ناس کورد-
وەزیرى دارایى عێراق بۆ گفتوگۆکردن لەسەر کاریگەریەکانى بەرزکردنەوەى نرخى دۆلار و پەڕەى سپى چاکسازى سەرپەرشتى کۆبونەوەیەکى کرد و تێیدا جەخت لە پاراستنى چینە هەژارەکان کرایەوە.
کەناڵی ناس کورد لە تێلیگرام جۆین بکە
وەزارەتى دارایى و ئابوریى عێراق (چوارشەممە، 24ى شوباتى 2021) لە بەیاننامەیەکدا کە "ناس کورد" بینیویەتى ئاماژەى بەوەداوە، عەلى عەلاوى، وەزیرى دارایى سەرپەرشتى کۆبونەوەیەکى کردوە کە بریکارى وەزیرەکانى وەزارەتى دارایى و پلاندانان و ڕاوێژکارى نوسینگەى سەرۆک وەزیران و ڕاوێژکارى دارایى وەزارەت و ژمارەیەک لە بەڕێوەبەرە گشتیەکان و سەرۆکى دەستە و گروپەکان و نوێنەرانى کەرتى تایبەت و پیشەسازییەکان بەشدار بوون.
ڕونیشکراوەتەوە، لە کۆبونەوەکەدا گفتوگۆ لەسەر ئامانجە بەدەستهاتووەکانى گۆڕینى نرخى دۆلار و کاریگەرییەکانى کراوە، هەروەها پەڕەى سپى چاکسازى یەکێکى تر بووە لە بابەتەکانى گفتوگۆکان.
بەپێى بەیاننامەکە، لە کۆبونەوەکەدا کاریگەریە سلبیەکانى گۆڕینى نرخى دۆلار و گەڕانەوەى باڵانس بۆ بارودۆخى ئابوریى عێراق گفتوگۆیان لەسەر کراوە.
عەلى عەلاوى لە کۆبونەوەکەدا باسى لەوەکردوە، وەزارەتى دارایى چەند ڕێوشوێنێکى گرتووەتە بەر بۆ کەمکردنەوەى کاریگەریەکانى گۆڕینى نرخى دراو و بەردەوامیشە لە کارکردن بۆ ئەوەى ئەو هەنگاوانە بگۆڕدرێت بۆ کردار بۆ پاراستنى چینە هەژارەکان، ئەوەش هاوکاتە لەگەڵ نزیکبونەوەى تێپەڕاندنى پرۆژە یاساى بودجەى ساڵى 2021 لە پەرلەمانى عێراق.
