گه‌ڕان

Shadow Shadow
سیاسه‌تی

دوو کەس لە کەرکوک دەستگیرکران کە خواردنیان بۆ داعش بردووە

2020.10.28 - 15:56
دوو کەس لە کەرکوک دەستگیرکران کە خواردنیان بۆ داعش بردووە

ناس کورد-

ئاژانسى هەواڵگریی عێراق ڕایدەگەیەنێت، دوو کەس لە ناحیەى ڕەشادى سەر بە کەرکوک دەستگیراون کە کەرەستەى لۆجستى و خۆراکیان گەیاندووەتە دەستى چەکدارانى داعشى لەو ناوچەیەی ناویان ناوە "ویلایەتى کەرکوک".

 

لە ڕاگەیەنراوێکدا کە کۆپیەکى دەستى ناس کورد کەوتووە،  ئاژانسى هەواڵگریی عێراق (28ى تشرینى یەکەمى 2020) ڕایگەیاند، بەپاڵپشت بە فەرمانى وەزیرى ناوخۆ و بە پشتبەستن بە زانیارییە هەواڵگرییەکان توانیوویانە لەڕێگەى مەفرەزەکانى پۆلیسى فیدراڵییەوە "دوو تیرۆریست لە ناحیەى ڕەشادى سەربەپارێزگاى کەرکوک دەستگیر بکەن."

 

ئاماژەى بۆ ئەوەش کردووە، "ئەو دوو تیرۆریستە بەپێى مادەى چواری تیرۆر داواکراو بوون، بەهۆى ئەوەى پەیوەندییان بەچەکدارانى داعشەوە هەبووە و هەستاون بە گەیاندنى کەرەستەى لۆجستى و خۆراک بۆ ئەو چەکدارانەى داعش لەناوچەکە کە چەکدارانى سەر بەویلایەتى کەرکوکیان پێدەوترێت."

 

ئاژانسى هەواڵگرى ئەوەشى ئاشکرا کردووە کە "ئەو دوو دەستگیرکراوەى داعش لەمیانەى لێکۆڵینەوە سەرەتایەکاندا دانیانناوە بەو تاوانانەى کە ئەنجامیانداوە هەروەها دانیانناوە بەوەدا کە کەرەستەى لۆجستى و خۆراکیان زیاترە لەجارێک گەیاندووەتە دەستى تیرۆریستان، ڕێڕەوى لێکۆڵینەوە یاساییەکانیش لەگەڵیاندا بەردەوامە تا ئەوکاتەى بڕیارێکى یاسایى لەدژیان دەردەکرێت."