گه‌ڕان

Shadow Shadow
سیاسه‌تی

دەروازەی سنوریی پەروێزخان

ڕۆژانە 700 بارهەڵگر لە دەروازەی سنوریی پەروێزخانەوە داخڵی عێراق دەبن

2020.12.01 - 22:20
ڕۆژانە 700 بارهەڵگر لە دەروازەی سنوریی پەروێزخانەوە داخڵی عێراق دەبن

ناس كورد-

قائیمقامی شاری قەسر شیرینی سەربە پارێزگای کرماشانی ئێران ڕایگەیاند، پڕۆسەی ئاڵۆگۆڕکردنی بازرگانیی و هاتوچۆی هاووڵاتیانی عێراق و ئێران لەهەردوو دەروازە سنوریی مونزرییە و پەڕوێزخانی نێوان هەردوو وڵات بەردەوامە، ئاماژەی بەوەشکرد، ڕۆژانە تەنها لە دەروازەی پەروێزخان زیاتر لە 700 بارهەڵگر داخڵی عێراق دەبن

 

موراد عەلی تاتار، قائیمقامی شاری قەسرشیرینی سەر بە پارێزگای کرمانشانی ئێران لە لێدوانێکی ڕۆژنامەوانیدا بۆ ئاژانسی "ئێرنا"ی ئێرانی کە "ناس کورد" بەدواداچوونی بۆکردووە (سێشممە 1ی کانوونی یەکەمی 2020) ڕایگەیاند، "لەسەروبەندی بڵاوبوونەوەی ڤایرۆسی کۆرۆنا، تەنها بۆ یەک ڕۆژێش دەروازەی سنوریی پەروێزخان بەڕووی ئاڵۆگۆڕکردنی بازرگانی و هاتووچۆی هاووڵاتیاندا دانەخراوە".

 

وتیشی، "لە ئێستادا ڕۆژانە زیاترلە 700 بارهەڵگر لە دەروازەی سنوریی پەروێزەخانەوە داخڵی عێراق دەبن و نزیکەی 300 بارهەڵگری دیکەش لە دەروازەی سنوریی مونزییەوە بارەکانیان دەگوێزنەوە بۆعێراق".  

 

تاتار، ئەوەشی خستووەتەڕوو، "لەژێر ڕێکاری تەندروستی توند دا ڕۆژانە بەهەزاران هاووڵاتی هەردوو وڵات لەو دوو دەروازە سنورییەوە هاتووچۆ دەکەن".

 

درێژی سنوری شاری قەسرشیرین لەگەڵ عێراق نزیکەی 186 کیلۆمەترە، عێراقیش لەو نێوانەدا دوو دەروازەی سنوری لەگەڵ وڵاتی ئێراندا هەیە کە ئەوانیش هەردوو دەروازەی سنوریی پەروێزخان کە دەکەوێتە سنوری ئیدارەی گەرمیان و مونزرییە کە دەکەوێت سنوری قەزای خانەقینی سەربەپارێزگای دیالە.