گه‌ڕان

Shadow Shadow
سیاسه‌تی

دوو وتار دیاریکرا 

ئەوقافی سلێمانی هەڵوێستى خۆى لەبارەى دیاریکردنى وتارى هەینى راگەیاند

2021.01.28 - 15:56
App store icon Play store icon Play store icon
ئەوقافی سلێمانی هەڵوێستى خۆى لەبارەى دیاریکردنى وتارى هەینى راگەیاند

ناس کورد-

 

ئەوقافى سلێمانى رایگەیاند، مامۆستایانى ئازادن لە هەڵبژاردنى وتار و لێپێچینەوەیان لەگەڵدا ناکرێت لەو بارەیەوە، لەکاتێکدا وەزارەتى ئەوقاف وتاربێژانى پابەندکردووە بەوەى سبەینێ وتارەکانیان تایبەت بکەن بە باسکردنى فیلمە ئێرانییەکە.

کەناڵی ناس کورد لە تێلیگرام جۆین بکە   

 

بەپێی نوسراوێکى بۆردى باڵاى دیاریکردنى وتارى هەینى سەر بە وەزارەتى ئەوقاف، بۆ سبەینێ هەینى دوو وتار ئامادە کراوە کە تایبەتن بە باسکردنى سوکایەتى و ئەو فیلمە ئێرانییەى تایبەت بوو بە هاوکارى ئێران بۆ هەرێم لەشەڕى دژ بەداعش کە کاردانەوەى زۆرى لێکەوتەوە.

 

فەرەیدون غەریب، بەڕێوەبەری ئەوقافی سلێمانی لە لێدوانێکدا بۆ "ناس کورد" (28ی کانونی دووەمی 2021) ڕایگەیاند "پابەندبوونی مامۆستایانی ئاینی بە ناونیشانی وتاری هەینی کە لەلایەن بۆردی وتاردان لە وەزارەتی ئەوقافەوە دیاریدەکرێت بەڕێژەیەکی دیاریکراوە لە پارێزگاکان، لە سلێمانی 20-30% مامۆستایان پابەندن".

 

باسی لەوەشکرد، بۆ ئەم هەفتەیە کە دوو ناونیشان بۆ وتاری هەینی دیاریکراوە لەلایەن بوردی باڵای ئامادەکردنی وتاری هەینی بۆ سەرجەم هەرێمی کوردستانە و مامۆستای ئاینی ئارەزومەندە لەوەی کام لەو دوو ناونیشانە هەڵدەبژێرێت.

 

سەبارەت بەوەی ئەوقافی سلێمانی لێپێچینەوە یاسای مامۆستایانی ئاینی دەکات ئەگەر پابەندی ناونیشانی وتارەکان نەبن، فەرەیدون غەریب، وتی "ژمارەیەکی زۆر مامۆستای ئاینی وتار دەدات و نازانین پابەند دەبن یاخود نا، بۆ ئەوەش مامۆستای ئاینی ئازادە لە هەڵبژاردنی وتاری هەینی و ئێمە لێپێچینەوەیان لەگەڵ ناکەین".

 

پیشتر بەڕێوەبەرایەتی ئەوقافی پارێزگای هەولێر لە ئاگادارییەکدا (26ی کانونی دووەمی 2021) کە وێنەیەکی دەست "ناس کورد" کەوتووە، پێشنوێژو وتارخوێنان ئاگادار كردووەتەوە کە پابەند بن بە وتاری ڕۆژانی هەینی کە لەلایەن بۆردی  ئاینی وەزارەتی ئەوقاف دانراوە. هەروەها هەڕەشەی گرتنەبەری رێككاری یاسایشی کردووە بەرانبەر ئەوانەی پابەند نابن.