گه‌ڕان

Shadow Shadow
سیاسه‌تی

’’دوو گروپ بەرپرسیارن’’

راپۆرتێک نهێنى نوێ لەبارەى هێرشە موشەکییەکانى هەولێر و بەغدا ئاشکرادەکات

2021.02.24 - 10:00
App store icon Play store icon Play store icon
راپۆرتێک نهێنى نوێ لەبارەى هێرشە موشەکییەکانى هەولێر و بەغدا ئاشکرادەکات

ناس کورد-

حکومەتى عێراق دوو گروپى چەکدار تۆمەتبار دەکات بەوەى لە پشت هێرشە موشەکییەکانى ئەمدواییەوەیە و بە وریاییەکى زۆرەوە لەو بارەیەوە دەجوڵێت، بەهۆى ئەوەى یەکێکیان بەشدارێکى بەهێزە لە پڕۆسەى سیاسی، ئەوەش بەپێی ڕاپۆرتێکى ڕۆژنامەى "مەدا"ى عێراقى.

کەناڵی ناس کورد لە تێلیگرام جۆین بکە   

 

ڕاپۆرتێکى ڕۆژنامەکە کە "ناس کورد" بەدواداچوونى بۆ کردووە (24شوباتى 2021) دەڵێت، سەرچاوە سیاسییە ئاگادارەکان ئاشکرایانکردووە، دامودەزگا هەواڵگرى و ئەمنییەکان حکومەتیان ئاگادارکردووەتەوە کە گومانیان نییە لەبارەى ئەو گروپانەى لەپشت هێرشەکانەوەن.

 

بەوتەى سەرچاوەکان، حکومەت لەئێستادا دڵنیایە لەوەى دوو گروپى چەکدارى ناسراو لەپشت هێرشەکانەوەیە، یەکێکیان ژمارەیەک پەرلەمانتارى هەیە، هەروەها وەزیرى هەبووە لە حکومەتى پێشوو.

 

سەرچاوەکان ڕەتیانکردووەتەوە ناوى دوو گروپەکە ئاشکرابکەن، بەڵام بەوتەى ئەوان یەکێک لە گروپەکان "بەرۆژ لەگەڵ حکومەتە و بە شەویش دژیەتى".

 

هەرچەندە ڕاپۆرتەکە ناوی هیچ گروپێک نەکردووە، بەڵام بەپێی ئاماژەکان کە پەرلەمانتار و وەزیری هەبووە، پێدەچێت مەبەست لێی عەسائیبی ئەهلی حەق بێت کە لە سەردەمی عادل عەبدولمەهدیدا وەزیری ڕۆشنبیرییان هەبووە و ئێستاش فراکسیۆنەکەی بە ناوی سادیقون لە پەرلەمانی عێراق 15 پەرلەمانتاری هەیە.

 

گواستنەوەى موشەکەکان

بەپێی ڕاپۆرتەکە، هێرشە نوێیەکان ماوەیەک ئامادەکاریی بۆ کراوە، موشەکەکان لەرێگەى سوریاوە هێنراونەتە عێراق بەدیاریکراوى لەخاڵێکى سنورى دوور لە کۆنتڕۆڵى حکومەت لە خۆرئاواى وڵات.

 

بەپێی راپۆرتە ئەمنییەکان، هێرشەکەى سەر فڕۆکەخانەى هەولێر و بنکەى ئاسمانى بەلەد و ناوچەى سەوز، بەیەک جۆرى موشەک ئەنجامدراون کە دروستکراوى ئێران بووە.

 

بەڵام ئێران و حەشدى شەعبى بوونى هیچ جۆرە پەیوەندییەکیان بەو هێرشانە رەتکردووەتەوە، کە بووەتە هۆى کوژرانى بەڵێندەرێکى بیانى و نۆ کەسى دیکە کە پێنجیان ئەمریکین.

 

بەپێی راپۆرتەکە، موشەکەکانى هەولێر لە موسڵەوە ڕەوانەى کەرکوک کراون، دواتر گوازراونەتەوە هەرێم.

 

شەوى دووشەممە (15 شوباتى 2021)، 14 موشەک ئاڕاستەى هەولێر کرا و بەهۆیەوە بەڵێندەرێکى هاوپەیمانان کوژرا و نۆ کەسى دیکەش برینداربوون کە بەشێکیان ئەمریکین.  

  

گروپی "سرایا أولیاء الدم" كە تاقمێكی چەكدارە و خۆی بەخاوەنی خوێنی سولەیمانی و ئەبومەهدی موهەندیس دەزانێت بەرپرسیارێتی خۆی لە هێرشە موشەكییەكە ڕاگەیاند. هەروەها گروپێکی چەکداریی دیکە بە ناوی "قوات ذوالفقار" پشتگیری بۆ هێرشەکە راگەیاندووە.  

  

ئەمە دووەم هێرشى موشەکییە بۆ سەر هەولێر لەماوەى کەمتر لە شەش مانگدا.  

  

هێرشەکەى پێشوو لە 30 ئەیلولى 2020دا بوو کە سێ موشەک لە نزیک بارەگای دیموکرات لە گردەچاڵی هەولێر و سێ موشەکیش لە نزیک هێزی هاوپەیمانان لە فڕۆکەخانەی نێودەوڵەتیی هەولێر کەوتنەخوارەوە و هەرێم حەشدى شەعبى بە ئەنجامدانى تۆمەتبارکرد.