گه‌ڕان

Shadow Shadow
سیاسه‌تی

مەسرور بارزانی ئیدانەى هێرشکردنە سەر گەشتیارانی لە هەولێر کرد

2021.01.02 - 21:05
App store icon Play store icon Play store icon
مەسرور بارزانی ئیدانەى هێرشکردنە سەر گەشتیارانی لە هەولێر کرد

ناس کورد-

مەسرور بارزانی، سەرۆکى حکومەتی هەرێم ئیدانەی ڕووداوی هێرشکردنە سەر گەشتیارانی ناوەڕاست و باشوری عێراقی لەلایەن چەند گەنجێکەوە لە هەولێر کرد و ڕایگەیاند، "هەرکەس و لایەنێک هەوڵی شێواندن و ناشرینکردنی کولتووری بەرزی کۆمەڵگەکەمان بدات، ڕێکاری توندی یاسایی بەرامبەر دەگیرێتەبەر."

کەناڵی ناس کورد لە تێلیگرام جۆین بکە   

کەناڵی ناس کورد لە تێلیگرام جۆین بکە

مەسرور بارزانی لە ڕاگەیەنراوێکدا کە کۆپییەکی دەستی "ناس کورد" کەوتووە (2ی کانونی دووەمی 2020) دەڵێت، "بە داخێکی زۆرەوە لەم ڕۆژانەی دواییدا ، چەند ڕووداوێکی نەخوازرا و دوور لە هەموو دابونەریتێکی کۆمەڵگەی کوردستان ڕوویاندا و چەند کەسێکی تێکدەر و ئاژاوەگێڕ، هێرشیان کردە سەر گەشتییارانی بەغدا و پارێزگاکانی دیکەی عێراق، کە بۆ بەسەربردنی پشووی سەری ساڵ هاتوونەتە هەرێمی کوردستان. ئەم دەستدرێژیانە بە تووندترین شێوە سەرکۆنە و شەرمەزار دەکەم کە دوورن لە بەها و ڕەوشتە بەرزەکانی کۆمەڵگەکەمان. "

 

دەشڵێت، "هەرێمی کوردستان لە ساڵانی ڕابردوودا و تا ئێستاش، پەناگەیەکی ئارام بووە بۆ ملیۆنان ئاوارە و پەنابەری پارێزگاکانی عێراق و وڵاتانی دەوروبەر و هەمیشە بێ جیاوازی، دەرگای کراوەبووە بۆ میوانداری و لەباوەشگرتنیان ، هەروەها بەردەوامیش سەدان هەزار گەشتییار، ڕوویان لە هەرێمی کوردستان کردووە و بەڕێز و خۆشەویستییەوە پێشوازیان لێکراوە . بۆیە ڕووداوەکانی ئەم دواییە، نامۆن بە ڕەوشت و کولتووری لێبوردەیی و بەیەکەوەژیانی ئاشتییانە و مرۆڤدۆستانەی خەڵکی کوردستان. هەرکەس و لایەنێکیش هەوڵی شێواندن و ناشرینکردنی ئەم کولتوورە بەرزەی کۆمەڵگەکەمان بدات، ڕێکاری تووندی یاسایی بەرامبەر دەگیرێتەبەر."

 

شەوی 31ی کانوونی یەکەمی 2020، ژمارەیەک گەنج لە شاری هەولێر لە ڕێوڕەسی و ئاهەنگی سەری ساڵی نوێدا، هێرشیان کردە سەر چەند ئۆتۆمبێلێکی گەشتییارانی شارەکانی بەغدا و پارێزگاکانی دیکەی عێراق، لەسەر ڕووداوەکەش تائێستا 11 لە هێرشکاران دەستگیرکراون.

 

پەرلەمانتارێکی دەوڵەتی یاسا لە پەرلەمانی عێراق داوا لە هاوڵاتیانی ناوەڕاست و باشور دەکات سەردانی هەرێمی کوردستان نەکەن "ئەگەر بۆ کاری زۆر پێویست نەبێت" و دەڵێت، "دەستدرێژکردنە سەرگەشتیارانی عەرەب لە هەولێر نیشانەی نەزانی و ڕەگەزپەرستییە".  

 

عالیە نوسەیف، پەرلەمانتاری دەوڵەتی یاسا لە پەرلەمانی عێراق ( 2ی کانونی دووەمی 2021) لە ڕاگەیەندراوێکدا کە وێنەیەکی دەست "ناس کورد" کەوتووە ڕایگەیاند، "گرتە ڤیدیۆیی ساتی دەستدرێژکردنە سەر پاس و ئۆتۆمبێلی گەشتیارە عێراقییەکان لە ناو شاری هەولێر، ئاستی نەزانیی ڕەگەزپەرستی و تاوانکاریی نیشان دەدات".  

  

ئاماژەی بەوەشکردووە، "لە گرتە ڤیدیۆکاندا ئەوە دەردەکەوێت کە هیچ کەسێک هەوڵی ئەوە نادات ڕێگری لەو دەستدرێژییە بکرێت، ئەندامانی هێزە ئەمنییەکانیش بە شێوەیەکی زۆر گوماناوی لەو شوێنەدا نابینرێن".  

  

نوسەیف بە سەرسوڕمانەوە دەڵیت، "ئەوانەی لە هەوڵێر دەستدرێژی کراوەتە سەریان هاوڵاتی عێراقی ئاسایی بوون، خۆ سەرکردەی سیاسی نەبوون، ئەگەر ئەو ڕووداوە لە بەغدا یان هەر پارێزگایەکی دیکەی عێراق ڕووبدایە دژبە هاوڵاتییەکی کورد، ئەوا هەموو هێزە ئەمنییەکان بەوپەری دادپەروەرییەوە مامەڵەیان دەکرد و یاسایان جێبەجێ دەکرد".  

  

پەرلەمانتارەکەی دەوڵەتی یاسا ئەوەشی خستووەتەڕوو، "پارێزگاری هەولێردەڵێت، دەستدرێژکارانیان دەستگیرکردووە، بۆیە ئەگەر ئەو هەنگاوە ڕاست بێت، ئەوا دەبێت لە هەنگاوی دووەمدا ئەو هاوڵاتیانەی کە دەستدرێژی کراوەتە سەریان لە دادگاکانی بەغدا سکاڵا دژ بە تاوانباران تۆمار بکەن و تاوانبارەکانیش بگوازرێنەوە بۆ شوێنی پێشکەشکردنی سکاڵاکان".  

  

نوسەیف لە بەشێکی دیکەی ڕاگەیەندراوەکەیدا هۆشداریداوە بە هاوڵاتیانی عێراق کە سەردانی هەرێمی کوردستان نەکەن ئەگەر بۆ کاری زۆر پێویست نەبێت.