گه‌ڕان

Shadow Shadow
سیاسه‌تی

جێگرەكەی بەخیانەتكار لەقەڵەم دەدات

واشنتۆن پۆست نهێنییەكانی پێش ملكەچكردنی ترەمپ ئاشكرا دەكات

2021.01.08 - 17:32
App store icon Play store icon Play store icon
واشنتۆن پۆست نهێنییەكانی پێش ملكەچكردنی ترەمپ ئاشكرا دەكات

ناس كورد

ڕۆژنامەی واشنتۆن پۆست ئاشكرایكرد دۆناڵد ترەمپ سەرەتا ئامادە نەبووە پۆزش بهێنێتەوە بۆ رەفتاری لایەنگرانی و مایك بێنسی جێگریشی تۆمەتباركردووە بە خیانەت، بەڵام دواتر لەژێر گوشاری نزیكەكانی تۆمارێكی بڵاوكردەوە بۆ ئیدانەكردنی هەڵكوتانە سەر كۆنگرێسی ئەمەریكا.

کەناڵی ناس کورد لە تێلیگرام جۆین بکە   

 

واشنتۆن پۆستی ئەمەریكی لە راپۆرتێكدا كە "ناس كورد" بەدواداچوونی بۆكردووە (8 كانونی دووەمی 2021) باس لەوە دەكات گفتوگۆی لادانی ترەمپ لە پۆستەكەی بەشێوەی فەرمی نەكراوە و هیچ ئاماژەیەكی جددی نییە هەمواری 25 دەستوری ئەمەریكا بخرێتەكار بۆ جێگرتنەوەی ترەمپ لەلایەن مایك بێنسەوە.

 

رۆژنامەكە ئەوەشی ئاشكرا كردووە ترەمپ ماوەیەكی زۆر بەرگری لە لایەنگرانی كردووە و باسی لەوەكردووە بەئاشتی ناڕەزاییان دەربڕیوە، ئەمەش نزیكەكانی ترەمپی بێزار كردووە تا دواجار و پاش 24 كاتژمێر ترەمپ ناچاربوو لەسەر رووداوی هەڵكوتانە سەر كۆنگرێس بێتە دەنگ و ئیدانەی ئەم رووداوە بكات و گقتی سزادانی ئەنجامدەرانی بدات كە چوار كوژراو و 50 بریندار و زیانێكی گەورەی لێ كەوتەوە لەسەر ناوبانگی ئەمەریكا.

 

بەرپرسانی كۆشكی سپی باس لەوە دەكەن ترەمپ لەدۆخێكی خراپدا بووە، هەرچی هەوڵدراوە لەرێگەی فۆكس نیوزەوە لێدوانێك بدات قایل نەبووە، هەر سوور بووە لەسەر تۆمەتەكانی تەزویركردنی هەڵبژاردن، جگە لەوەش زۆر توڕەو نیگەرانە لە مایك بێنسی جێگری و باسی لەوەكردووە "لەپشتەوە خیانەتی كردووە" و باسی لەوەكردووە ئەو بێ وەفا بووە بەرامبەر چاكەكانی سەرۆكەكەی.

 

بەپێی واشنتۆن پۆست ترەمپ ئەوكاتە قایل بووە ئیدانەی رووداوەكە بكات و مل بۆ رادەستكردنی دەسەڵات كەچ بكات كە نزیكەكانی بەجێیانهێشتووە و هێرشیان كردووەتەسەری لە كۆنگرێسمان و بەرپرسانی كۆشكی سپی و وەزیرانی ئیدارەكەی.

 

لەوتارە تۆماركراوەكەیدا دۆناڵد ترەمپ بەو خۆپیشاندەرانەی وت کە هەڵیان کوتایە سەر کۆنگرێسی ئەمریکا "نوێنەرایەتی ئەمریکا ناکەن و باجەکەى دەدەن".   

 

باسی لەوەشکرد، "بۆ هەموو ئەوانەى کە تێوەگلاون لە کاری تێکدەرانە، پێتان دەڵێم کە ئێوە نوێنەرایەتی وڵاتەکەمان ناکەن، بەوانەش کە یاسایان شکاند دەڵێم کە باجەکەى دەدەن. بە هەڵبژاردنێکی پڕ لە فشاردا تێپەڕبووین بەڵام ئێستا پێویستە هەمووان هێمن بینەوە و ئارامی بگەڕێتەوە."  

  

لە کۆتاییدا ترەمپ وتی، "بە هاوڵاتیانیش دەڵێم خزمەتکردنی ئێوە شانازی بوو بۆم، بەوانەش کە هەوڵی سەرکەوتنی منیان دا دەڵێم، ئەزانم بێهیوا بوون بەڵام پێتان دەڵێم کە گەشتەکەمان تازە دەستپێدەکات."  

  

ئەوە لەکاتێکدا ڕۆژی چوارشەممەى ڕابردووە، ترەمپ داوایان لە هەزاران لایەنگری خۆی کرد بەرەو بینای کۆنگرێس بڕۆن وەک ناڕەزایەتییەک لەدژی ئەنجامی هەڵبژاردنەکان، خۆپیشاندەران بەربەستی پۆلیس و هێزە ئەمنییەکانیان شکاند و هەڵیانکوتایە سەر بینای کۆنگرێس بۆ یەکەمجار لە مێژووی ئەمریکادا، گرژی و ئاڵۆزی لەناو بینای کۆنگرێسدا دروست بوو.