گه‌ڕان

Shadow Shadow
سیاسه‌تی

پەرلەمانتارێکی کورد وەڵامی وەزیری دارایی هەرێمی دایەوە

غالب محەمەد: ئەگەر هەرێم موچەى پێنج مانگیشى دابێت زیاتر لە دوو ترلیۆن دیناری بۆماوەتەوە

2019.05.27 - 17:46
غالب محەمەد: ئەگەر هەرێم موچەى پێنج مانگیشى دابێت زیاتر لە دوو ترلیۆن دیناری بۆماوەتەوە
ناس کورد- ئەندامێکى لیژنەى نەوت و گازى سروشتى پەرلەمانى عێراق وەڵامى ڕونکردنەوەکانى وەزیرى دارایى و حکومەتى هەرێمی دایەوە و دەڵێت "ئەو ژمارانەى خراونەتەڕوو ڕاستى نین". . غالب محمەد، ئەندامى لیژنەى نەوت و گازى سروشتى پەرلەمانى عێراق بەژمارە وەڵامى کۆنگرە ڕۆژنامەوانیەکەى وەزیرى دارایى دایەوە و رایگەیاند: ئەگەر پێنج مووچەی فەرمانبەرانی حکومەتی بە تەواوی دابێت هێشتا زیاتر لە دوو ترلیۆن دیناری بۆ ماوەتەوە. . ئەو ئەندامەى لیژنەى نەوت و گازى سروشتى پەرلەمانى عێراق ئاماژە بۆئەوە دەکات موچەى پێنج مانگى فەرمانبەران دوو ترلیۆن 266 ملیار دیناری پێویستەو و کۆى گشتى داهاتى نەوتى هەرێم "چوار ترلیۆن 14 ملیار دینارە" هاوکات داهاتى ناوخۆش 750 ملیار دینارە. . بەپێی لێکدانەوەکانی غالب محەمەد  " ئەگەر هەرێم موچەى فەرمانبەرانیشى لەماوەى پێنج مانگى ڕابردودا دابێت، ئەوا دوو ترلیۆن و 629 ملیار دینارى زیادەى هەبووە". . پەرلەمانتارە کوردەکەی پەرلەمانی عێراق ڕەخنەى لە وەزیرى دارایى هەرێم دەگرێت بەوەى پێچەوانەى یاساى بودجەى ساڵی 2019 جوڵاوەتەوە. . هەروەها ئاماژە بەوەدەکات کە لە ژێر فشاردا حکومەت دانی بەوەدا ناوە کە پێنج مووچەی لە حکومەتی ناوەند وەرگرتووە، لەوبارەوە دەڵێت "کاتێک ئێمە دەمان وت پێنج موچەتان وەرگرتووە هەموتان خۆتان کپ دەکرد، بەڵام بەهۆی ئەم سکاڵایەوە ئەوە لەزاری خۆتان بیسترا کە بەڵێ پێنج موچەتان وەرگرتوە لەحکومەتی عێراق". . غالب محمەد ڕەخنەى ئەوەش دەگرێت وەزیرى دارایى لە کۆنگرە رۆژنامەوانیەکەیدا باسى داهاتى نەوت و ناوخۆى نەکردوە، پرسیارى ئەوەشى کردووە : "چۆن ملیارێک و 200 ملیۆن دۆلارتان داوەتەوە بە ڕوسنەفت؟". . ئەمڕۆ دووشەممە 27ى ئایاری 2019 وەزارەتى دارایى و سەرۆکایەتى ئەنجومەنى وەزیران کۆنگرەیەکى ڕۆژنامەوانى هاوبەشیان گرێداو وەڵامى ئەو دەنگۆیانەیان دایەوە کە هەرێمى کوردستان پارەى موچەى بۆ قەرزەکانى حکومەت بەکارهێناوە و ئەو دەنگۆیانەیان ڕەتکردەوە. . .