گه‌ڕان

Shadow Shadow
سیاسه‌تی

ئەنجومەنی مامۆستایانی ناڕازی هۆشداری بەحكومەت دەدەن

2020.10.29 - 15:47
App store icon Play store icon Play store icon
ئەنجومەنی مامۆستایانی ناڕازی هۆشداری بەحكومەت دەدەن

ناس كورد-

ئەنجومەنی مامۆستایانی ناڕازی رایدەگەیەنن، وەزارەتی پەروەردە ئەوەندەی لە خەمی بازرگانی و  كورسیەكانیاندان لە خەمی كێشەكانی پەروەدە و داوا ڕەواكانی مامۆستایان و فەرمانبەراندا نین، جەختیش دەكەنەوە كە رۆژی یەكشەممە هەڵوێستی نوێیان رادەگەیەنن.

 

کەناڵی ناس کورد لە تێلیگرام جۆین بکە   

ئەنجومەنی مامۆستایانی ناڕازی لەڕاگەیەنراوێكدا كە وێنەیەکی بۆ ناس كوردی نێردراوە رایگەیاند (29ى تشرینى یەکەمى 2020)، بەداخەوە دەسەڵاتدارانی شكستخواردووی هەرێم و  وەزارەتی پەروەردە ئەوەندەی لە خەمی بازرگانی و  كورسیەكانیاندان لە خەمی كێشەكانی پەروەردە و داوا ڕەواكانی مامۆستایان و فەرمانبەراندا نین، بۆیە زۆربەی بڕیار و لێدوانەكانیان بە زیانی پرۆسەی پەروەردە و هاوڵاتیان تەواو دەبێت.

 

بەپێی راگەیەنراوەكە لەئێستاشدا لە ژێر فشاری حیزبەكانیان و لەپێناوی كورسیەكانیان دەیانەوێ بەزۆرەملی دەرگای ناوەندەكانی خوێندن بكەنەوە، ئەوانیش ئەم هەوڵە بە هەوڵێكی نەزۆك دەزانن و پێیانوایە بایكۆت پرۆسەیەكی خۆرسكی مامۆستایانە و گیرفانی بەتاڵیان و ستەمكاری دەسەڵات پێی كردوون و لقی سلێمانی یەكێتی مامۆستایان لە بەیانێكی فەرمیدا بڕیاری لێداوە.

 

ئەنجومەنی مامۆستایانی ناڕازی دەڵێت "وەكو هەمیشە پشتیوانی ئەم هەڵویستەی مامۆستایان دەكەین و بە بەرپرسانی پەروەردە و حكومەت دەڵێین مامۆستایان بە بڕیاری ئێوە بایكۆتیان نەكردووە تا بە بڕیاری ئێوە بیشكێنن".

 

ئەنجومەنی مامۆستایانی ناڕازی هۆشداری دەدەنە حكومەتی هەرێم و وتویانە "ئێمە چاوەڕوانی هەڵوێستی نوێی لایەنە پەیوەندیدارەكانی پەروەردە و حكومەت دەكەین كە بڕیارە ڕوژی یەكشەممە 1/11/2020 ڕایبگەیەنین، ئەو بڕیارە ئەگەر لە بەرژەوەندی پرۆسەی پەروەردەدا نەبێت و داواكاری مامۆستایان و قوتابیان لەبەرچاو نەگیرێت  ئێمە بێدەنگ نابین و هەڵوێستی توندمان دەبێت و ناڕەزایەتی و چالاكیەكانمان دەست پێ دەكەینەوە".

 

رۆژی سێشەممەی رابردوو بەڕێوەبەرایەتی گشتی پەروەردەی سلێمانی داوای لەمامۆستایان كرد كۆتایی بەبایكۆت بهێنن و دەست بەدەوامكردن بكەنەوە، بەڵام یەكێتی مامۆستایان و مامۆستایانی ناڕازی لەسەر بایكۆتكردن و داواكارییەكانیان بەردەوامن.