گه‌ڕان

Shadow Shadow
سیاسه‌تی

’’نەفرەتی مێژوو’’

یەکەم هەڵویستى یەکێتى لەسەر شەڕى پەکەکە و پێشمەرگە 

2020.11.04 - 12:40
یەکەم هەڵویستى یەکێتى لەسەر شەڕى پەکەکە و پێشمەرگە 

ناس کورد-

 

حاكم قادر حەمەجان ئەندامی ئەنجومەنی باڵای سیاسی و بەرژەوەندی یەكێتی رایگەیاند، نەفرەتی مێژوو لە " ئەمڕۆ و داهاتوو" لەوانەیە كە بیر و مەرامیان شەرعیەتدانە بە براكوژی.

 

حاكم قادر لەلاپەڕەى خۆى لە فەیسبوک کە ناس کورد دیویەتى نوسیویەتى "لەئاوڕدانەوەی مێژوودا تەنھا شتێک کە بیانوو ھۆکار ناگرێتە خۆی ، شەڕی بێ ماناو بێ بنەمای کورد بەدەستی کورد کوژییە".

 

دەشڵێت "براکوژی قێزەونترین دیاردەو کارەسات بووە لەڕابردوماندا ھەربۆیە لەم سەردەمەشدا دەبێ تەحریم و تەجریمی براکوژی دوپاتبکەینەوە، بەمە سەنگی نەتەوەیی و نیشتمانپەروەریمان دەپـێورێ".

 

"ناکۆکی و ململانێکانمان چەندە گەورەبن با نەخشەرێگای چارەسەریی تەنھا دیالۆگ و گفتوگۆکردن و دانیشتن بێت و ھیچی تر"، حاكم قادر وایوتووە.

 

ئەوە لەکاتێکدایە، ئەمڕۆ لە ناوچەى چەمانکێ لە نزیک زاخۆ، شەڕ لەنێوان گەریلاکانی پەکەکە وهێزەکانی پێشمەرگە ڕوویدا و پێشمەرگەیەکیش کوژرا.  

  

بەپێی زانیارییەکانی ناس کورد کە لە سەرچاوەیەکی سەربازییەوە (4ی تشرینی دووەمی 2020) وەریگرتووە، "گەریلاکانی پەکەکە هێرشیان کردووە سەر بنکەیەکی هێزەکانی پێشمەرگە لە چەمانکێ و چەند پێشمەرگەیەکیش بریندار بوون و پێشمەرگەیەکیش کوژراوە."  

  

هاوکات تەلەفزیۆنی فەرمی پارتی ڕایگەیاندووە کە لە هێرشەکەدا "شەهید و بریندار هەن."  

  

سەرچاوەیەکى دیکەى ئیداریی لەو سنورە بە ناس کوردى راگەیاند، کە شەڕ و پێکدادان لە سنورى چەمانکێ روویداوە، پێشمەرگەیەک کوژراوە و دووانی تریش بریندارن.  

  

هێشتا پەکەکە هیچ لێدوانێکى لەبارەى شەڕەکەوە بڵاونەکردووەتەوە، بەڵام ئاژانسى ڕۆژنیوزى نزیک لەپەکەکە ئەمڕۆ بڵاویکردووەتەوە، "هەڕەشەکانی پارتى بۆ هەڵگیرسانی شەڕی ناوخۆ زیادییان کردووە، جێگیرکردنی هێزێکی تایبەتی سەر بە سەرۆکی پارتى لە هەولێرەوە تا بارزان، بەوە لێکدەدرێتەوە کە ئاماژەیەک بێت بۆ ئامادەکارییەکانی پەدەکە بۆ هەڵگیرسانی شەڕ".  

  

ئەمە دووەم پێکدادانى نێوان پێشمەرگە و پەکەکەیە لەماوەى 10 رۆژدا، ڕۆژی 25ى تشرینى یەکەمى 2020 لەسنورى ئاکرێ پێکدادان لەنێوان هێزێکى پێشمەرگە و گەریلاکانى پەکەکە روویدا، لەکاتێکدا هێزەکانى پێشمەرگە خەریکى سەنگەر لێدان بوون لەو سنورە.