گه‌ڕان

Shadow Shadow
سیاسه‌تی

وردەکاریى

ڕوانگەى سورى زیانەکانى هێرشە ئاسمانییەکەى ئەمەریکا ئاشکرا دەکات

2021.02.26 - 08:41
App store icon Play store icon Play store icon
ڕوانگەى سورى زیانەکانى هێرشە ئاسمانییەکەى ئەمەریکا ئاشکرا دەکات

ناس کورد-

ڕوانگەى سورى بۆ مافەکانى مرۆڤ زیانەکانى ئەو هێرشە ئاسمانییەى ئەمەریکاى ئاشکرا کرد کە چەند گروپێکى چەکدارى نزیک لەئێرانى لە سوریا کردە ئامانج.

 

کەناڵی ناس کورد لە تێلیگرام جۆین بکە   

 

رامى عەبدولڕەحمان، بەڕێوەبەرى ڕوانگەى سورى بۆ مافەکانى مرۆڤ (26ى شوباتى 2021) لە لێدوانێکى بۆ ئاژانسى هەواڵى فرانس پرێس کە "ناس کورد" بەدواداچوونى بۆ کردووە ئاماژەى بەوە کرد "هێرشە ئاسمانییەکەى ئەمەریکا کە ڕێرەوێکى نایاسایى لە باشورى ئەلبوکەمال کردبووە ئامانج بووە هۆى لەناوبردنى سێ بارهەڵگر کە لەعێراقەوە هاتبووە ناو سوریا".

 

ڕونیشیکردەوە، لەهێرشەکەدا ژمارەیەکى زۆر لە چەکدار کوژراوون بەڵام زانیارییە سەرەتاییەکان ئاماژە بە کوژرانى 17 چەکدارى گروپەکانى سەر بە حەشدى شەعبى دەدەن.

 

وەزارەتى بەرگرى ئەمەریکا (پەنتاگۆن) راگەیەندراوێکى لەبارەى هێرشێکى ئاسمانى ئەو وڵاتە بۆ سەر چەند پێگەیەکى چەکدارانى نزیک لە ئێران لەسنورى سوریا بڵاوکردەوە و رایگەیاند "هێرشە ئاسمانییەکە وەڵامدانەوەیەکە بۆ ئەو هێرشە موشەکییەى کە کرایە سەر بنکەى هاوپەیمانان لە شارى هەولێر".

 

بەگوێرەى راگەیەندراوێکى پەنتاگۆن (26ى شوباتى 2021)  لەهێرشە ئاسمانییەکەى سوپاى ئەمەریکادا چەندین پێگەى چەکدارانى کەتائیبى حیزبوڵا و کەتائیبى سەیدولشوهەدا لە رۆژهەڵاتى وڵاتى سوریا کردۆتە ئامانج و ئەو گروپانەشى بە گروپى چەکدارى نزیک لە ئێران ناوبردووە.

 

هاوکات ئاماژە بەوە کراوە کە هێرشە ئاسمانییەکە بە فەرمانى راستەوخۆى جۆ بایدن، سەرۆکى ئەمەریکا ئەنجامدراوە.

 

هەروەها بەگوێرەى هەواڵێکى نیویۆرک تایمز لە هێرشەکەدا حەوت بۆمبى 226 کیلۆگرامى بەکارهێنراوون.

 

شەوى (15ى شوباتى 2021)  14 موشەک ئاڕاستەى هەولێر کرا و بەهۆیەوە بەڵێندەرێکى هاوپەیمانان کوژرا و نۆ کەسى دیکەش برینداربوون کە بەشێکیان ئەمریکین.     

 

تا ئێستا هێزە ئەمنییەکانى هەرێم بەفەرمى هیچ گروپێکیان بەئەنجامدانى هێرشەکە تۆمەتبار نەکردووە، بەڵام شەوى رابردوو گروپی "سرایا أولیاء الدم" كە تاقمێكی چەكدارە و خۆی بەخاوەنی خوێنی سولەیمانی و ئەبومەهدی موهەندیس دەزانێت بەرپرسیارێتی خۆی لە هێرشە موشەكییەكە ڕاگەیاند.       

 

ئەمە دووەم هێرشى موشەکییە بۆ سەر هەولێر لەماوەى کەمتر لە شەش مانگدا.       

 

هێرشەکەى پێشوو لە 30 ئەیلولى 2020دا بوو کە سێ موشەک لە نزیک بارەگای دیموکرات لە گردەچاڵی هەولێر و سێ موشەکیش لە نزیک هێزی هاوپەیمانان لە فڕۆکەخانەی نێودەوڵەتیی هەولێر کەوتنەخوارەوە و هەرێم حەشدى شەعبى بە ئەنجامدانى تۆمەتبارکرد.