گه‌ڕان

Shadow Shadow
سیاسه‌تی

وردەکاری بزانە

خالید شوانی: من باسی پەرلەمانتاری کوردی ڕیش درێژم نەکردووە

2020.11.30 - 22:16
خالید شوانی: من باسی پەرلەمانتاری کوردی ڕیش درێژم نەکردووە

ناس کورد-

خالید شوانی، وەزیری هەرێم بۆ کاروباری بەغدا ڕایگەیاند، ئەوەى لە تۆڕە کۆمەڵایەتییەکان بڵاوبووەتەوە "کە گوایە من وتوومە عەمار حەکیم وتوویەتی پەرلەمانتارێکی کوردی ڕیشن وەک ئاماژە بۆ ئەحمەدی حاجی ڕەشید (ئەندامی فراکسیۆنى کۆمەڵ لە بەغدا) داوای بڕینی بودجەى هەرێمی کردووە دورە لە ڕاستییەوە." 

 

خالید شوانی لە ڕونکردنەوەیەکیدا لە پەیجی فەیسبوکی خۆی کە ناس کورد بەدواداچوونی بۆ کردووە (30ی تشرینی دووەمی 2020) دەڵێت، "لە هەندێ سایتی ئەلیکترۆنی و پەیج و ئەکاونتی تۆڕە کۆمەڵایەتێکان هەواڵێک بڵاوبووەتەوە بەناوی بەڕێزێک بەناو بەهمەن کاکە عەبدوڵا و لە لێدوانەکەیدا ناوی بەندەی هێناوە وگوایە من وتبێتم سەید عەمار الحکیم پێی ڕاگەیاندووین کە پەرلەمانتارێکی کوردی ڕیشن وەک ئاماژەیەک بۆ بەڕێز ئەحمەدی حاجی ڕەشید داوای بڕینی بودجەی هەرێمی کوردستانی کردبێ."

 

دەشڵێت، "بەم ڕوونکردنەوەیە ئەمەوێ بۆ ڕای گشتی ڕوونی بکەمەوە کە بەندە هەرگیز لەگەڵ ئەو پەرلەمانتارە (بەهمەن کاکە عبدالڵە ) دانەنشتووم و قسەی دوو بە دووم لەگەڵی نەکردوە وباسی ئەم ڕووداوەم نەکردوە کە ئەو ئەیگێرێتەوە، و رێز و تەقدیریشم بۆ کاک ئەحمەدی حاجی ڕەشید هەیە."

 

دەشڵێت، "داواکارم هیچ کەس ولایەنێک ناوی ئێمە بەکار نەهێنێت لە ململانێ حێزبێکان کە مەبەستیان دەسکەوتی حیزبیە ، کە من خۆم بەرژەوندی میلەتەکەم و نیشتمانەکەم ئەخەمە سەرووی بەرژەوەندی حیزبیەوە." 

 

هاوکات ئەحمەدی حاجی ڕەشید لە فەیسبوکی خۆی نوسیویەتی، "تکایە پارتی بە کۆیلەکانتان بڵێن بەسە درۆکردن، چونکە درۆ بووەتە سیمای هەمووتان."

 

لە نوسینێکیدا لە فەیسبوکی خۆی کە ناس کورد بەدواداچوونی بۆ کردووە، ئەحمەد حاجی ڕەشید دەڵێت، "خالد شوانی رونکردنەوەیەکی داوە سەبارەت بە لێدوانیک کەباسی منی تێدا هاتوە کە بە عەمار حەکیمم وتبێت موچەی کوردستان ببڕن، برای بەرێزم کاک خالد سەبارەت بە من پێویستی بە ڕونکردنەوە نەدەکرد چونکە بەڕێزتان کەسێکی بەرێز و بەئەزمون دڵسۆزێکی ئەم نیشتیمانەن و سەردەمی سەرۆکایەتی بەڕێزتان بۆ لێژنەی یاسایی پەرلەمانی فیدڕاڵ سەردەمێکی زێڕین بوە و بۆ ئێمەی خولەکانی دواتر بویتەتە جێگەی شانازی."

 

باسی لەوەش کردووە، "حەیف کە ئێستە دانوستان بۆ ئەو گروپە دەکەیت کە هەموو کورد ناگۆڕنەوە بە بەرمیلێک نەوت و مێژووی پڕ سەروەریت لەکەدار دەکەن، من لە ماوەی 2017ەوە تا ئێستا کە دەچینە 2021 دووجار سەید عمار الحکیمم بینوە."