکادا چەندین پێگەى چەکدارانى کەتائیبى حیزبوڵا و کەتائیبى سەیدولشوهەدا لە رۆژهەڵاتى وڵاتى سوریا کردۆتە ئامانج و ئەو گروپانەشى بە گروپى چەکدارى نزیک لە ئێران ناوبردووە.

 

هاوکات ئاماژە بەوە کراوە کە هێرشە ئاسمانییەکە بە فەرمانى راستەوخۆى جۆ بایدن، سەرۆکى ئەمەریکا ئەنجامدراوە.

 

هەروەها بەگوێرەى هەواڵێکى نیویۆرک تایمز لە هێرشەکەدا حەوت بۆمبى 226 کیلۆگرامى بەکارهێنراوون.

 

رامى عەبدولڕەحمان، بەڕێوەبەرى ڕوانگەى سورى بۆ مافەکانى مرۆڤ (26ى شوباتى 2021) لە لێدوانێکى بۆ ئاژانسى هەواڵى فرانس پرێس کە "ناس کورد" بەدواداچوونى بۆ کردووە ئاماژەى بەوە کرد "هێرشە ئاسمانییەکەى ئەمەریکا کە ڕێرەوێکى نایاسایى لە باشورى ئەلبوکەمال کردبووە ئامانج بووە هۆى لەناوبردنى سێ بارهەڵگر کە لەعێراقەوە هاتبووە ناو سوریا". 

 

  ڕونیشیکردەوە، لەهێرشەکەدا ژمارەیەکى زۆر لە چەکدار کوژراوون بەڵام زانیارییە سەرەتاییەکان ئاماژە بە کوژرانى 17 چەکدارى گروپەکانى سەر بە حەشدى شەعبى دەدەن.  

 

وەزیرى بەرگرى ئەمەریکا لەبارەى هێرشە ئاسمانییەکەى ئەمەریکا لە سوریا رایگەیاند "دڵنیاین ئەو ئامانجەى هێرشە ئاسمانییەکە پێکاویەتى سەر بەهەمان ئەو گروپە چەکدارانەن کە بەرپرسن لە هێرشە موشەکییەکەى هەولێر".

 

لوید ئۆستن، وەزیرى بەرگرى ئەمەریکا (26ى شوباتى 2021) رونیکردەوە کە ئەو داواى لە جۆ بایدن، سەرۆکى ئەمەریکا کردووە ئەو ئۆپراسیۆنە ئەنجام بدەن.

 

وتیشى"پێشتریش وتبومان کە لە کات و ساتى گونجاودا وەڵامى هێرشەکان دەدەینەوە".

 

مایکڵ ماکۆڵ، سەرۆکی لیژنەکە کە هاوکات نوێنەری کۆمارییەکانە لە گۆنگرێسی ئەمەریکا (26ی شوباتی 2021) لە ڕاگەیەندراوێکدا کە وێنەیەکی دەست" ناس کورد" کەوتووە  ڕایگەیاند "داوام لە ئیدارەکەی سەرۆک بایدن کردووە وەڵامی هێرشەکانی ئەم دواییانە بداتەوە کەکراوەتە سەر بەرژەوندییەکانی  ئەمەریکا و هاوپەیمانان، هەروەها ستایشی دەکەم کە بە تەواوی ئەو کارەی کردووە".   

 

ماکۆڵ ئەوەشی وتووە "وەڵامەکانی لەم شێوەیە، پەیامی هەڕەشە و وەبیرهێنانەوەیە بۆ ئێران و بەکرێگیراوەکانی لە سەرتاسەری جیهاندا کە هێرشکردنە سەر بەرژەوەندییەکانی ئەمەریکا قبوڵ ناکرێت، سوپاسی سەرۆک و کارمەندانی خزمەتگوزاریمان دەکەم بۆ پاراستنی ئەمەریکییەکان لە دەرەوە".