گه‌ڕان

Shadow Shadow
سیاسه‌تی

هەولێر بەرامبەر سلێمانی!

ئیندیپێندنت باسی ڕۆڵی ئیسلامییەکان دەکات لە خۆپیشاندانەکانی هەرێمدا

2020.12.11 - 09:15
App store icon Play store icon Play store icon
ئیندیپێندنت باسی ڕۆڵی ئیسلامییەکان دەکات لە خۆپیشاندانەکانی هەرێمدا

ناس كورد-

ماڵپەڕى ئينديپێندنتی عەرەبی باسى ڕۆڵى حزبە ئيسلامیيەكان لە خۆپيشاندانەكانى پارێزگاكانى سلێمانى و هەڵەبجە دەكات و دەڵێت، لە پارێزگاكانى هەولێر و دهۆك بەهێزترن بەڵام ناتوانن هيچ شتێك بكەن و لە سلێمانى كە ئازاديەكى زياتر هەيە هەژمونيان لاوازترە.

کەناڵی ناس کورد لە تێلیگرام جۆین بکە   

 

ئينديپێندنتى عەرەبى لە ڕاپۆرتێكدا کە ناس کورد بەدواداچوونی بۆ کردووە (11ى كانونى يەكەمى 2020) بڵاويكردوەتەوە، حزبە ئيسلاميیەكانى هەرێمى كوردستان لە پارێزگاكانى هەولێر و دهۆك هەژمونيان زياترە كە ئەو پارێزگايانە هەڵگرى ئاڕاستەيەكى ئايينى زياترن، بەڵام كۆنتڕۆڵى دامەزراوە ئەمنيیەكان و ڕۆڵى عەشايەرەكانى لە دامەزراوە ئەمنى و سياسى و خزمەتگوزاريەكاندا، ڕێگرە لەبەردەم هەر جوڵە و خۆپيشاندانێكی ئەوان لەو ناوچانە.



بەپێى ڕاپۆرتەكە، هەولێر و دهۆك وەك پارێزگاى سلێمانى نين كە سيمايەكى زياتر عەلمانى هەيە و تەنها لەلايەن حزبێكەوە كۆنترۆڵ نەكراوە، هەژمونەكە دابەش بووە بەتايبەتى لە نێوان يەكێتى و گۆڕاندا، پارتى هيچ ڕۆڵێكى نييە و ئەوەش بووەتە هۆى ئەوەى زۆربەى خۆپيشندانەكان لەو ناوچەيە بن.



ئينديپێندنت لە درێژەى ڕاپۆرتەكەدا باسی لەوەکردووە، ئەوەش واى كردوە حزبە ئيسلاميیەكان لەچوارچێوەى خۆپيشاندانەكان جوڵەى خۆيان بكەن، بەڵام لە چوارچێوەيەكى گشتيدا و دروشمە ئايينيەكان ياخود تاييفيەكان بەرزناکرێنەوە، بەڵکو زۆرينەى دروشمەكان كۆتايى هێنان بە گەندەڵى و دۆزينەوەى چارەسەر بۆ قەيرانى ئابوريى و موچەيە، هەروەها دەزگاكانى ڕاگەياندنيش بەكاردەێنن بۆ هاندان و پشتگيریكردنى خۆپيشاندانەكان.

لاى خۆيەوە ياسين تەها نوسەر و ڕۆژنامەنوس بە ماڵپەڕەكەى وتووە، حزبە ئيسلامیيەكان لە خۆپيشاندانەكاندا بەشدارن بەڵام قەبارەى بەشداريكردنیان نازانرێت، لەبەر ئەوەى بنكەى جەماوەرى ئەو حزبانە وەك سەرجەم حزبەكانى تر كێشەى هەيە.

هێماى بۆ ئەوەشكردوە، حزبە ئيسلامييەكان بەشێكن لە ديمەنى سياسى و كۆمەڵايەتى لە كوردستان و چونەتە ناو ئەو قوڵاييانەى كۆمەڵگەوە كە دەگمەنە حزبە نيشتمانى و عەلمانى و چەپەكان و ئەوانى تريش بتوانن بچنە ناويەوە، وەك چاودێرى بێ سەرپەرشتان و گروپە خێرخوازيەكان و مزگەوت و چەندين شوێنى تر.

ئەو نوسەرە پێشى وايە، بونى حزبە ئيسلامييەكان لە ڕيزەكانى خۆپيشاندەراندا لە بەرژەوەندى دەسەڵاتدايە، چونكە دەتوانن لەو ڕێگەيەوە قسەيان لەگەڵدا بكەن لەپێناو دوركەوتنەوە لە تێكدان و زيانگەياندن بە موڵك و ماڵى گشتى و ڕێكخستنى خۆپيشاندانەكان.

 

رۆژى (2 کانونی یەکەمی 2020) خۆپیشاندان لەدژى دواکەوتنى موچەى فەرمانبەران و خراپى دۆخى دارایی لە سلێمانیەوە دەستیپێکرد و رۆژى دواتر خۆپیشاندانەکە گرژى لێکەوتەوە، کاتێک هێزە ئەمنییەکان هەوڵیاندا رێگرى بکەن لە دەستپێکردنەوەى خۆپیشاندان.

 

رۆژانى دواتر خۆپیشاندان لە چەند ناوچەیەکى دیکەى سنورى پارێزگاى سلێمانى بەڕێوەچوو، رۆژى (6ى کانونى یەکەمى 2020) خۆپیشاندان لە پیرەمەگرون گرژى لێکەوتەوە و خۆپیشاندەران کۆمیتەى یەکێتى یان سوتاند و هەوڵى سوتاندنى بارەگاى پارتیاندا بەڵام لەلایەن پاسەوان و هێزێکى زۆرەوە دورخرانەوە.

 

رۆژى (7ی کانونی یەکەمی 2020) ژمارەیەک لە خەڵکانى ناڕازیی لە سەیدساق و دەربەندیخان و کفری و کەلار و چەمچەماڵ و هەڵەبجە و چەند شارێکی ڕژانە سەر شەقام و بارەگا حزبییەکانى پارتى و یەکێتى و گۆڕان و کۆمەڵ و یەکگرتوو و چەندی بینایەکی تری حکومی لەو شارانە سوتێنران.

 

تائێستا بە کۆی گشتی، هەشت کەس لە چەمچەماڵ، دەربەندیخان، کفری، سەیدسادق و تەکیە کوژراون، زیاتر لە 100 برینداریش لە ڕیزی خۆپیشاندەران و هێزە ئەمنییەکان تۆمار کراون.