گه‌ڕان

Shadow Shadow
سیاسه‌تی

وردەکاریى

فیشەكێكى بارەگا شاییەكەی سەربەستی كردە ماتەم و شیوەن

2020.12.09 - 17:34
App store icon Play store icon Play store icon
فیشەكێكى بارەگا شاییەكەی سەربەستی كردە ماتەم و شیوەن

 ناس کورد-

خێزانی سەربەست عوسمان لە دەربەندیخان، تازە لەسەربانى خانووەكەیان ژوورێكیان جیا كردبوویەوە, تا بیكەنە نۆ ماڵ بۆی و ئيتر بچێتە ژیانی هاوسەرگیرییەوە، بەڵام گولەیەك لەتاریكایی شەودا گۆڕی تەنگ و تاری كردە دوا ئارامگای جەستەی خوێناويی ئەو.

 

 

کەناڵی ناس کورد لە تێلیگرام جۆین بکە   

سەربەست ـ 26 ساڵ ـ كە دانیشتووی دەربەندیخان بوو، بەرۆژ بە مانگانەی 200 هەزار دیناری چاپ، كرێكاری پاكەوانی نەخۆشخانەی فریاكەوتنی دەربەندیخان بوو، بەشەوانیش خۆێندكاری قوتابخانەی ئێواران و لەهەوڵی تەواوكردنی قۆناغەكانی خوێندندا بوو.

 

ئەو كارمەندانەی لە نەخۆشخانە مامەڵەیان لەگەڵدا كردووە بۆ "ناس كورد" یان روونكردەوە "كوڕێكی بێدەنگ و ئیشكەر بوو، گیانی هاوكاری زۆری تێدابوو، هەر ئەركێكی پێ بسپێردرایە بێدەنگ و بەبێ كێشە بەدڵسۆزی رایدەپەڕاند"، بەر لەوەشی بە گولەی خۆپیشاندان ماڵئاوایی بكات رۆژەكەی زیاتر سەرقاڵی گۆڕینی بوتڵی ئۆكسجین بوو بۆ ئەو نەخۆشانەی لە نەخۆشخانەی روویان لە نەخۆشخانەی شەهید تۆفیقی دەربەندیخان كردبوو.

 

سەنگەری برای سەربەست كە هێشتا شۆكی هەواڵی كوژرانی براكەیەتی، بۆ "ناس كورد" ی روونكردەوە؛ سەربەست خەریكی یاری ئەلەكترۆنیی مۆبایل بووە، كاتێكیش شەوی 7/ 8 كانونی یەكەمی 2020، هەراو قاڵەی خۆپیشاندان دەستی پێكردووە، ئەمیش وەك گەنجەكانیتری هاوتەمەنی چووەتە ناو قەرەباڵغییەكە "لەكاتێدا ئەو كەسێكی كەمدوو هێمن بوو".

 

ماڵی سەربەست خۆیان بە سەربەخۆ دەناسێنن "كوڕەكەشمان هیچ كات سەر بەهیچ حیزب و كۆمەڵێك نەبووە، هێشتاش نازانین چۆن چووە بۆ خۆپیشاندان چونكە هەمیشە حەزی لە هێمنی بوو، زۆر كەمیش دەچووە ناو قەرەباڵغیی".

 

لە دیواری هەژمارەكەی سەربەست لە فەیسبوك جگە لە گرنگیدان بەوەرزش و هەندێ پەندی پێشینان و چەند گرتەیەكی وتاری ئاینی و هەندێ شیعری شێركۆ بێكەس، هیچ كۆمێنت و پۆستێكی سیاسی نییە، جیاواز لە زۆربەی گەنجانیتری هاوڕێی سێڵڤی و وێنەكانی پرۆفایلەكەشی زۆر كەمن و سەرجەمیان هۆگریی زۆری ئەو بە دەربەندیخان و بەنداوەكە و سروشتی قەراغی سیروانەوە دەردەخەن.

 

جگە لەو كرێكارییەی بۆ كۆمپانیای پاككەرەوەی دەكرد بە رۆژانەی 6_7 هەزارێك، هیچ كارێكیتری نەبووە و بەخوێندنەوە سەرقاڵ بوو، "هەر ئەمەش وایكرد بچێتە ناو خۆپیشاندان". براكەی وای وت.

 

كاتێك هەواڵ دراوە بەماڵ كە سەربەست كە بەركەوتووە لە خۆپیشاندانی بەردەم بارەگا حیزبییەكانی دەربەندیخان، كاتژمێر 11 شەو بوو، سەنگەری برای دەڵێت "كەچوین فیشەكێك لە شانییەوە تا سەر سنگی چوبوو، دیارە لە بەرزاییەوە پێوەی نراوە و بەئەنقەستیش".

 

ماڵی سەربەست كە دڵ پڕ و تازێباری كوڕە جوانە مەرگەكەیانن وەك خێزانی قوربانییەكانیتر داواكاری لێپێچینەوەن لە تەقەكەران, لەلایەكیتریشەوە هێشتا بڕوا ناكەن لە چاوتروكانێكدا و بەبێ هیچ پێشەكییەك بۆ هەتا هەتایە كوڕەكەیان لەچاو ون بوو.