گه‌ڕان

Shadow Shadow
سیاسه‌تی

وردەکاریى

ڕۆژنامەیەکى عێراقى شوێن و جۆرى ئەو موشەکانە ئاشکرا دەکات کە هەولێرى کردە ئامانج 

2021.02.18 - 09:48
App store icon Play store icon Play store icon
ڕۆژنامەیەکى عێراقى شوێن و جۆرى ئەو موشەکانە ئاشکرا دەکات کە هەولێرى کردە ئامانج 

ناس کورد- 

ڕۆژنامەیەکى عێراقى ئاشکراى کرد، ئەو موشەکانەى کە ئاڕاستەى شارى هەولێر کراون لەنێوان دوو پارێزگادا نزیکەى 100 کیلۆمەتریان بڕیووە پێش ئەوەى بتەقێنرێن و گەیەنراونەتە گروپێکى چەکدارى لەناوچەى دوبسى باشورى کەرکوک.

 

کەناڵی ناس کورد لە تێلیگرام جۆین بکە   

 

ڕۆژنامەى مەداى عێراقى (18ى شوباتى 2021) لەڕاپۆرتێکیدا کە "ناس کورد" بەدواداچوونى بۆ کردووە ئەوەى ئاشکرا کردووە، ئەو موشەکانەى کە شەوى (دووشەممە)ى ڕابردوو فڕۆکەخانەى هەولێرى کردە ئامانج دەیان کیلۆمەترى لەنێوان دوو پارێزگادا بڕیووە و براوەتە گوندێکى باشورى کەرکوک لەلایەن چەند گروپێکى چەکدارییەوە پێش ئەوەى بەرەو هەولێر بوەشێنرێن.

 

ئاماژە بۆ ئەوەش کراوە، ئەو 14 موشەکە لەناو و نزیک بنکەى سەربازى حەریرى سەربازى لەهەولێر کەوتووەتە خوارەوە و بووەتە هۆى کوژرانى کەسێک و برینداربوونى زیاتر لە 15 کەسی سەربازى و مەدەنیى کە لەناویاندا ئاوارەیەک و خانەنشینێکى ئەمەریکى تێدایە.

 

سەرچاوەیەکى ئەمنیى لەباکورى شارى بەغداوە بەڕۆژنامەکەى ڕاگەیاندووە، موشەکەکان بەئۆتۆمبێلى بارهەڵگرى کیا لەدەشتى نەینەواوە بەرەو شارۆچکەى دوبس لەباشوورى کەرکوک گواستراوەتەوە.

 

بەوتەى سەرچاوەکە، ئەو موشەکانە نزیکەى 100 کیلۆمەتریان بڕیووە پێناچێت لەموسڵەوە تەقێنرابن و هەمووشیان لەجۆرى موشەکى فەجربوون کە لەلایەن ئێرانەوە دروستدەکرێن.

 

ڕۆژنامەکە باسى لەوەش کردووە، چەند مانگێک پێش ئێستا بەفەرمانێکى حکومەت گروپێکى چەکدار لە بەرتەڵە لەدەشتاییەکانى نەینەوا دوورخرایەوە بۆ چەند کیلۆمەترێک بۆ پاشەوە ئەوەش بەهۆى ئەوەى بەوە تۆمەتبار کرا کە موشەکى ئاڕاستەى فڕۆکەخانەى هەولێر کردووە.

 

هاوکات بەپێى سەرچاوەیەکى نزیک لەفەرماندە ئەمنییەکانى شارى کەرکوک، ئەو موشەکانە لەشوێنێکى نزیک شارۆچکەى دوبسەوە تەقێنراون کە ئەو ناوچەیە چەند گروپێکى سەر بەحەشدى شەعبى تێدایە.

 

پێشتریش ڕۆژنامەی ئەلعەرەبی چاپی لەندەن لەزاری سەرچاوەكانییەوە بڵاویكردەوە ئێرانییەكان لە ڕێگەی هێرشەكەی سەر هەولێرەوە دەیانەوێت رێگە لەدروستكردنی بنكەی سەربازی بگرن كە خاڵی بەیەك گەیاندنی هێزەكانی ئەمەریكا بێت لە هەرێم و رۆژئاوای كوردستان.  

 

بەگوێرەی ڕۆژنامەکە (17ی شوباتی 2021) کە "ناس کورد" بەدواداچوونی بۆ کردووە "سەرچاوەیەک لەهەرێمی کوردستان، بە مەرجی ناونەهێنانی وتویەتی (ئێران میلیشیا لایەنگرەکانی لەعێراق بەکاردەهێنێت بۆ وەڕسکردنی هێزەکانی ئەمەریکا لە هەرێمی کوردستان ئەوەش بەمەبەستی  ڕێگریکردن لە ئامادەبونێکی سەربازی بەردەوامى ئەو وڵاتە لەگەڵ ئەو هێزانەی کە لەئێستادا لەناوچە کوردییەکانی دراوسێی بونیان هەیە وەک سوریا".  

  

بەپێی ڕۆژنامەکە  "ئێران نایەوێت ڕێگە بە ئەمەریکا بدات چاودێری سنوری نێوان سوریا و هەرێم بکات، چونکە ئەو کارە دەبێتە هۆکاری سنوردارکردنی جموجوڵی میلیشیا ئێرانییەکان لەو ناوچەیەدا".  

  

مایکڵ نایتس، شرۆڤەکار لەپەیمانگای واشنتۆن بۆ سیاسەتی ڕۆژهەڵاتی نزیک لەو بارەیەوە دەڵێت "پێوەر و مەودای هێرشە موشەکییەکەی سەر هەولێر گەورە و نائاسایی بوو، پێدەچێت ئامانج لێی بریندارکردن و کوشتنی بەڵێندەرانی ئەمەریکا و ئەندامانی خزمەتگوزاری یاخود هاوپەیمانە کوردەکان بێت، بۆیە ئەمە تاقیکردنەوەیە بۆ ئیدارەی سەرۆک بایدن".