گه‌ڕان

Shadow Shadow
سیاسه‌تی

سەرەتای کەرتبوونی حەشدی شەعبی

رۆژنامەکەى حیزبوڵڵا: سەرەتاى کەرتبوونى حەشدى شەعبى دەرکەوتووە

2020.12.05 - 20:09
App store icon Play store icon Play store icon
رۆژنامەکەى حیزبوڵڵا: سەرەتاى کەرتبوونى حەشدى شەعبى دەرکەوتووە

ناس کورد-

بە بیانووی كەمی هاوكاریی دارایی، پڕچەک نەکردن و شاردنەوەی رۆڵی جەنگاوەرانی لە شەڕی دژی داعش، گروپەكانی حەشدی سەر بە مەزارەكانى نەجەف و کەربەلا ئامادەکاری دەکەن بۆ جیابوونەوە لە دەستەی حەشدی شەعبی

کەناڵی ناس کورد لە تێلیگرام جۆین بکە   

 

بەگوێرەی ڕاپۆرتێکی رۆژنامەی "ئەخباری"ی لوبنانی سەر بەحیزبوڵڵا, کە "ناس کورد" بە دواداچوونی بۆکردووە (شەممە 5 کانوونی یەکەمی 2020) ئاماژە بەوەکراوە، "مەیسەم زەیدی، فەرماندەی چوار گروپە چەکدارەکەی سەر بە مەزارەکان، دەیەوێت دیدی جیبابوونەوەی ئەو چوار گروپە لە دەستەی حەشدی شەعبی لەسەر بنەمایەکی یاسایی بهێنێتە دی کە پشت ئەستوورە بە بڕیارێکی سەرۆک وەزیرانی پێشووی عێراق، عادل عبدولمەهدی، کە تێیدا ڕێگەی دابوو بە جیابوونەوەی گروپە چەکدارەکانى پەیوەست بە مەزارەکانى سەر بە مەرجەعیەتى عەلى سیستانی. "

 

ڕاپۆرتەکە ئاماژەی بەوەکردووە، " لەسەرەتای ئەم مانگە، لە ژێر دروشمی (حەشدی مەزارەكان لە ئامێزگری فەتوا و بونیادنەری دەوڵەت) كۆنگرەیان بەست، بەستنی کۆنگرەکە لە کاتێکدایە، حەشدی وەلائی سەر بەسوپاى پاسدارانى ئێران, هیچ بەشدارییەکیان لەم کۆنگرەیەدا نەبووە."

پەیامی سەرەتا و كۆتایی كۆنگرەی حەشدی مەزارەكان جەختكردنەوەیە لەسەر پابەندبوونیان بە فەتوای جیهادی كیفائی مەرجەعیەت بۆ رووبەڕووبوونەوەی داعش لە ژێر ئاڵای دەوڵەت نەك پارتەكان، هەروەها وێنەى کەسیشیان بەرز نەکردوسەتەوە و دژى بەشداریکردنى کادرەکانیشیانن لە خۆپاڵاوتن بۆ هەڵبژاردنەکان.

 

ڕۆژنامە لوبنانییەکە، ئەوەشی خستووەتەڕوو، " كۆنگرەی حەشدی مەزارەكان سەرەتایەكە بۆ پێكهێنانی حەشدێكی نوێ كە ملكەچی فەرمانەكانی فەرماندەی گشتی هێزە چەكدارەكان و مەرجەعیەتی ئایینی بێت لەعێراق و خۆى لە حەشدى ئێرانى بەدوور بگرێت. "

 

باس لەوەشکراوە، "گروپەكانی حەشدی مەزارەكان پێیانوایە ئەو ئەرکەی لە ئۆپەراسیۆنەکانی ئازادکردندا کێشاویانە بەبا دەچن، یان تێکەڵی ئەو شکست و پێشێلکارییانە دەکرێن کە لەلایەن هەندێ گروپی چەکدارەوە پێش و پاش ئۆپەراسیۆنەکانی ئازادکردن ئەنجامدراون. لەبەر ئەمە، ئەو چوار گروپە  لە نێو گەردەلوولێکی لایەنداریی سیاسیی و ئاینی بۆ هەندێ لایەن لە دەرەوەی عێراق، خۆیان بە نامۆ هاتە بەرچاوان".

 

ئاماژە بەوەشکراوە، "دیارترین شتێک کە حەشدی مەزارەکان جیادەکاتەوە مانەوەیانە لەنێو سنوری عێراق و گوێڕایەڵییانە لە ڕووی ئەمنی و ئاینییەوە بۆ بڕیارەکانی مەرجەعییەتی باڵاى شیعە. ئەمەش دەیانخاتە دەرەوەی بازنەی تۆمەتباربوون بە لایەنداریی حیزبی و باوەڕداری بۆ مەرجەعیەتی بێگانە، بە تایبەتی ئێرانییەکان.

 

بەگوێرەی ڕۆژنامە لوبنانییەکە، " رێگەی گواستنەوەی حەشدی مەزارەكان بۆ سەر وەزارەتی بەرگری دەبێت، ئەم هەنگاوەش ئامادەكاری بۆ كراوە و زیاتر لە جارێكیش ئاماژەی پێدراوە، پێشدەچێت هەنگاوی داهاتووی حەشدی مەزارەكان، تواندنەوەی پێكهاتەكانی بێت لە نێو دامەزراوەی سەربازی."

 

 لە 13ی حوزەیرانی ساڵی 2014 دەیان هەزارعێراقی بەدەم فەتوای عەلی سیستانی، مەرجەعی باڵای شیعەی عێراقەوە چوون بۆ هاوكاریكردنی هێزە ئەمنییەكان و بەرەنگاربوونەوەی داعش كە رووبەرێكی فراوانی لە خاكی عێراق كۆنتڕۆڵكردبوو، بەمەش یەكێتیی گروپە چەكدارەكانی شیعە فراوانتر بوو.

 

بەڵام ئەوانەی بەدەم داواكەی سیستانییەوە چوون و بۆ رووبەڕووبوونەوەی داعش چەكیان هەڵگرت نەچوونە نێو هێزە فەرمییەكان، بەڵكو چوونە نێو ئەو گروپە چەكدارانەی پێش پێكهێنانی حەشدی شەعبی هەبوون، لەوانەش كەتائیبی حیزبوڵڵا، عەسائیبی ئەهلی حەق و رێكخراوی بەدر، كە هەموویان لە ئێرانەوە نزیكن.

 

لەبەرامبەردا گروپەکانی حەشدی مەزارەكان كە فیڕقەی ئیمام عەلی، لیوای عەلی ئەكبەر، فیڕقەی عەباس و لیوای ئەنساڕی مەرجەعیەت بوون چوونە نێو یەكێتیی شیعە چەكدارەكانی حەشدی مەزارەكان.