گه‌ڕان

Shadow Shadow
سیاسه‌تی

لیژنەیەک دێتە هەرێم

پارتی: بۆ چارەسەرکردنی کێشەکان لیژنەیەک لە بەغداوە دێتە هەرێم

2020.11.30 - 14:48
پارتی: بۆ چارەسەرکردنی کێشەکان لیژنەیەک لە بەغداوە دێتە هەرێم

ناس کورد-

سەرۆكی فراكسیۆنی پارتی لە پەرلەمانی عێراق ڕایگەیاند، پارتی دیموكراتی كوردستان لە گفتوگۆی بەردەوامدایە لەگەڵ بەغدا بۆ چارەسەرکردنی كێشەكانی نێوان هەرێم و عێراق، دەشڵێت، بڕیارە بەمزووانە لیژنەی چارەسەرکردنی کێسەکانی نێوان هەردوولا سەردانی هەرێم بکات.

 

د. ڤیان سەبری، سەرۆکی فراکسیۆنی پارتی لە پەرلەمانی عێراق (سێشەممە 30ی تشرینی دووەمین 2020) بە میدیای فەرمیی حزبەکەی ڕاگەیاند: " پارتی دیموكراتی كوردستان لە ھەوڵی بەردەوامدایە و بەردەوامیش گفتوگۆ لەگەڵ بەغدا دەكات، بۆ ئەوەی كێشەكانی نێوان ھەرێم و بەغدا چارە بكرێن، بە تایبەت كێشە داراییەكان و بەردەوامیش دەبین تا چارەسەر دەكرێن".

 

لەماوەی ڕابردوودا بە بڕیاری محەمەد حەلبوسی، سەرۆکی پەرلەمانی عێراق لیژنەیەکی هەشت کەسی لە پەرلەمان پێکهێنرا بۆ چارەسەرکردنی کێشەکانی نێوان هەرێم و بەغدا.

 

ڤیان سەبری دەڵێت: " لیژنەکە گفتوگۆ لەگەڵ ھەردوو حكومەتی ھەرێم و عێراق دەكەن، بۆ ئەوەی راوێژیان لەگەڵ بكەن و بتوانن بگەنە رێككەوتن، بڕیاریشە ئەو لیژنەیە بەم زووانە سەردانی ھەرێمی كوردستان بكات".

 

باسی لەوەش كردووە: "لە ھەوڵداین بۆ ئەوەی مووچەی مانگەكانی 5 و 6 و 7 و 10 بگەڕێنینەوە، چونكە ئەو موچانە پێش دەركردنی یاسای قەرزی حكومەت بوون لە پەرلەمان، بۆیە پێویستە رەوانەی بكەن و ئێستاش سەرقاڵی گفتوگۆین بۆ ھەردوو مانگی 11 و 12 بۆ ئەوەی ئەوانیش خەرج بكەن، چونكە مانگەكانی پێشوو لای حكومەتی عێراق قەرزە".

 

ئەوەش لەکاتێکدایە، لە چەند ڕۆژی ڕابردوودا ئەنجومەنی وەزیرانی هەرێم کۆبووەوە و لەدوای کۆبوونەوەکەش لە ڕاگەیەندراوێکدا ڕایگەیاند، پێویستە حکومەتی عێراق موچەی مانگەکانی 5 و 6 و 7 و 10 بۆ هەرێمی کوردستان بنێرێت.