گه‌ڕان

Shadow Shadow
سیاسه‌تی

یەکەم لە لێدوان

یەکەم لێدوانی سەرۆکی لیژنەی چارەسەرکردنی کێشەکانی بەغدا و هەولێر

2020.11.24 - 16:02
یەکەم لێدوانی سەرۆکی لیژنەی چارەسەرکردنی کێشەکانی بەغدا و هەولێر

ناس کورد-

سەرۆکی لیژنەی چارەسەرکردنی کێشەکانی بەغدا و هەرێم ڕایگەیاند، هەوڵی تەواوەتی دەدەن لەپێناو دابەشکردنی دادگەرانەی سامانی عێراق و داواش لە حکومەتی فیدڕاڵ و هەرێم و سەرکردە سیاسییەکان دەکات هاوکاریان بن بۆ چارەسەرکردنی کێشە هەڵپەسێردراوەکان.

 

محەمەد شیاع سودانی، پەرلەمانتاری دەوڵەتی یاسا لە ڕاگەیەندراوێکدا کەمێک بەرلەئێستا (سێشەممە 24ی تشرینی دووەمی 2020) ڕایگەیاند: "بەپیی ڕێککەوتن لەگەڵ سەرۆکی پەرلەمان محەمەد حەلبوسی ئەو لیژنەیە پێکهاتووە و ئامادەیی خۆی دەربڕی بۆ کۆششکردنی تەواوەتی لەپێناو مسۆگەرکردنی دابەشکردنی دادگەرانەی سامان و داهاتی عێراق."

 

سودانی کە لەکابینەى پێشوو وەزیرى کاروبارى کۆمەڵایەتى بووە و یەکێک بوو لە پاڵێوراوانى سەرۆکایەتى وەزیران لەدواى دەستلەکارکێشانەوەى عەبدولمەهدى، داواشی لە حکومەتی فیدڕاڵ و هەرێم و سەرکردەی هێزە سیاسییەکان کرد، هاوکاریان بن لە دۆزینەوەی چارەسەری ڕیشەیی کێشە هەڵپەسێردراوەکان.

 

هەروەها دەڵێت، دوای وەرگرتنی ڕای پەرلەمانتارانی کورد و لیژنە تایبەتمەندەکان سەرکەوتنی ئەم ئەرکە نمونەیەک دەبێت بۆ توانای عێراقییەکان لە چارەسەرکردنی کێشەکانی خۆیان بەبێ دەستێوەردانی دەرەکی.

 

پەرلەمانى عێراق لیژنەیەکى بۆ دانوستانى نێوان هەولێر و بەغدا پێکهێنا کە لە هەشت ئەندامى پەرلەمان پێکدێت و ئەرکى لیژنەکە دۆزینەوەى چارەسەرێکە بەگوێرەى دەستور بۆ کێشە هەڵپەسێردراوەکانى نێوان هەرێم و بەغدا.  

  

لە نوسراوێکى فەرمیدا کە واژۆى محەمەد حەلبوسى، سەرۆکى پەرلەمانى لەسەرە و وێنەیەکى دەست "ناس کورد" کەوتووە (24ى تشرینى دووەمى 2020) ئاماژە بە پێکهێنانى لیژنەیەک لە هەشت پەرلەمانتارى عێراق کراوە بۆ گفتوگۆکردن لەگەڵ حکومەتى ناوەند و حکومەتى هەرێم لەبارەى کێشە هەڵپەسێردراوەکانى نێوانیان و دۆزینەوەى ڕێگەچارەى چارەسەرکردنى کێشەکان بەگوێرەى دەستور.