گه‌ڕان

Shadow Shadow
سیاسه‌تی

’’لەبەردەم چوار مانگی قورسداین’’

هۆشدارییەک لە قائیمقامی سلێمانییەوە: ئەوەی پابەند نەبێت سزادەدرێت

2020.11.01 - 13:09
هۆشدارییەک لە قائیمقامی سلێمانییەوە: ئەوەی پابەند نەبێت سزادەدرێت

ناس کورد-

قائیمقامی سلێمانی ڕایگەیاند، سلێمانی لەبەردەم چوار مانگی قورس و ناڕەحەتدایە و پێویستە هەمووان پابەندی ڕێنماییە تەندروستییەکان بن، هۆشداریشی بە مارکێت و مۆڵەکان دا لە ئەگەری پابەندنەبوون بە ڕێنماییەکان، سزا دەدرێن.

 

لەڕاگەیەندراوێکدا ئاوات محه‌مه‌د، قائیمقامی سلێمانی رایگه‌یاند: "باشترین رێگه‌ بۆ رووبه‌ڕووبوونه‌وه‌ی ڤایرۆسی كۆرۆنا به‌ستنی ده‌مامكه‌، بۆ ئه‌وه‌ی‌ زیان به‌خۆمان و ‌خۆشه‌ویستانمان نه‌گه‌یه‌نین، پێویسته‌ رێكاره‌كانی خۆپارێزی جێبه‌جێ بكه‌ین، به‌ستنی ده‌مامك پارێزگاری كردنه‌ له‌ خۆت و پاراستنی كه‌سوكار و هاوڵاتیانه‌ و هۆكارێكیشه‌ بۆ به‌رده‌وامی بونی ژیان."

 

ئاماژەی بەوەشكردووە: " له‌به‌ر ئه‌وه‌ی رۆژانه‌ ژماره‌یه‌كی زۆری هاووڵاتیان ڕوو له‌ شوێنه‌ گشتیه‌كان و مۆڵ و ماركێته‌كان ده‌كه‌ن، پێویسته‌ ئه‌و شوێنانه‌ ته‌واوی رێكاره‌كانی خۆپارێزی جێبه‌جێ بكه‌ن و پێش هه‌موو شوێنه‌كانی دیكه‌ پابه‌ندی رێكاره‌كانی خۆپارێزی بن، رێگری له‌و كه‌سانه‌ بكه‌ن به‌بێ ده‌مامك بیانه‌وێت سه‌ردانیان بكه‌ن."

قائیمقامی سلێمانی ڕوونیشیكرده‌وه‌: "پاش كۆبونه‌وه‌كه‌ی دوێنێی لیژنه‌ی باڵای ئۆپرایسۆنه‌كان دژی ڤایرۆسی كۆرۆنا له‌شاری سلێمانی، لیژنه‌ هاوبه‌شه‌كانی قائیمقامیه‌تی سلێمانی سه‌ردانی شوێنه‌كان و پشكنینه‌‌كان زیاتر ده‌كات، هه‌ر مۆڵێك و ماركێتێك یان شوێنێكی گشتی پابه‌ندی رێكاره‌كانی خۆپارێزی نه‌بێت، شوێنه‌كه‌ و خاوه‌نه‌كه‌شی روبه‌ڕوی رێكاری یاسایی توند ده‌كرێته‌وه‌."

 

جەختیشیکردووەتەوە: " سلێمانی له‌ به‌رده‌م چوار مانگی قورس و ناره‌حه‌تیدایه، رۆژانه‌ ژماره‌ی توشبووان به‌ ڤایرۆسی كۆرۆنا له‌ هه‌ڵكشاندایه‌، ئه‌گه‌ر له‌لایه‌ن هه‌موومانه‌وه‌ رێكاره‌كانی خۆپارێزی جێبه‌جێ نه‌كرێت، به‌چاوی خۆمان رووداوی ناخۆش و نه‌خوازراو ده‌بینین."

 

رێنمایی قائیمقامیەتی سلێمانی تایبه‌ت به‌شێوازی كاركردنی مۆڵ و ماركێت و شوێنه‌گشتییه‌كان:

 

1- پێویسته‌ سه‌رجه‌م كارمه‌ندان و كرێكاران و ئه‌و هاوڵاتیانه‌ی ڕوو له‌ شوێنه‌كه‌ ده‌كه‌ن ده‌مامك به‌كاربهێنن.

2- دانانی بابه‌ته‌كانی پاكژكه‌ره‌وه‌ (تعقیم) به‌بێ به‌كارهێنان رێگری بكرێت له‌ چونه‌ ژوره‌وه‌.

3- دانانی هه‌واكێش بۆ ئاڵوگۆڕكردنی هه‌وای شوێنه‌كه‌.

4- رێگری كردن له‌ دروستبونی قه‌ره‌باڵغی له‌ناو ماركێته‌كاندا.

5- پێویسته‌ كڕیاران به‌ژماره‌یه‌كی گونجاو بچنه‌ ناو ماركێته‌كانه‌وه، به‌پێی روبه‌ری گه‌وره‌ و بچوكی شوێنه‌كه‌.

6-  پێویستە ماوەی نێوان هەركەسێك بۆ كەسێكی تر لە (2) مەتر كەمتر نەبێت.