گه‌ڕان

Shadow Shadow
سیاسه‌تی

ئەبوبەكر کاروانى بۆ هێمن هەورامی و شاندی هاوڕێی: هەڵەتان كرد

2020.10.28 - 16:48
ئەبوبەكر کاروانى بۆ هێمن هەورامی و شاندی هاوڕێی: هەڵەتان كرد

ناس کورد-

ئەبوبەکر کاروانى، سەركردەی دیاری یەكگرتووی ئیسلامی و وەزیری پێشووتر لە حکومەتى هەرێم ڕەخنە لە سەردانەکەى جێگرى سەرۆکى پەرلەمان دەکات بۆ کونسوڵخانەى وڵاتى فەڕەنسا لەهەولێر و دەربڕینى پشتیوانى بۆ ئەو وڵاتە بە هەڵە ناو دەبات.

 

کاروانى لە میانەى بڵاوکردنەوەى بابەتێک لە هەژمارى خۆى لە فەیسبوک کە ناس کورد بەدواداچوونى بۆ کردووە ئاماژەى بەوە کرد (28ى تشرینى یەکەمى 2020)، دەربڕینی پشتیوانی بۆ فەرەنسا لەلایەن وەفدی فەرمی پەڕلەمانی کوردوستانەوەلەسەردانیاندا بۆ کونسوڵگەری ئەو وڵاتە لەھەولێر، کارێکی ھەڵەبوو. چونکە پرسەکە پەیوەندی بە ئاین وکەسێتی پێغەمبەرەوە(دخ) ھەیە ورای گشی لەکوردوستان وناوچەکەدا وا وێنای کردووە.

 

جەختیش لەسەر ئەوە دەکاتەوە کە لەدۆخێکی لەوجۆرەشدا بەکارھێنانی وشەی پشتیوانی ئاماژەی نەخوزراوی ھەیە وبواری وەبەرھێنانی دینی وسیاسیش تیایدا لەناوخۆو دەرەوە زۆرە.

 

بەوتەى کاروانى،  ژیری سیاسی وسەلیقەی دیبلۆماسی دەیخواست، جەختیان لەسەر پەیوەندی ھەردوولاو پێزانین بۆ رۆڵی فەرەنسا بەرامبەر بەھەرێم لەرابردوو،وبایەخی درێژە پێدانی ئەم پەیوەندیانە لەداھاتوودا بکرایەتەوە نەك دەربڕینی پشتیوانی، کەدوورنیە لەدا ھاتودا ناچاری پینەکردنی ببن.

 

(28ى تشرینى یەکەمى 2020) هێمن هەورامى، جێگرى سەرۆکى پەرلەمانى کوردستان بەهاوەڵى سەرۆکى فراکسیۆنەکانى پارتى و یەکێتى و گۆڕان و پێکهاتەکان سەردانى کونسڵخانەى فەڕەنسایان لە هەولێر کرد و لە میانەى ئەنجامدانى کۆنگرەیەکى رۆژنامەوانیدا هەورامى وتى "فەرەنسا تاکە پشتیوانى راستەقینەى هەرێمى کوردستانە، هەر هەڵوێستێک لەهەر پەرلەمانتارێکەوە بەرانبەر بەو وڵاتە گوزارشت لە پەرلەمان و هەرێمى کوردستان ناکات". 

 

 

 

وتیشى "هەڵوێستى فەرمى ئێمە ئەوەیە کە بەردەوام دەبین لە پشتیوانیکردنى فەڕەنسا و هەڵوێستەکانى، ئیدانەى هەر جۆرە لێدوان و دەربڕینێک دەکەین کە پێکەوەژیانى ئاینەکان نادیدە بگرێت". 

 

 

 

ئەوە لەکاتێکدایە 25 ئەندامى پەرلەمانى کوردستان (2020/10/26) یاداشتێکى نیگەرانییان ئاڕاستەى کونسوڵى فەرەنسا لە هەرێم کرد لەبارەى لێدوانەکانى ئەم دواییەى سەرۆکى ئەو وڵاتە لەسەر ئیسلام کە کاردانەوەى زۆرى لێکەوتووەتەوە.   

 

 

 

ماوەیەكە پەیوەندی جیهانی ئیسلامی و كۆماری فەرەنسا گرژی زۆر بەخۆیەوە دەبینێت، لەدوای سەربڕینی مامۆستایەكی فەرەنسی كە كاریكاتێری لەسەر پێغەمبەری ئیسلام كردبوو قەیرانەكە قووڵتر بووەتەوە.     

 

 

 

لەدوا پێشهاتی ئەو ئاڵۆزییەشدا ماكرۆن هەڵمەتێكی گەورەی بەرپاكردووە بۆ دژایەتی دیاردەیەك كە ناوی ناوە "تیرۆری ئیسلامی" لەم میانەیەشدا رێگەی داوە بە نمایشكردنەوەی كاریكاتێرەكان كە موسوڵمانەكان بە سوكایەتی و بێڕێزی دژ بە پێغەمبەری لەقەڵەم دەدەن.