گه‌ڕان

Shadow Shadow
سیاسه‌تی

وردەکاریى

لێدوانى برای ئەو پێشمەرگەیەی پارتی کە لە خۆپیشاندانەکەى پێنجوێن کوژرا 

2020.12.09 - 16:29
App store icon Play store icon Play store icon
لێدوانى برای ئەو پێشمەرگەیەی پارتی کە لە خۆپیشاندانەکەى پێنجوێن کوژرا 

ناس کورد-

برایەکی ئەو پێشمەرگەیەی پارتی کە لە خۆپیشاندانەکانی قەزای پێنجوێن لەناوچەی پارتی بەهۆی "بەرکەوتنی فیشەک"ەوە گیانی لەدەستدا ڕایگەیاند "براکەم بەبێ تاوان شەهید کراوە و دوو رۆژی دیکە خۆپیشاندان کۆتایی دێت بەڵام براکەم بۆ هەتا هەتایە لەدەستداو دوو منداڵ کێ بەخێوی بکات"؟.

 

کەناڵی ناس کورد لە تێلیگرام جۆین بکە   

ئامانج تاڵب، لە پرسەی براکەیی و لە میانی چاوپێکەوتنێکی تەلەفزیۆنی (9ی کانونی یەکەمی 2020) کە "ناس کورد" بینیویەتى رایگەیاند "ئاوات-ی برام لە دایکبووی 1988ەو خاوەنی دوو منداڵە و کاتژمێر 7:30 خولەکی شەوی رابردوو شەهید کراوە".

 

باسی لەوەشکرد، "براکەم بەبێ ئەوەی هیچ تاوانێک و هەڵەیەکی کردبێت شەهید کراوە، خۆپیشاندان ئاوا ناکرێت، ئێمە تاوانمان چییە، من بۆ خۆم دوو مانگە مووچەم وەرنەگرتووە و یەک دینارم لە گیرفاندا نییە، خۆپیشاندانەکان دوو رۆژی دیکە بەردەوام دەبێت، بەڵام من براکەم بۆ هەتاهەتایە لەدەستداو ئەو دوو منداڵە کێ بەخێویان بکات"؟.

 

رۆژى (2 کانونی یەکەمی 2020) خۆپیشاندان لەدژى دواکەوتنى موچەى فەرمانبەران و خراپى دۆخى دارایی لە سلێمانیەوە دەستیپێکرد و رۆژى دواتر خۆپیشاندانەکە گرژى لێکەوتەوە، کاتێک هێزە ئەمنییەکان هەوڵیاندا رێگرى بکەن لە دەستپێکردنەوەى خۆپیشاندان. 

  

رۆژانى دواتر خۆپیشاندان لە چەند ناوچەیەکى دیکەى سنورى پارێزگاى سلێمانى بەڕێوەچوو، رۆژى (6ى کانونى یەکەمى 2020) خۆپیشاندان لە پیرەمەگرون گرژى لێکەوتەوە و خۆپیشاندەران کۆمیتەى یەکێتى یان سوتاند و هەوڵى سوتاندنى بارەگاى پارتیاندا بەڵام لەلایەن پاسەوان و هێزێکى زۆرەوە دورخرانەوە. 

 

رۆژى (7ی کانونی یەکەمی 2020) ژمارەیەک لە خەڵکانى ناڕازیی لە سەیدساق و دەربەندیخان و کفری و کەلار و چەمچەماڵ و هەڵەبجە و پێنجوێن چەند شارێکی ڕژانە سەر شەقام و بارەگا حزبییەکانى پارتى و یەکێتى و گۆڕان و کۆمەڵ و یەکگرتوو و چەندی بینایەکی تری حکومی لەو شارانە سوتێنران. 

  

تائێستا بە کۆی گشتی، شەش خۆپیشاندەر لە چەمچەماڵ، دەربەندیخان، کفری، سەیدسادق و تەکیە و کادیرێکی ناوچەی پێنجوێنی پارتیش کوژراون، هاوکات نزیکەى 100 بریندار لە ڕیزی خۆپیشاندەران و هێزە ئەمنییەکان تۆمار کراون.