گه‌ڕان

Shadow Shadow
سیاسه‌تی

مالکی و هەوڵی گەڕانەوە بۆ دەسەڵات

راپۆرتێكی لەندەنی: مالیكی مرازی هەیە لە تەنگەتاوكردنی كۆمپانیاكانی مۆبایل

2020.11.26 - 19:28
راپۆرتێكی لەندەنی: مالیكی مرازی هەیە لە تەنگەتاوكردنی كۆمپانیاكانی مۆبایل

ناس کورد- 

ڕۆژنامەیەکى عەرەبى ئاشکرایدەکات، نورى مالکى، سەرۆکى ئیئتلافى دەوڵەتى یاسا و سەرۆک وەزیرانى پێشووترى عێراق هەوڵى بەدەستهێنانەوەى دەسەڵات دەدات، ئەویش لەڕێگەى بەکارهێنانى محەمەد شیاع سودانى و شپرزەکردنی کابینەی ئێستای حکومەت لەڕێگەی بەکارهێنانی دۆسیەی کۆمپانیاکانی مۆبایل.

 

چاپی لەندەنی ڕۆژنامەى "العرب" لە ڕاپۆرتێکدا کە "ناس کورد" بەدواداچوونی بۆ کردووە، بڵاویکردووەتەوە، ئیئتلافى دەوڵەتى یاسا بەهۆى خراپبوونى ناوى سەرۆکەکەیەوە "نورى مالکى" ئاستى جەماوەرى دابەزیوە و ئەوەش بە ئاشکرا لە هەڵبژاردنى 2018 دەرکەوت کە ژمارەى کورسیەکانى کەمیکرد و پێشبینى ئەوەشدەکرێت لە هەڵبژاردنى پێشوەختدا کەمتریش بکات، ئەوەش بە شێوەیەکى کردارى دەیخاتە دەرەوەى هاوکێشەى دەسەڵاتەوە.



باس لەوەشکراوە، مالکى پێى وایە محەمەد شیاع سودانى ئەزمونێکی سەرکەوتووى هەیە بەتایبەتى کاتێک لە ساڵى 2014 بۆ 2018 وەزیرى کاروبارى کۆمەڵایەتى بوو لە حکومەتەکەى حەیدەر عەبادى و دەموچاوێکى گونجاوە بۆ ڕکابەرایەتیکردنى سەرۆک وەزیرانى ئێستا (مستەفا کازمى) کە بەهۆى ئەوەى سەر بە هیچ حزبێک نییە لەوانەى کە لە ساڵى 2003ەوە عێراقیان بەرەو کارەسات بردووە، جەماوەرێکى تایبەت بە خۆى هەیە.

 

ڕاپۆرتەکە هێماى بۆ ئەوەشکردووە، سودانیش لاى خۆیەوە هێرشى بۆ سەر حکومەتەکەى کازمى دەستپێکردووە و گومانى لە پاک و بێگەرى دروستکردووە و شەقامى عێراقى هەژاندووە، بەتایبەتى لە بابەتى نوێکردنەوەى گرێبەستى کۆمپانیاکانى پەیوەندى مۆبایل کە چەندین کەلێنى تێدایە و لە حکومەتەکانى پێشووەوە ماوەتەوە.