گه‌ڕان

Shadow Shadow
سیاسه‌تی

ڕێژەیەکی سەیر

دوای بەستنی پێوەر نرخی ئاوی ماڵان زیادیکردووە بەڵام داهاتی حکومەت 90% کەمیکردووە

2021.01.16 - 16:36
App store icon Play store icon Play store icon
دوای بەستنی پێوەر نرخی ئاوی ماڵان زیادیکردووە بەڵام داهاتی حکومەت 90% کەمیکردووە

ناس کورد-

ئەندامێکی پەرلەمانی کوردستان ڕایگەیاند، پێش بەستنی پێوەری ئاوی ماڵان، هاووڵاتیان بە دوو مانگ جارێک 15 هەزاریان دەدا و داهاتی حکومەت نۆ ملیار دینار بوو، بەڵام ئێستا پێوەری ئاوی صینی نرخی ئاوی کردووە بە سەدان هەزار دینار، کەچی داهاتی حکومەت ناگاتە ملیارێک دینار.

کەناڵی ناس کورد لە تێلیگرام جۆین بکە   

 

دابان محەمەد، ئەندامی فراکسیۆنی گۆڕان لە پەرلەمانی کوردستان (شەممە 16ی کانوونی دووەمی 2021) لە فەیسبوکی فەرمیی خۆی ڕایگەیاند، "پێشتر کە پێوەری ئاو دانەنرابوو، بە دوو مانگ جارێک ھاوڵاتی 15 ھەزار دیناری دەدا و داھاتی حکومەتیش بۆ ئاو نۆ ملیار دینار بەرەو ژور بوو، بەڵام ئێستا پێوەری ئاوی صینی نرخی ئاوی لەسەر هاووڵاتیان کردووە بە سەدان ھەزار دینار، کەچی داھاتی حکومەت مانگانە ناگاتە ملیارێک دینار."

 

دابان محەمەد کە داتاکانی لە کۆمپانیاکانی ئاو وەرگرتووە، لە لێدوانێکدا بۆ "ناس کورد" ڕوونیکردەوە، "پێشتر کە بڕی پارەکە کەم بوو، هاووڵاتیان پارەی ئاویان دەدا، بەڵام ئێستا پارەکە ئەوەندە زۆرە هاووڵاتی ئامادەنییە بچێت سەدان هەزار دینار بداتە کۆمپانیایەک، جگە لەوەی ئەوەشی کە دەدرێت، بەشێکی بۆ کۆمپانیاکانە، هەربۆیە ئەو داهاتەی حکومەت دەستیدەکەوێت زۆر کەمیکردووە."

 

وتیشی، "ئێمە ماوەیەکی زۆرە هاوار دەکەین و هیچ ڕێگایەک نەماوە نەیگرینەبەر بۆ هەڵوەشاندنەوەی ئەو پڕۆژەیە، چونکە پڕۆژەکە شکستی هێناوە و حکومەت خۆشی دەزانێت و دەیبینێت، بەڵام نازانێت چیبکات."

 

ڕوونیشیکردەوە، "ئەگەر حکومەت ئەو پڕۆژەیە هەڵبوەشێنێتەوە، 60 ملیار دینار دەدۆڕێنێت و  دەبێت 60 ملیار وەک قەرەبوو بداتە ئەو سێ کۆمپانیایەی پڕۆژەی پێوەری ئاویان پێدراوە، بەڵام ئامادەنییە ئەو بڕە پارەیە بدات و شکستی پڕۆژەکە ڕابگەیەنێت، بۆیە هەموو زیانەکە بۆ هاووڵاتیانە، هەم لەو پارە زۆرەی مانگانە بۆیان دێتەوە، هەم کەمبوونەوەی داهاتی حکومەت."

 

جەختیشیکردەوە، "ئەوەی لەسەر شانی ئێمە بوە کردومانە و بەردەوام دەبین، لەسەر شانی خەڵکیش پێویستە ھەرکەسەو لە ماڵی خۆیەوە پرۆسەکە ڕەتبکاتەوە و ئەم زوڵمە قبوڵ نەکات، تا حکومەت دان بە شکستی خۆیدا دەنێت و لە بڕە پارە زۆرانە ڕزگاری دەبێت."