گه‌ڕان

Shadow Shadow
سیاسه‌تی

لە پەیەدەوە بۆ مەسرور بارزانی

پەیەدە وەڵامی مەسرور بارزانی دەداتەوە ’’لەبارەی خۆپیشاندانەکانەوە’’

2020.12.12 - 19:14
App store icon Play store icon Play store icon
پەیەدە وەڵامی مەسرور بارزانی دەداتەوە ’’لەبارەی خۆپیشاندانەکانەوە’’

ناس کورد-

نوێنەرایەتی پەیەدە لە باشوری کوردستان، ئەو دەنگۆیانە ڕەتدەکاتەوە، کە خەڵکی ڕۆژئاوا بە بەشداریکردن لە خۆپیشاندانەکانی هەرێمی کوردستان تۆمەتبار دەکات و دەڵێت، ئەوە بابەتێکی ناوخۆییە، ئاماژەی بەوەشكردووە، پێویستە کەس وەک تاوانبار سەیری کوردەکانی ڕۆژئاوا نەکات.

کەناڵی ناس کورد لە تێلیگرام جۆین بکە   

 

لە ڕاگەیەندراوێکدا نوێنەرایەتی پارتی یەکیتی دیموکراتی- پەیەدە، (شەممە 12ی کانونی یەکەمی 2020) ڕایگەیاند، "لە خۆپیشاندانەکانی چەند ڕۆژی ڕابردووی هەرێمی کوردستان توندوتیژی بەکارهێندرا و کوردەکانی ڕۆژئاوای کوردستانی پێ تۆمەتبارکران، بەو بیانووەش ژمارەیەکیان دەستگیرکران."

 

ئاماژەی بەوەشكردووە، " داخوازییەکانی خەڵکی باشوری کوردستان بۆ باشکردنی دۆخی ئابووری ڕەوایە و ئەمە بابەتێکی ناوخۆییە و پەیوەندیدارە بە هاووڵاتیانی باشورەوە، بەکارهێنانی توندوتیژی بۆ زیانگەیاندن بە موڵکی گشتیی پەسەند نییە، بەکارهێنانی توندوتیژییش لەلایەن هێزەکانی ئاسایشەوە دۆخەکە ئاڵۆزتر دەکات."

 

نوێنەرایەتی پەیەدە ئەوەشی خستووەتەڕوو، " پێویستە کەس بە چاوی تاوانبار سەیری کوردەکانی ڕۆژئاوای کوردستان نەکات، ئارامی باشوری کوردستان ئەرکی هەموو ئەو کەسانەیە لەوێ دەژین، بۆیە پێویستە لە توندوتیژیی دوور بکەونەوە، داوا لە هەمووان دەکەین کە خاوەنداری لە گیانی بەرپرسیارێتی و هاوکاریی بکەن تا ئەم دۆخە ئاڵۆزە تێبپەڕێت."

 

ئەوەش لەکاتێكدایە، لەچەند ڕۆژی ڕابردوودا و دەربارەی خۆپیشاندانەکانی هەرێمی کوردستان، مەسرور بارزانی، سەرۆکی حکومەتی هەرێم ڕایگەیاند، "خەڵکی سوریا لە خۆپیشاندانەکاندا بەشداریان کردووە و پشێویان ناوەتەوە."

 

رۆژى (2 کانونی یەکەمی 2020) خۆپیشاندان لەدژى دواکەوتنى موچەى فەرمانبەران و خراپى دۆخى دارایی لە سلێمانیەوە دەستیپێکرد و رۆژى دواتر خۆپیشاندانەکە گرژى لێکەوتەوە، کاتێک هێزە ئەمنییەکان هەوڵیاندا رێگرى بکەن لە دەستپێکردنەوەى خۆپیشاندان.      

  

رۆژانى دواتر خۆپیشاندان لە چەند ناوچەیەکى دیکەى سنورى پارێزگاى سلێمانى بەڕێوەچوو، رۆژى (6ى کانونى یەکەمى 2020) خۆپیشاندان لە پیرەمەگرون گرژى لێکەوتەوە و خۆپیشاندەران کۆمیتەى یەکێتى یان سوتاند و هەوڵى سوتاندنى بارەگاى پارتیاندا بەڵام لەلایەن پاسەوان و هێزێکى زۆرەوە دورخرانەوە.      

  

رۆژى (7ی کانونی یەکەمی 2020) ژمارەیەک لە خەڵکانى ناڕازیی لە سەیدساق و دەربەندیخان و کفری و کەلار و چەمچەماڵ و هەڵەبجە و چەند شارێکی ڕژانە سەر شەقام و بارەگا حزبییەکانى پارتى و یەکێتى و گۆڕان و کۆمەڵ و یەکگرتوو و چەندی بینایەکی تری حکومی لەو شارانە سوتێنران.      

  

تائێستا بە کۆی گشتی، هەشت کەس لە چەمچەماڵ، دەربەندیخان، کفری، سەیدسادق و تەکیە کوژراون، زیاتر لە 100 برینداریش لە ڕیزی خۆپیشاندەران و هێزە ئەمنییەکان تۆمار کراون.