گه‌ڕان

Shadow Shadow
سیاسه‌تی

پیرۆزبایی هێمن هەورامی بۆ مەولود كاردانەوەی لێ كەوتەوە

2020.10.29 - 13:57
App store icon Play store icon Play store icon
پیرۆزبایی هێمن هەورامی بۆ مەولود كاردانەوەی لێ كەوتەوە

ناس کورد-

هێمن هەورامى، جێگرى سەرۆکى پەرلەمانى کوردستان پەیامێکى لەیادى مەولودا بڵاوکردەوە و لە تۆڕە کۆمەڵایەتییەکاندا کاردانەوەى لێکەوتەوە.

 

کەناڵی ناس کورد لە تێلیگرام جۆین بکە   

لە پەیامەکەیدا بەبۆنەى یادى لەدایکبوونى پێغەمبەرى ئیسلام محەمەد (درودى خواى لێ بێت) لە هەژمارى خۆى لە فەیسبوک بڵاوى کردۆتەوە و ناس کورد بینیوویەتى، هێمن هەورامى، جێگرى سەرۆکى پەرلەمانى کوردستان پیرۆزبایى ئەو یادە لە موسڵمانان دەکات و هیواى ئەوە دەخوازێت ئەو یادە ببێتە مایەی هێنانه‌كایه‌ی خۆشی و ئاشتی و ته‌بایى له‌نێوان مرۆڤه‌كانداو كۆتاییهاتنی پەتاى نەگریسى كۆڕۆنا له‌سه‌ر جیهان و مرۆڤایه‌تی و قووڵکردنەوەی گیانی پێکەوەژیانی ئاشتییانەی نێوان سەرجەم پێکهاتەکان له‌ هه‌رێمی كوردستاندا.

 

پەیامەکەى هەورامى کاردانەوەى زۆرى لێکەوتەوە و لەو کۆمێنتانەى کە بۆ پۆستەکەى نووسراوان ڕەخنەى لێدەگیرێت بەوەى کە لەکاتێکدا ئەو پشتگیرى لە فەڕەنسا و سەرۆکەکەى کردووە چۆن بۆ یادێکى لەم جۆرە پەیام بڵاودەکاتەوە.

 

ڕەخنەکان لە پەیامەکەى جێگرى سەرۆکى پەرلەمانى کوردستان دواى ئەوە هات کە (28ى تشرینى یەکەمى 2020) هێمن هەورامى، بەهاوەڵى سەرۆکى فراکسیۆنەکانى پارتى و یەکێتى و گۆڕان و پێکهاتەکان سەردانى کونسڵخانەى فەڕەنسایان لە هەولێر کرد و لە میانەى ئەنجامدانى کۆنگرەیەکى رۆژنامەوانیدا هەورامى وتى "فەرەنسا تاکە پشتیوانى راستەقینەى هەرێمى کوردستانە، هەر هەڵوێستێک لەهەر پەرلەمانتارێکەوە بەرانبەر بەو وڵاتە گوزارشت لە پەرلەمان و هەرێمى کوردستان ناکات".    

 

وتیشى "هەڵوێستى فەرمى ئێمە ئەوەیە کە بەردەوام دەبین لە پشتیوانیکردنى فەڕەنسا و هەڵوێستەکانى، ئیدانەى هەر جۆرە لێدوان و دەربڕینێک دەکەین کە پێکەوەژیانى ئاینەکان نادیدە بگرێت".      

ئەوە لەکاتێکدایە 25 ئەندامى پەرلەمانى کوردستان (2020/10/26) یاداشتێکى نیگەرانییان ئاڕاستەى کونسوڵى فەرەنسا لە هەرێم کرد لەبارەى لێدوانەکانى ئەم دواییەى سەرۆکى ئەو وڵاتە لەسەر ئیسلام کە کاردانەوەى زۆرى لێکەوتووەتەوە".      

 

ماوەیەكە پەیوەندی جیهانی ئیسلامی و كۆماری فەرەنسا گرژی زۆر بەخۆیەوە دەبینێت، لەدوای سەربڕینی مامۆستایەكی فەرەنسی كە كاریكاتێری لەسەر پێغەمبەری ئیسلام كردبوو قەیرانەكە قووڵتر بووەتەوە.        

 

لەدوا پێشهاتی ئەو ئاڵۆزییەشدا ماكرۆن هەڵمەتێكی گەورەی بەرپاكردووە بۆ دژایەتی دیاردەیەك كە ناوی ناوە "تیرۆری ئیسلامی" لەم میانەیەشدا رێگەی داوە بە نمایشكردنەوەی كاریكاتێرەكان كە موسوڵمانەكان بە سوكایەتی و بێڕێزی دژ بە پێغەمبەری لەقەڵەم دەدەن.