گه‌ڕان

Shadow Shadow
سیاسه‌تی

وردەکاریی

یەکەم هەڵوێستى پەکەکە لەبارەى ’’تێوەگلانى’’ لە خۆپیشاندانەکان

2020.12.10 - 16:11
App store icon Play store icon Play store icon
یەکەم هەڵوێستى پەکەکە لەبارەى ’’تێوەگلانى’’ لە خۆپیشاندانەکان

ناس کورد-

 

کۆمیتەى پەیوەندییەکانی دەرەوەى کۆما جڤاکێن کوردستان (کەجەکە) تۆمەتبارکردنى پەکەکە بە تێوەگلانى لە توندوتیژیی خۆپیشاندانەکانى هەرێم رەتدەکاتەوە و دەڵێت سوتاندنی بارەگا قبوڵ ناکرێت.

کەناڵی ناس کورد لە تێلیگرام جۆین بکە   

 

کۆمیتەکە لە راگەیەنراوێکدا (10 كانونى یەکەمى 2020) کە وێنەیەکى دەست "ناس کورد" کەوتووە ئاماژەى بەوەکردووە، "هەندێک لە دەزگاکانی راگەیاندنی سەر بە پەدەکە ماوەى چەند رۆژێکە هەوڵ دەدەن، ئەو رووداوە توندوتیژییانە، کە لە  باشووری کوردستان لە ناڕەزایەتییەکاندا روویانداوە، بخەنە ئەستۆی بزووتنەوەکەومان. ئەو کەس و لایەنانەى ئەو جۆرە پڕوپاگەندانە دەکەن، بە ئەنقەست گەل لە دژی یەکتر دنە دەدەن و بەوەش خزمەت بە قوڵترکردنەوەى قەیرانەکە دەکەن". 

 

جەختیشیکردووەتەوە، "ئەو روودانەى ئەمدواییە، کە سوتاندنی بارەگای هەندێک حیزب و دام و دەزگای فەرمیی لێکەوتەوە قبوڵ ناکرێن و تەنها خزمەت بە دوژمنانی کورد دەکات".

 

کەجەکە هەروەها توندوتیژی و هێرشی چەکداری بۆ سەر خۆپیشاندەران ئیدانە دەکات و دەڵێت "داواکانی گەل رەوان و دەبێت بە خێرایی لە رێگەی دیموکراتیکەوە چارەسەر بکرێن".

 

رۆژى (2 کانونی یەکەمی 2020) خۆپیشاندان لەدژى دواکەوتنى موچەى فەرمانبەران و خراپى دۆخى دارایی لە سلێمانیەوە دەستیپێکرد و رۆژى دواتر خۆپیشاندانەکە گرژى لێکەوتەوە، کاتێک هێزە ئەمنییەکان هەوڵیاندا رێگرى بکەن لە دەستپێکردنەوەى خۆپیشاندان.  

  

رۆژانى دواتر خۆپیشاندان لە چەند ناوچەیەکى دیکەى سنورى پارێزگاى سلێمانى بەڕێوەچوو، رۆژى (6ى کانونى یەکەمى 2020) خۆپیشاندان لە پیرەمەگرون گرژى لێکەوتەوە و خۆپیشاندەران کۆمیتەى یەکێتى یان سوتاند و هەوڵى سوتاندنى بارەگاى پارتیاندا بەڵام لەلایەن پاسەوان و هێزێکى زۆرەوە دورخرانەوە.  

  

رۆژى (7ی کانونی یەکەمی 2020) ژمارەیەک لە خەڵکانى ناڕازیی لە سەیدساق و دەربەندیخان و کفری و کەلار و چەمچەماڵ و هەڵەبجە و چەند شارێکی ڕژانە سەر شەقام و بارەگا حزبییەکانى پارتى و یەکێتى و گۆڕان و کۆمەڵ و یەکگرتوو و چەندی بینایەکی تری حکومی لەو شارانە سوتێنران.  

  

تائێستا بە کۆی گشتی، حەوت کەس لە چەمچەماڵ، دەربەندیخان، کفری، سەیدسادق و تەکیە کوژراون، زیاتر لە 100 برینداریش لە ڕیزی خۆپیشاندەران و هێزە ئەمنییەکان تۆمار کراون.