گه‌ڕان

Shadow Shadow
سیاسه‌تی

ڕاگەیەندراوێک لە وەزارەتی ناوخۆی هەرێمی کوردستانەوە

2021.02.15 - 23:03
App store icon Play store icon Play store icon
ڕاگەیەندراوێک لە وەزارەتی ناوخۆی هەرێمی کوردستانەوە

ناس کورد-

وەزارەتی ناوخۆی حکومەتی هەرێمی کوردستان ڕاگەیەنراوێکی لەبارەى هێرشە موشەکییەکەى ئەمشەوی سەر هەولێر بڵاوکردەوە و دەڵێت، "بەداواچوون و لێکۆڵینەوەی ورد لە لایەن دامودەزگا ئەمنییەکانەوە دەستی پێکردووە."

کەناڵی ناس کورد لە تێلیگرام جۆین بکە   

 

لە ڕاگەیەنراوێکدا وەزارەتەکە دەڵیت، "کاتژمێر 9:30 ئەمشەو (15ی شوباتی 2021) چەند موشەکێک ئاڕاستەی شاری هەولێر و دەوربەری كران و بەر چەند شوێنێک کەوتن."

 

دەشڵیت، "لە ئەنجامدا و بە پێی زانیارییە سەرەتاییەکان چەند کەسێک برینداربوون. بەداواچون و لێکۆڵینەوەی ورد لە لایەن دامودەزگا ئەمنییەکانەوە دەستی پێکردووە."


داواش "لە هاووڵاتییانی خۆشەویستی شاری هەولێر دەکەین لەو شوێنانە دووربکەنەوە و لە ماڵەکانیان بمێننەوە تا دواتر زانیاری زیاتر بڵاودەکەینەوە."

 

سەرچاوەیەک لە ئاسایشى هەولێر رایگەیاند، لە هێرشەکەى سەر هەولێر ئەوەى یەکلا بووەتەوە سێ بۆ چوار موشەک بووە کە یەکێکیان بارەگاى هێزەکانى ناتۆى لەناو فڕۆکەخانە کردووەتە ئامانج.  

  

سەرچاوەکە کە نەویست ناوى بهێنرێت بە "ناس کورد" ى راگەیاند، موشەکەکان کەوتونەتە مەیدانى ئاژەڵان، گەڕەکى بەختیارى لە نزیک شوقەکانى زەکەریا، لەناو فڕۆکەخانە لە نزیک بارەگاى هێزەکانى ناتۆ.  

  

وتیشى دەوترێت موشەکێک تێپەڕبووە بەسەر فڕۆکەخانە بەهۆى ئەوەى سیستەمى دژە موشەکى ئەمریکى وەڵامیداوەتەوە، بەڵام ئەوە هێشتا یەکلانەبووەتەوە.  

  

بەهۆى کەوتنەخوارەوەى موشەکەکانەوە دوو کەس برینداربوون و رەوانەى نەخۆشخانە کراون.  

  

ئەمە دووەم هێرشى موشەکییە بۆ سەر هەولێر لەماوەى کەمتر لە شەش مانگدا.  


هێرشەکەى پێشوو لە 30 ئەیلولى 2020دا بوو کە سێ موشەک لە نزیک بارەگای دیموکرات لە گردەچاڵی هەولێر و سێ موشەکیش لە نزیک هێزی هاوپەیمانان لە فڕۆکەخانەی نێودەوڵەتیی هەولێر کەوتنەخوارەوە و هەرێم حەشدى شەعبى بە ئەنجامدانى تۆمەتبارکرد.