گه‌ڕان

Shadow Shadow
سیاسه‌تی

’’سائیرون و فەتح پلانەکانیان لێتێکداین’’

عەمار حەکیم بۆ پێکهێنانى هاوپەیمانێتی بەرەو هەرێم دەجوڵێت

2020.11.25 - 09:19
عەمار حەکیم بۆ پێکهێنانى هاوپەیمانێتی بەرەو هەرێم دەجوڵێت

ناس کورد-

ئەندامێکى مەکتەبى سیاسى ڕەوتەکەى عەمار حەکیم ڕایدەگەیەنێت، بۆ پێکهێنانى بەرەیەکى نوێ بۆ هاوپەیمانێتى هەموو پێکهاتەکان حەکیم بەرەو ناوچە سوننى و کوردییەکان هەنگاو دەنێت و ڕەوتەکەیان لەهەڵبژاردنى پێشوەختەدا 120 کورسى بەدەستدەهێنێت.

 

لەمیانەى بەشداریکردنى لەبەرنامەیەکى تەلەفزیۆنیدا کە ناس کورد بینوویەتى، ئەبو گەلەل، ئەندامى مەکتەبى سیاسى ڕەوتى حیکمە لە عێراق (24ى تشرینى دووەمى 2020) ڕایگەیاندووە، ڕەوتەکەیان لەدواى هەڵبژاردنى ڕابردوو هاوپەیمانێتیەکى ئەنجامدا بەڵام سەرکەوتوو نەبوو.

 

ئاماژەى بۆ ئەوەشکردووە، مێژووى عێراق شاهیدى ئەوە دەدات کە شێوازى حوکم مەزهەبگەرى نەبووە بەڵکو نیشتیمانى مەدەنى لێبراڵى عەلمانى بووە و عەمار حەکیمى سەرۆکى ڕەوتەکەشیان بۆ ناوچەکە سوننى و کوردییەکان دەچێت بەمەبەستى خستنەڕووى پڕۆژى نیشتیمانى گوزارشتکەر لەهەموو پێکهاتەکان.

 

ئەبو گەلەل داواشى کرد لەڕێگەى هاوپەیمانێتێکەوە کە گوزارشت لەهەموو پێکهاتەکان بکات لەئایندەدا کابینەیەکى دابمەزرێت دووربێت لەمەزهەبگەرایى و هاوپەیمانێتیەکیش هەبێت کە ئۆپۆزسیۆنى بێت.

 

بەرپرسەکەى ڕەوتى حیکمە باسى لەوەش کرد، هاوپەیمانى چاکسازى لەگەڵیاندا بەردەوام نەبوون و هاوپەیمانى بەننا لەسەر هاوشێوەى هاوپەیمانى چاکسازى دروستبوو بەڵام هاوپەیمانى سائیرون چوونە پاڵ هاوپەیمانى فەتح و ئەوەش بووە هۆى هەڵوەشاندنەوەى ڕەوتى چاکسازى.

 

ئەوەشى خستووەتە ڕوو، هۆکارى شکستهێنانى پڕۆژەکەیان لەئەنجامى هاوپەیمانێتیەکانى پێش هەڵبژاردن بوو بەڵام یاسایى نوێى هەڵبژاردن ڕێگە بەپەرلەمانتارێک نادات بچێتە فراکسیۆنێکى تر تا دواى پێکهێنانى کابینەکە نەبێت بۆیە پێش هەڵبژاردن ئەوان هاوپەیمانێتیەک پێکدەهێنن.

 

لەبارەى پێشبینییەکانیان بۆ بەدەستهێنانى کورسی لەهەڵبژاردنى پیشووەختەدا، ئەبو گەلەل دەشڵێت، ڕەوتەکەیان بەهاوپەیمانێتى لەگەڵ کورد و سوننەدا لەو باوەڕەدایە بتوانێت 120 کورسى بەدەستبهێنیت و لەسەر ئەو پرسەش ڕەوتى حیکمە گفتوگۆکانى لەگەڵ سوننە و کورددا دەستپێکردووە.


لەکۆتایى قسەکانیدا ئەبوگەلەل ئەوەشى ڕوونکردووەتەوە، بەبێ هاوپەیمانێتیەک بۆ هەموو پێکهاتەکان هیچ پڕۆسەیەکى سیاسى سەرکەوتوو نابێت وهاوپەیمانێتیەکەى ئەوانیش نوێنەرانى مەدەنى و چالاکانى خۆپیشاندانەکانى تشرینیش لەخۆدەگرێت.