گه‌ڕان

Shadow Shadow
سیاسه‌تی

زانیارى زیاتر

لە سێیەمین ساڵیادا هاوپەیمانێتی سەدر و شیوعی هەڵوەشایەوە

2021.01.15 - 17:42
App store icon Play store icon Play store icon
لە سێیەمین ساڵیادا هاوپەیمانێتی سەدر و شیوعی هەڵوەشایەوە

ناس کورد- 

لەساڵیادى سێ ساڵ تێپەڕبوون بەسەر هاوپەیمانێتى شیوعیەکان و سەدرییەکان لەژێر چەتری سائیروندا ئەمڕۆ هەڵوەشاندنەوەى ئەو هاوپەیمانێتیە راگەیەندرا و سکرتێرى شیوعیەکانى عێراق هۆکارەکەى بۆ بوونى ڕاى جیاواز لەسەر دادگایی كردنی بکوژانى خۆپیشاندانەکانى تشرین دەگەڕێتەوە و سەدریەکانیش دەڵێن جارێکى تر موقتەدا باوەڕیان پێ ناکات.

 

کەناڵی ناس کورد لە تێلیگرام جۆین بکە   

لەڕاپۆرتێکیدا کە ماڵپەڕى (العربى الجدید) ( 15ى کانوونى دووەمى 2021) بڵاویكردووەتەوەو "ناس کورد" بەدواداچوونى بۆ کردووە،  پاش ئەوەی مانگى ئایارى ساڵى 2018 واتە پێش هەڵبژاردنەکان سەدرییەكان و حیزبی شیوعی هاوپەیمانێتیەکەیان پێکهێنا دواى سێ ساڵ لەو هاوپەیمانێتیە هەڵوەشایەوە.

لەبارەی هۆكارەكەشەوە راپۆرتەكە باس لەوە دەكات  ڕەزامەندى سەدرییەکان بەسیستمى سانت لیگۆ لەناو یاسای هەڵبژاردنەکان و هەروەها هەڵوێستى پڕ دڵەڕاوکێى سەدرییەکان لەخۆپیشاندانەکانى عێراق کە بە شۆڕشى تشرین ناو دەبرێت و ساڵى 2019 دەستى پێکرد و شیوعیەکانیش بەشداریان تێدا کرد بوونە هۆی لێكترازانی زیاتری هەردوولا.

 

لەبارەى کشانەوەیان لەهاوپەیمانێتیەکە ڕائید فەهمى سکرتێرى گشتى حزبى شێوعى عێراق بەماڵپەڕەکەى ڕاگەیاند، کاتێک چونەتە ئەو هاوپەیمانێیتەوە چەند هۆکارێک پاساویان بووە و چوار لایەنى تریش بەشداریان کردووە و هەر یەکەشیان دەستیانگرتووە بە پرەنسیپى خۆیانەوە و ڕێزیشیان لەئامانجەکانى هاوپەیمانێتیەکە گرتووە.

 

سکرتێرى شێوعیەکانى عێراق دەشڵێت، لەگەڵ دەستپێکردنى خۆپیشاندانەکانى تشریندا ئەوان پشتیوانیان کردووە و دواتریش ئەوان سووربون لەسەر بەدادگاى گەیاندنى تاوانباران و بکوژانى ئەو ڕوداوانە  و  لە پەرلەمانیشەوە فشاریان لەسەر ئەو کەیسانە دروستکردووە و ئیتر نەیانوانتیوە بۆ هاتنەدى ئەوانە لەگەڵ سەدرییەکاندا بەردەوام بن.



فەهمى جەختیش لەسەر ئەوە دەکاتەوە دەرچوونیان لەو هاوپەیمانێیتە خیانەت نیە بەڵکو پاساویان بۆ دەرچوون هەیە.

 

لەکاردانەوەى ئەو دۆخەشدا، بەرپرسێکى باڵاى سەدرییەکان کە نەیویستووە ناوەکەى ئاشکرا بکرێت بەماڵپەڕەکەى وتوە، دواى کشانەوەى شیوعیەکان و لایەنەکانى تر لەئێستادا سائیرون تەنها سەدرییەکانن.

 

ئەوەشى ئاشکرا کردووە، چیتر موقتەدا سەدر باوەڕ بەچالاکانى مەدەنى و چەپەکان ناکات و لەداهاتووشدا هیچ هاوپەیمانێتیەکیان لەگەڵدا ناکات.