گه‌ڕان

Shadow Shadow
سیاسه‌تی

رێڕەوى قەندیل

بۆچى شەڕ لە چەمانکێ ڕوویدا؟

2020.11.04 - 15:53
App store icon Play store icon Play store icon
بۆچى شەڕ لە چەمانکێ ڕوویدا؟

ناس کورد-تایبەت

زەنگى شەڕى ناوخۆى نێوان پێشمەرگە و پەکەکە لە ناحیەیەکى دورەدەستى ئامێدییەوە لێدرا، دواى چەند هەفتەیەک لە هەڕەشە و کۆکردنەوەى هێز لەلایەن پارتى و پەکەکەوە کە دەیانەوێ باڵادەستى خۆیان لەو ناوچە شاخاوییە سنورییە بسەپێنن.

کەناڵی ناس کورد لە تێلیگرام جۆین بکە   

بەپێی بەدواداچونەکانى ناس کورد (4ی تشرینی دووەمی 2020)، شەڕەکە نیوەڕۆى ئەمڕۆ روویداوە، دواى تەقینەوەى بۆمبێک بە ئۆتۆمبیلى هێزێکى سەر بە فەرماندەیی هەشتاى پارتى لەسنورى ناحیەى چەمانکێ کە دوو ئەفسەر و پیشمەرگەیەک برینداربوون، یەکێکیش کوژرا.

 

ناحیەى چەمانکێ دەکەوێتە باشورى قەزاى ئامێدی لە سنورى پارێزگاى دهۆک و نزیکەى 70 کیلۆمەتر لە سەنتەرى دهۆکەوە دوورە.

me_ga.php?id=1437

چەمانکێ 20 ساڵ لەمەوبەر بەفەرمى کرایە ناحیە و بووە حەوتەم ناحیەى سەر بە ئامێدى، هاوسنورە لەگەڵ ناحیەکانى دینارتە و زاوێتە و ئەتروش کە بەدرێژایی چەندین ساڵە بونەتە شوێنى روبەڕووبوونەوەى تورکیا و پەکەکە و بەبەردەوامى بوونەتە ئامانجى بۆردومانەکانى تورکیا.

 

لە ناحیەى دینارتە 10 رۆژ لەمەوبەر یەکەم پێکدادان لەنێوان پێشمەرگە و پەکەکە روویدا، بەڵام هیچ زیانێکى گیانى لێنەکەوتەوە.

 

ئەو سنورە بۆ هەریەکە لە پارتى و پەکەکە ناوچەیەکى ستراتیژییە، پارتى هەمیشە بە ناوچەى ژێر هەژمونى خۆى دایدەنێت، پەکەکەش بەردەوام جموجۆڵى تێدا بووە بەو پێیەى رێگە پێکەوە بەستنى زنجیرە چیاى گارەیە لەگەڵ قەندیل کە هەردوو شوێنەکە بە مۆڵگەى گەریلا دادەنرێن.

 

بەرپرسانى پەکەکە زیاد لە جارێک جەختیانکردووەتەوە کە پارتى دەیەوێت لەو سنورەوە رێگەى گارە بەرەو قەندیلى پێگەى سەرەکییان ببڕێت و ناوچەکانى گەریلا بەتەواوى گەمارۆ بدات، پارتیش بەردەوام جەختدەکاتەوە کە پەکەکە دەستى بەسەر ناوچەیەکى بەفراوانى ئەو سنورەدا گرتووە.

 

سەرچاوەیەکى بەرپرس لە سنورى ئامێدى بە ناس کوردى رایگەیاند "لەو سنورە پەکەکە هێزێکى زۆرى بڵاوکردووەتەوە و جموجۆڵیان هەیە، هێزى پێشمەرگەش هەروەها لەوێ جێگیرکراوە".



زۆربەى روبەرى ئەو سنورە ناوچەى شاخاوى سەخت و دارستانى چڕە، کە بەوتەى سەرچاوەکە بەو هۆیەوە بووەتە شوێنێکى لەبار بۆ خۆحەشاردانى گەریلاکانى پەکەکە لە بۆردومان و هێرشەکانى تورکیا.

 

تا ئێستا پەکەکە بەفەرمى هیچ شتێکى لەبارەى شەڕەکەى ئەمڕۆوە بڵاونەکردووەتەوە بەڵام میدیاکانى باس لەوەدەکەن کە "هەڕەشەکانی پارتى بۆ هەڵگیرسانی شەڕی ناوخۆ زیادییان کردووە، جێگیرکردنی هێزێکی تایبەتی سەر بە سەرۆکی پارتى لە هەولێرەوە تا بارزان، بەوە لێکدەدرێتەوە کە ئاماژەیەک بێت بۆ ئامادەکارییەکانی پەدەکە بۆ هەڵگیرسانی شەڕ".

 

بەڕێوەبەری ناحیەی چەمانکێ لە قەزای ئامێدی دەڵێت، لەدوای تەقینەوەی بۆمبەکە بە ئۆتۆمبێلێکی هێزەکانی پێشمەرگە، شەڕ و پێکدادان لەنێوان ئەوان و پەکەکە ڕوویداوە، سەرچاوەیەکى ئیدارییش لە ناوچەکە جەخت دەکاتەوە کە ئێستا ناوچەکە ئارام بوەتەوە و هیچ پێکدادانێکى تر رووینەداوە.  

  

ئەو سەرچاوەیە بە مەرجی بڵاونەکردنەوەی ناوەکەى بە ناس کورد (4ی تشرینی دووەمی 2020) وت، "ئەوەى روویداوە تەقینەوەى بۆمبێک بووە بە هێزێکى پێشمەرگەدا و دواتر تەقە لەو هێزە کراوە و بەهۆیەوە چەند پێشمەرگەیەک برینداربوون."  

  

هاوکات لە کۆنفرانسێکی ڕۆژنامەنوسیدا بۆ میدیاکانی حزبەکەى کە ناس کورد بەدواداچوونی بۆ کردووە، ئەلەند ئەمیر، بەڕێوەبەری ناحیەی چەمانکێ دەڵێت، لەدوای تەقینەوەی بۆمبەکە بە ئۆتۆمبێلی هێزەکانی پێشمەرگە و برینداربوونی چەند پێشمەرگەیەک، "شەڕە تەقە لەنێوان هەردوولا ڕوویداوە بەڵام هیچ زیانێکی نەبووە."  

  

دەشڵێت، هێزەکانی پێشمەرگە ویستوویانە سەردانی بنکەکانی خۆیان بکەن لە سنوری ناحیەکە، لەسەر جادەکە پەکەکە تەقینەوەی بۆ داناون و تەقیوەتەوە پێیاندا، دوای تەقینەوەش، هەندێک شەڕ و پێکدادان ڕوویداوە."  

  

جەختی کردەوە کە ئەوە یەکەمجارە "پەکەکە تەقینەوە بۆ پێشمەرگە دادەنێت."