گه‌ڕان

Shadow Shadow
سیاسه‌تی

’’ئەگەر هەیە هەڵوەشێنرێتەوە’’

وادەى رەوانەکردنى کەیسى سزادراوانی بادینان بۆ دادگای پێداچوونەوە راگەیەنرا

2021.02.19 - 23:42
App store icon Play store icon Play store icon
وادەى رەوانەکردنى کەیسى سزادراوانی بادینان بۆ دادگای پێداچوونەوە راگەیەنرا

ناس کورد-

ئەندامێکى تیمی پارێزه‌رانی ده‌ستگیرکراوانی بادینان ڕایگەیاند، چاوەڕواندەکرێت رۆژی یەک شەممە پارێزنامەی دەستگیرکراونی بادینان ڕەوانەی دادگای پێداچوونەوە بکرێت.

 

کەناڵی ناس کورد لە تێلیگرام جۆین بکە   

 

ئاسۆ هاشم لەلێدوانێکدا بۆ "ناس کورد" (19ی شوباتی 2021) ڕایگەیاند، تاوەکو ئێستا پارێزنامەی دەستگیرکراون لەلایەن پارێزەرانەوە ڕەوانەی دادگای پێداچوونەوە نەکراوە، دادگای پیداچوونەوە یەک مانگی لەبەردەستە بۆ پێداچوونەوە.

 

ئاشکراشیکرد، رەنگە ڕۆژی یەک شەممە پارێزنامەکە ئامادە بکرێت و ڕەوانەی دادگای پێداچوونەوە بکرێت.

 

ئاسۆ هاشم جەختیکردەوە، ئەگەر دادگای پێداچوونەوە بڕیارێکی دروست بدات دەبێت سزاکان هەڵبوەشێتەوە، چونکە هیچ بەڵگەیەکیان پێشکەش نەکردووە لەسەر تۆمەتەکان کە بنەمای یاسایی هەبێت و قەناعەت بۆ دادگا دروست بکات.

 

لەبارەی فشارەکانیش وتى "بێگومان کاریگەری هەیە و بەیاننامەکەی سەرۆکی هەرێمیش تا ڕادەیەکی زۆر کاریگەری هەیە چونکە ئەو دەسەڵاتی ڕەهای هەیە و دەسەڵاتی بەسەر دادگای پێداچوونەوەش هەیە، بەیاننامەکەشی نیگەرانی پێوەدیارەو بەڵێنى ئەوەیداوە کە خۆی دێتە سەرخەت بەوەش دیارە دەیەوێت بڕیارەکە هەڵبوەشێتەوە".

 

ئاسۆ هاشم جەختی لەوەشکردەوە، دادگای پێداچوونەوە دەسەڵاتی ئەوەی هەیە ئەگەر بڕیارەکە هەڵبوەشێنێتەوە ڕاستەوخۆ دەستگیرکراونی هەولێرو بادینان ئازاد بکات.

 

ڕۆژی 16ی شوباتی 2021 دادگای تاوانەکانی دووی هەولێر سزاى شەش ساڵ زیندانى بۆ هەریەکە لە شێروان شێروانی، شڤان سەعید، گوهدار زێباری، هاریوان عیسا و ئەیاز کەرەم دەرکرد.

 

ئەو بڕیارە کاردانەوەى بەرفراوانى لێکەوتەوە کە تا ئێستاش بەردەوامە.

 

ڕۆژی پێنج شەممە نێچیرڤان بارزانی، سەرۆکی هەریمی کوردستان ڕایگەیاند، بڕیاری دادگا بۆ سزادانی چەند ڕاگیراوێک نیگه‌رانى دروست کردووە، بەڵام یٔەوە دوا بڕیار نییە.

 

وتیشى بەپێی یاسا، مافى سزادراوانه‌ تانە لە بڕیاره‌کە بده‌ن، دادگای پێداچوونەوەش یٔەرکیەتی بە پشتبەستن و ڕێزگرتن لە یاسا و مافەکانی مرۆڤ و مافی یاساییی سکاڵالێکراو و سکاڵاکار، بە کەیسه‌که‌دا بچێتەوە تا هەمووان هەست بکەن وەک یەک مافیان پارێزراوە.

 

هەروەها ئەمڕۆ 19ی شوباتی 2021 ئۆفیسی راگەیاندنی نێردەی ویلایەتە یەکگرتووەکانی ئەمریکا لە باڵیۆزخانەى ئەو وڵاتە لە هەولێر لەسەر سزادانى دەستگیرکراوانى بادینان هاتە دەنگ و رایگەیاند، دەربارەی پرسی ئازادیی ڕادەربڕین و لەو نێوەندەشدا ئازادی بۆ ڕاگەیاندکاران بەردەوام لە پەیوەندیدا بووە لەگەڵ بەرپرسانی حکومەتی هەرێم.

 

ئۆفیسەکە لە راگەیەنراوێکدا کە وێنەیەکى دەست "ناس کورد" کەوتووە ئاماژەى بەوەکردووە، کۆمەڵگا دیموکراتیەکان ڕێز لە ئازادیی ڕادەربڕین دەگرن و پشتیوانی لە توانای ڕاگەیاندکاران دەکەن بۆ ئەنجامدانی کارەکانیان بە بێ ترس لە تۆڵە لێسەندنەوه.

 

لاى خۆیەوە، مەسرور بارزانى سەرۆکى حکومەتى هەرێم داواى رێزگرتنی کرد لە سیستەمى دادوەرى، لەیەکەم هەڵوێستیدا دواى سەرهەڵدانى ناڕەزایی بەرفراوان لەسەر بڕیارى سزادانى دەستگیرکراوانى بادینان لەلایەن دادگاوە.