گه‌ڕان

Shadow Shadow
سیاسه‌تی

وردەکاری

لە پڕۆژەی بودجەی 2021ی هەرێم هەلی دامەزراندن بوونی هەیە؟

2021.02.25 - 22:43
App store icon Play store icon Play store icon
لە پڕۆژەی بودجەی 2021ی هەرێم هەلی دامەزراندن بوونی هەیە؟

ناس کورد-

کارەکانی داڕشتنەوەی پرۆژەیاسای بودجەی 2021ی هەرێمی کوردستان بەردەوامە و ئەمڕۆ تاوتوێی چارەنوسی فەرمانبەرانی گرێبەست کراوە، بەڵام نەگەیشتوون بە هیچ ئەنجامێک لەو بارەیەوە.

کەناڵی ناس کورد لە تێلیگرام جۆین بکە   

 

حکومەتی هەرێمی کوردستان، بڕیاریداوە بۆ ئەمساڵ پڕۆژەیاسای بودجەی هەبێت و هەردوو وەزارەتی دارایی و پلانادانان سەرقاڵی داڕشتنەوەی پڕۆژەکەن.

 

لەوبارەیەوە سەرچاوەیەکی ئاگادار (پێنجشەممە 25ی شوباتی 2021) بە "ناس کورد"ی ڕاگەیاند، "کارەکان و گفتوگۆکرد بۆ تەواوکردنی داڕشتنەوەی پڕۆژەکە بەردەوامە و هێدەی نەماوە بگەنە کۆتایی."

 

ناس کوردی زانیویەتی، لە کۆبوونەوەی ئەمڕۆدا لەسەر پڕۆژەبودجەکە، گفتوگۆ لەسەر پرسی دامەزراندن و بە هەمیشەییکردنی فەرمانبەرانی گرێبەست کراوە.

 

بەگوێرەی ئەو زانیاریانەی دەست "ناس کورد" کەوتوون، داڕێژەرانی پڕۆژەکە نەگەیشتوونەتە هیچ ئەنجامێک لەوبارەیەوە، ئەوەش بەهۆی زۆری ئەو فەرمانبەرانەوە و هەروەها ناڕێکی لە دامەزراندنیان لە ساڵانی ڕابردوودا و بەدەر لە بودجە.

 

ئەو سەرچاوە بەرپرسە ئاماژەی بەوەشکرد، بەهۆی ئەوەی لەماوەی ساڵانی ڕابردوودا پڕۆژەی بودجە نەبووە، ناڕێکییەکی زۆر لە ژمارە و داتاکانی وەزارەتەکاندا هەیە و سەرقاڵی وردبینین لەو داتایانە.

 

باسی لەوەشکرد، ئەگەر پلەی وەزیری "دامەزراندن" لە پڕۆژەکەدا هەبێت، ئەوە بە ئەگەرێکی زۆر ئەولەویەت دەدرێت بە کارمەندانی گرێبەست، بەڵام تاوەکو ئێستا نەگەیشتوونەتە هیچ ئەنجامێک لەوبارەیەوە.

 

ئەوەش لەکاتێکدایە، ماوەی چەند ساڵێکە بەهۆی قەیرانی دارایی حکومەتی هەرێم دامەزراندنی ڕاگەیاندووە و دەرچووانی زانکۆ و پەیمانگاکانیش بەردەوام ڕەخنەی نەبوونی دامەزراندن دەگرن.

 

هەر ئەمڕۆ پێنجشەممە، هێمن هەورامی، جێگری سەرۆکی پەرلەمانی کوردستان لە کۆنفرانسێکی رۆژنامەوانیدا ڕایگەیاند، لە دوو هەفتەی سەرەتای مانگی ئاداردا پڕۆژەکە دەگاتە پەرلەمانی کوردستان بۆ خوێندنەوە پەسەندکردنی.