گه‌ڕان

Shadow Shadow
سیاسه‌تی

’’بیانووى ناڕوون’’

یەکەم هەڵوێستى پارتى لەسەر دەستلەکارکێشانەوەى قاسم شەشۆ

2020.11.17 - 13:45
App store icon Play store icon Play store icon
یەکەم هەڵوێستى پارتى لەسەر دەستلەکارکێشانەوەى قاسم شەشۆ

ناس کورد- هەڤاڵ فەتاح

 

بەرپرسێکی پارتی رایگەیاند، هۆکاری دەستلەکارکێشانەوەکەی قاسم شەشۆ لەپارتی و پۆستە سەربازییەکەی ناڕوونە، بۆیە داوایانلێکردووە ڕوونکردنەوەیان لەو بارەیەوە پێشکەش بکات.

کەناڵی ناس کورد لە تێلیگرام جۆین بکە   

 

عیسمەت ڕەجب، بەرپرسی لقی پارتی لە نەینەوا لەلێدوانێکی تایبەتدا بۆ "ناس کورد" ( 17ی تشرینی دووەمی 2020) ڕایگەیاند "تائێستا هۆکارەکانی دەستبەرداری قاسم شەشۆ، فەرماندەی هێزەکانی پێشمەرگە لە شنگال لەپارتی و پۆستە سەربازییەکەی ناڕوونە، بۆیە داوامان لێکردووە لەو باریەوە ڕوونکردنەوەی زیاترمان بۆ بخاتەڕوو، بیانووەکانی بۆ وازهێنان لە پۆستە سەربازییەکەی و لە ڕیزەکانی پارتی دیموکراتی کوردستان ناڕوونن".

 

وتیشی "تائێستا شەشۆ ئاماژەی بە هۆکارێکی ڕوون و یەکلاکەرەوە نەکردووە بۆ وازهێنان لە پارتی، ئەگەر هۆکارە سەرەکییەکەی دانانی شێخ عەلی بێت وەک بابە شێخی ئێزیدییەکان، ئەوا دەبێت هەموو کەس بزانێت، پارتی بەهێچ شێوەیەک تێکەڵ بەو بابەتە نەبووە و بابەشێخی نوێی ئیزیدییەکان بە کۆدەنگی کۆمەڵگای ئیزیدی هەڵبژێردراوە".

 

زانیارى زیاتر.. قاسم شەشۆ دەستلەکارکێشانەوەى خۆی لە پارتی و هێزی پێشمەرگە ڕاگەیاند

 

بەرپرسەکەی پارتی ئەوەشی وت "قاسم شەشۆ، کادرێکی دڵسۆز و دێرینی پارتی دیموکراتی کوردستانە وڕۆڵی باڵای هەبوو لە شۆرشی گەلەکەمان و شوێن دەستی دیارە لە ڕزگارکردنی شنگال، بۆیە پێشبینی دەکەین لە ماوەیەکی نزیکدا جارێکی تر بگەڕێتەوە ڕێزەکانی پارتی".

 

دوای ئەوەی ڕۆژی شەممە، 14ی تشرینی دووەمی 2020، عەلی ئەلیاس حەجی ناسر، وەك بابەشێخی ئێزدییەكان دیاریكرا لە (16ی تشرینی دووەمی 2020) قاسم شەشۆ فەرماندەی هێزەکانی پێشمەرگە لە شنگال و کارگێڕی پێشکەوتووی پارتی دیموکراتی کوردستان دەستلەکارکێشانەوەى خۆی لە حیزبەکەی  و پۆستەکەى لە هێزەکانی پێشمەرگە ڕاگەیاند.

قاسم شەشۆ لە گرتەیەکی ڤیدیۆییدا کە " ناس کورد" بینوویەتی وتی، "من لەبەر خۆم عاجز نیم، چونکە هەرکاتێک موچە دێت (پارتی) 65 هەزار دۆلار بۆ من دەنێرێت، بەڵام پارتی لە دانانی بابەشێخدا من و چەندین پیاو ماقوڵی ئێزدییەکانی پشتگوێخستووە، بۆیە منیش دەستلەکارکێشانەوەى خۆم ڕاگەیاند، ئیتر لەمەودوا من کەسێکی سەربەخۆم"   .