گه‌ڕان

Shadow Shadow
سیاسه‌تی

وردەکاریى

تەلەفزیۆنى سوریا وردەکاریى هێرشە ئاسمانییەکەى ئەمەریکا بڵاوکردەوە

2021.02.26 - 09:57
App store icon Play store icon Play store icon
تەلەفزیۆنى سوریا وردەکاریى هێرشە ئاسمانییەکەى ئەمەریکا بڵاوکردەوە

ناس کورد-

تەلەفزیۆنى فەرمى سوریا وردەکاریى ئەو هێرشە ئاسمانییەى ئەمەریکاى بڵاوکردەوە کە بەرەبەیانى ئەمڕۆ (هەینى) کرایە سەر چەند ناوچەیەکى ئەو وڵاتە.

 

کەناڵی ناس کورد لە تێلیگرام جۆین بکە   

 

بەگوێرەى هەواڵێکى تەلەفزیۆنى فەرمى سوریا، هێرشە ئاسمانییەکەى ئەمەریکا چەند ناوچەیەکى ڕۆژهەڵاتى ئەو وڵاتە لەسەر سنورى عێراقى کردووە بە ئامانج.

 

هەواڵەکەى تەلەفزیۆنى ئەو وڵاتە لە کاتێکدایە کە هێشتا هیچ لێدوانێکى فەرمى حکومەتى سوریا لەبارەى هێرشەکەوە بڵاونەکراوەتەوە.

 

وەزارەتى بەرگرى ئەمەریکا (پەنتاگۆن) راگەیەندراوێکى لەبارەى هێرشێکى ئاسمانى ئەو وڵاتە بۆ سەر چەند پێگەیەکى چەکدارانى نزیک لە ئێران لەسنورى سوریا بڵاوکردەوە و رایگەیاند "هێرشە ئاسمانییەکە وەڵامدانەوەیەکە بۆ ئەو هێرشە موشەکییەى کە کرایە سەر بنکەى هاوپەیمانان لە شارى هەولێر".

 

بەگوێرەى راگەیەندراوێکى پەنتاگۆن (26ى شوباتى 2021)  لەهێرشە ئاسمانییەکەى سوپاى ئەمەریکادا چەندین پێگەى چەکدارانى کەتائیبى حیزبوڵا و کەتائیبى سەیدولشوهەدا لە رۆژهەڵاتى وڵاتى سوریا کردۆتە ئامانج و ئەو گروپانەشى بە گروپى چەکدارى نزیک لە ئێران ناوبردووە.

 

هاوکات ئاماژە بەوە کراوە کە هێرشە ئاسمانییەکە بە فەرمانى راستەوخۆى جۆ بایدن، سەرۆکى ئەمەریکا ئەنجامدراوە.

 

هەروەها بەگوێرەى هەواڵێکى نیویۆرک تایمز لە هێرشەکەدا حەوت بۆمبى 226 کیلۆگرامى بەکارهێنراوون.

 

رامى عەبدولڕەحمان، بەڕێوەبەرى ڕوانگەى سورى بۆ مافەکانى مرۆڤ (26ى شوباتى 2021) لە لێدوانێکى بۆ ئاژانسى هەواڵى فرانس پرێس کە "ناس کورد" بەدواداچوونى بۆ کردووە ئاماژەى بەوە کرد "هێرشە ئاسمانییەکەى ئەمەریکا کە ڕێرەوێکى نایاسایى لە باشورى ئەلبوکەمال کردبووە ئامانج بووە هۆى لەناوبردنى سێ بارهەڵگر کە لەعێراقەوە هاتبووە ناو سوریا". 

 

ڕونیشیکردەوە، لەهێرشەکەدا ژمارەیەکى زۆر لە چەکدار کوژراوون بەڵام زانیارییە سەرەتاییەکان ئاماژە بە کوژرانى 17 چەکدارى گروپەکانى سەر بە حەشدى شەعبى دەدەن.   

 

وەزیرى بەرگرى ئەمەریکا لەبارەى هێرشە ئاسمانییەکەى ئەمەریکا لە سوریا رایگەیاند "دڵنیاین ئەو ئامانجەى هێرشە ئاسمانییەکە پێکاویەتى سەر بەهەمان ئەو گروپە چەکدارانەن کە بەرپرسن لە هێرشە موشەکییەکەى هەولێر".

 

لوید ئۆستن، وەزیرى بەرگرى ئەمەریکا (26ى شوباتى 2021) رونیکردەوە کە ئەو داواى لە جۆ بایدن، سەرۆکى ئەمەریکا کردووە ئەو ئۆپراسیۆنە ئەنجام بدەن.

 

وتیشى"پێشتریش وتبومان کە لە کات و ساتى گونجاودا وەڵامى هێرشەکان دەدەینەوە".

 

مایکڵ ماکۆڵ، سەرۆکی لیژنەکە کە هاوکات نوێنەری کۆمارییەکانە لە گۆنگرێسی ئەمەریکا (26ی شوباتی 2021) لە ڕاگەیەندراوێکدا کە وێنەیەکی دەست" ناس کورد" کەوتووە  ڕایگەیاند "داوام لە ئیدارەکەی سەرۆک بایدن کردووە وەڵامی هێرشەکانی ئەم دواییانە بداتەوە کەکراوەتە سەر بەرژەوندییەکانی  ئەمەریکا و هاوپەیمانان، هەروەها ستایشی دەکەم کە بە تەواوی ئەو کارەی کردووە".   

 

ماکۆڵ ئەوەشی وتووە "وەڵامەکانی لەم شێوەیە، پەیامی هەڕەشە و وەبیرهێنانەوەیە بۆ ئێران و بەکرێگیراوەکانی لە سەرتاسەری جیهاندا کە هێرشکردنە سەر بەرژەوەندییەکانی ئەمەریکا قبوڵ ناکرێت، سوپاسی سەرۆک و کارمەندانی خزمەتگوزاریمان دەکەم بۆ پاراستنی ئەمەریکییەکان لە دەرەوە".   

 

شەوى (15ى شوباتى 2021)  14 موشەک ئاڕاستەى هەولێر کرا و بەهۆیەوە بەڵێندەرێکى هاوپەیمانان کوژرا و نۆ کەسى دیکەش برینداربوون کە بەشێکیان ئەمریکین.     

 

لەگەڵ ئەوەى تا ئێستا هێزە ئەمنییەکانى هەرێم بەفەرمى هیچ گروپێکیان بەئەنجامدانى هێرشەکە تۆمەتبار نەکردووە، بەڵام لەدواى ئەنجامدانى هێرشەکە گروپی "سرایا أولیاء الدم" كە تاقمێكی چەكدارە و خۆی بەخاوەنی خوێنی سولەیمانی و ئەبومەهدی موهەندیس دەزانێت، بەرپرسیارێتی خۆی لە هێرشە موشەكییەكە ڕاگەیاند.       

 

ئەمە دووەم هێرشى موشەکییە بۆ سەر هەولێر لەماوەى کەمتر لە شەش مانگدا.       

 

هێرشەکەى پێشوو لە 30 ئەیلولى 2020دا بوو کە سێ موشەک لە نزیک بارەگای دیموکرات لە گردەچاڵی هەولێر و سێ موشەکیش لە نزیک هێزی هاوپەیمانان لە فڕۆکەخانەی نێودەوڵەتیی هەولێر کەوتنەخوارەوە و هەرێم حەشدى شەعبى بە ئەنجامدانى تۆمەتبارکرد.