گه‌ڕان

Shadow Shadow
سیاسه‌تی

ڕونکردنەوەیەک لەبارەى ’’هەواڵی مردنی’’ نەجمەدین کەریمەوە

2020.10.28 - 14:22
ڕونکردنەوەیەک لەبارەى ’’هەواڵی مردنی’’ نەجمەدین کەریمەوە

ناس کورد-

بە قسەى نوسینگەکەى، ئەمڕۆ دۆخی تەندروستیی نەجمەدین کەریم، پارێزگاری پێشووی کەرکوک باشترە و ڕەتی کردەوە ناوبراو گیان لەدەست دابێت وەک ئەوەى بڵاوکراوەتەوە.

 

نەشوان جەلال، سکرتێرى ڕۆژنامەوانیى نەجمەدین کەریم تایبەت بە ناس کوردى (28ی تشرینی یەکەمی 2020) ڕاگەیاند، "بارودۆخى تەندروستى دکتۆر نەجمەدین لەئێستادا جێگیرترە."

 

وتیشى، "بەردەوام لە نەخۆشخانەدا نامێنێتەوە و هاتووچۆى پێدەکرێت لەنێوان نەخۆشخانە و ماڵەوەى خۆێد، تا دوێنێیش لەماڵەوە بوو بەڵام دیسانەوە برایەوە نەخۆشخانەکەى."

 

ئاماژەى بۆ ئەوەش کرد، "لەوانەیە لە ماوەیەکى کەمدا بگەڕێتەوە بۆ ماڵەکەى خۆى چونکە نەخۆشیەکەى کە جەڵتەى مێشکە تووشى ئیفیلجى نەکردووە و قسە دەکات و دەشتوانێت بجوڵێت، ئیتر تەمەنیش بەدەستى خودایە چۆن دەیبەخشێتە مرۆڤ و لێ دەسەنێتەوە".

 

سکرتێرەکەى پارێزگارى پێشووى کەرکوک دەنگۆى مردن و دۆخى بێهۆشى ناوبراوشى ڕەتکردەوە وەک لە تۆڕە کۆمەڵایەتیەکان بڵاو کرایەوە.

 

دوێنێ نەشوان جەلال بە ناس کوردی وت، زیاتر لە 22 ڕۆژە جەڵتە داوێتی لە نەجمەدین کەریم و لە نەخۆشخانەیەکی واشنتنی پایتەختی ئەمەریکا چاودێری دەکرێت.

 

نەجمەدین کەریم ساڵى 1949 لەشارى کەرکوک لەدایک بووە و دواى نسکۆى شۆڕشەکەى مەلا مستەفا بەرەو ئەمەریکا کۆچى کردووە و ڕەگەزنامەى ئەو وڵاتەشى هەیە و یەکێک بووە لەپزیشکە تایبەتیەکانى مەلا مستەفا بارزانی.

 

ساڵى 2011 گەڕاوەتەوە بۆ هەرێم و لەسەر پشکى یەکێتى تا پێش ڕیفراندۆمەکەى هەرێم پارێزگارى ئەو شارە بووە و بەهۆى ئەو ڕوداوانەشەوە چەند جارێک فەرمانى دەستگیرکردنى لەلایەن دادگاکانى عێراقەوە بۆ دەرکراوە و تا پێش نەخۆشکەوتنیشى لەشارى هەولێر ژیاوە.