گه‌ڕان

Shadow Shadow
سیاسه‌تی

سێ پرسی سەرەکی

ساڵح موسلیم وردەکاریی وەستانى گفتوگۆکانى تەڤدەم و ئەنەکەسە ئاشکرادەکات

2020.11.15 - 23:26
App store icon Play store icon Play store icon
ساڵح موسلیم وردەکاریی وەستانى گفتوگۆکانى تەڤدەم و ئەنەکەسە ئاشکرادەکات

ناس کورد-

ساڵح موسلیم رایگەیاند، گفتوگۆکانى نێوان تەڤدەم و ئەنەکەسە ماوەیەکە راوەستاون و هەندێ لە داواکارییەکانى ئەنەکەسە زیان لە دەستکەوتەکانى کورد دەدات و ناکرێت قبوڵ بکرێن.

 

کەناڵی ناس کورد لە تێلیگرام جۆین بکە   

ساڵح موسلیم ئەندامى دەستەى سەرۆکایەتى پەیەدە (15ی تشرینی دووەمی 2020) لە چاوپێکەوتنێکدا لەگەڵ ئاژانسى هاوار نیوز کە ناس کورد بەدواداچوونى بۆ کردووە ئاماژەى بەوەکردووە، دواى گەڕانەوەى نێوەندگیریی ئەمریکییەکان و شاندى ئەنەکەسە گفتوگۆکان بۆ یەکێتى نەتەوەیی دەستپێدەکاتەوە.

 

وتیشى"هێشتا هیچ لایەنێک دژایەتى بۆ بەردەوامى گفتوگۆ نیشاننەداوە و لێکتێگەیشتن هەیە لەسەر زۆرێک لە خاڵەکان، هەندێ پرسیش هێشتا یەکلانەکراونەتەوە".

 

ساڵح موسلیم رونیکردووەتەوە، گفتوگۆکان لەسەر سێ پرسی سەرەکین کە پێکهاتوون لە پێکهێنانى مەرجەعیەت، بەشداریى لە ئیدارەى خۆبەڕێوەبەرى، هێزە سەربازییەکان.

 

دەشڵێت، پرسی مەرجەعیەت گفتوگۆى لەسەر کراوە و لێکتێگەشتن هەیە لەبارەیەوە، بەڵام لەسەر پرسی بەشدارى لە ئیدارە ئەنەکەسە روانگەیەکى روونى نییە  و ئەو پرسە پێویستى بە کاتى زیاتر هەیە بۆ بڕیاردان لەبارەیەوە، لەسەر پرسی سەربازیش گفتوگۆکان نەگەیشتوون بە ئەنجام و بەردەوامى بە گفتوگۆ دەدرێت.

 

چەند مانگێک لەمەوبەر ئەنجومەنى نیشتیمانى کوردستان لە سوریا (ئەنەکەسە) و بزوتنەوەی جڤاتی دیموکراتیک (تەڤدەم) گفتوگۆیان دەستپێکرد بۆ گەیشتن بە رێککەوتن و چارەسەرکردنى ناکۆکییەکانیان، دواى ساڵانێکى درێژ لە ناکۆکى بەردەوام.

 

لە ڕۆژئاواى کوردستان زیاتر لە 30 حیزبى سیاسی بونیان هەیە، کە بەسەر دوو بەرەدا دابەش بوون، نزیکەى 10 حیزبیان سەر بە ئەنجومەنى نیشتیمانى کورد (ئەنەکەسە)ن و بەدارنین لە ئیدارەى ڕۆژئاواى کوردستاندا. حیزبەکانى دیکش سەر بە بزوتنەوەی جڤاتی دیموکراتیک (تەڤدەم)ن و پشتیوانى لە ئیدارەى ڕۆژئاوا دەکەن. 

 

,ئەو دوو بەرەیە ساڵانێکى زۆرە ناکۆکى قوڵ لەنێوانیاندا هەیە و لەسەر زۆربەى پرسەکان ناکۆکن، هەریەکەیان مەرجى خۆیان هەیە بۆ گەیشتن بە ڕێککەوتن.

 

 دیارترین مەرجەکانى ئەنەکەسە کە پێشتر رایگەیاند بریتین لە، ئازادکردنى زیندانییە سیاسییەکان، کۆتایی هێنان بە خزمەتى سەربازى زۆرەملێ، دروستکردنى هێزێکى نیشتیمانى، لەبەرامبەریشدا تەڤدەم چەند مەرجێکى هەیە کە دیارترینیان بریتیییە لە پچڕانى پەیوەندى ئەنەکەسە لەگەڵ تورکیا و ئۆپۆزسیۆنى سوریا.