کازمی لەسەر بڵاوەپێکردنی هێزەکانی سەدر لە بەغدا و شارەکانی تر هاتەدەنگ

دوای ئەوەی وەزیرەکەی موقتەدا سەدر کە ناسراوە بە محەمەد ساڵح عێراقی لە تویتێکدا هۆشداری دا لە بوونی پلانێک بۆ هێرشکردنە سەر مەزارگەکانی ئیمامەکانی شیعە لە چەند ناوچە و شوێنکی عێراق، ئێوارەى ئەمرۆ چەکدارانی میلیشیاکانی "سەرایا سەلام"ی سەر بە ڕەوتی سەدر لە بەغدا و نەجەف و کەربەلا و سامەڕا بڵاوەیان پێکرا.  

کەناڵی ناس کورد لە تێلیگرام جۆین بکە  

بەپێی چەند گرتە ڤیدیۆیەک کە لە تۆڕە کۆمەلایەتییەکانی سەر بە گروپە چەکدارییە شیعییەکان بڵاوکراونەتەوە و "ناس کورد" بەدواداچوونی بۆ کردوون (8ی شوباتی 2021) دەردەکەوێت، کاروانی لیوای تەکتیکی و هێزی کۆماندۆی گروپی سەرایا سەلام فەرمانیان پێکراوە بەزووترین کات بگەنە ئەو شوێن و ناوچانەی کە مەزارگەی ئیمامەکانی شیعەی تێیدایە.  

لە گرتە ڤیدیۆکاندا دیارە کە سەدان چەکداری ئەو گروپە لە دەوروبەری مەزارگەی هەردوو ئیمام عەلی هادی و حەسەن عەسکەری لە شاری سامەڕا بڵاویان پێکراوە، هاوکات هێزیکی دیکەش بەرەو ناوچەی کازمییە لە ناو جەرگەی شاری بەغدای پایتەختدا جوڵەی پێکراوە بۆ پاراستنی مەزارگەی ئیمام موسای کازم".  

بەشێکی تریش لە هێزەکانی سەرایا سەلام چواردەوری مەزارگەکانی شارەکانی کەربەلا ونەجەفیان داوە لە باشوری عێراق، هەروەها هێزیکی دیکەش ئاڕاستەی پارێزگای میسان کراوە.  

ئەو هێزانە لەکاتی بڵاوەپێکردنیاندا دەڵێن، ئەوان "بە مەبەستی ڕووبەڕووبوونەوەی سێگۆشەی داعش، ئیسرائیل و حزبی بەعس" لە ئامادەباشیدان بۆ بەرپەرچدانەوەی هەر هەوڵێکی "نانەوەی پشێوی، فیتنە و ئاڵۆزیی لە نێوان هاوڵاتیانی عێراقدا، ئەوەش لە ئەگەری هەوڵدان بۆ تەقاندنەوەی ئەو مەزارگانە هاوشێوەی ئەوەی لە 2005 ڕوویدا کە مەزارەگەی ئیمام عەلی هادی لە شاری سامرا لەلایەن رێکخراوی داعش تەقێندرایەوە".  

هاوکات سەفا موسەوی، وتەبێژی سەربازی سەرایا سەلام ڕایگەیاند، بڵاوەپێکردنی هێزەکانیان بە هەماهەنگی هێزە ئەمنییەکان و فەرماندەی ئۆپراسیۆنە هاوبەشەکان بووە.  

دەشڵێت، "ئێمە جێگرەوەى سوپای عێراق نین بەڵکو ئەرکی ئێمە هاوکاریکردنی ئەوانە لە بەرامبەر ئەو هەڕەشەیەی ڕووبەڕووی وڵات بووەتەوە."