گه‌ڕان

Shadow Shadow
سیاسه‌تی

میدیاى پەکەکە: پارتى دەیەوێت گەریلا گەمارۆ بدات

2020.10.26 - 15:35
میدیاى پەکەکە: پارتى دەیەوێت گەریلا گەمارۆ بدات

ناس کورد-

میدیاى فەرمى پەکەکە رایگەیاند، پارتى لەهەوڵدایە ناوچەکانى ژێر دەستى پەکەکە بەرتەسک بکاتەوە و رێگاى نێوانیان ببڕێت و گەریلا گەمارۆ بدات.

 

ئاژانسى فورات نیوزى سەر بە پەکەکە بڵاویکردەوە (26ی تشرینی 2020) هێزی سەربازیی گوڵانی پارتی، کە بە "هێزی تایبەت" دەناسرێن، دوای ١٤ی تشرینی یەکەمی ٢٠٢٠ لە گوندی سپیلک تاوەکو بارزان خۆیان جێگیر کردووە. پردی گوندی خالان و ناوچەکانی تر پەڕینەوەیان کۆنترۆڵ کردووە. لە ٢٣ی تشرینی یەکەمدا دەستیان کردووە بە گواستنەوەى هێز و چەکی قورس بەرەو ناوچەى دینارتێ.

 

ئاماژە بەوەشکراوە، هێزی کۆماندۆی زێرەڤانیش، کە لە ژێر فەرمانی رەوان ئیدریس بارزانیدایە چوونەتە شارۆچکەى دینارتێ. لە بەرەبەیانی ٢٤ی تشرینی یەکەمدا لەسەر رێگای رۆیشتن بۆ گوندی دوڤرییە بەرەو ناوچە شاخاوییەکان، لە ناوچەى گرێ قولنگە بەرەو گوندی گیسێ دەستیان بە دروستکردنی خاڵی چاودێری و پشکنین کردووە. ئەو هێزە بە چەکی قورسەوە لەو ناوچەیەدا لە جموجوڵدایە.

 

بەپێی ئاژانسەکە، دەشتی دینارتێ و نەهلێ، سەر بە ناوچەی ئاکرێ لە پارێزگای دهۆکن و لەبەر ئەوەى لە چیای گارە نزیکن، بە ناوچەى گەریلا دەزانرێت. پارتى دەیەوێت پەیوەندیی نێوان ناوچەکانی گەریلا ببڕن و گەریلا گەمارۆ بدەن و لەگەڵ تورکیادا ئامادەکاری بۆ هێرش بکەن. 

 

تۆمەتبارکردنى پارتى لەلایەن پەکەکەوە هاوکاتە لەگەڵ پێکدادانى نێوان هێزێکى پێشمەرگە و گەریلا لە سنورى دینارتەى سەر بە ئاکرێ کە رۆژى یەکشەممە روویدا، کە میدیاکانى پارتى گەریلایان بە هێرشەکە تۆمەتبارکرد.

 

پێکدادانەکە دواى گرژبوونى زیاترى پەیوەندییەکانى پارتى و پەکەکە دێت لەو سنورە، بەتایبەتى لەدواى کوژرانى بەرپرسێکى ئاسایش لەسنورى ئامێدى، کە پەکەکە تۆمەتبارکراو ئەویش رەتیکردەوە.    

 

ئەو سنورەى شەڕەکەى لێ ڕوویداوە بە ناوچەى ژێر هەژمونى پارتى دادەنرێت و زیاتر هێزەکانى سەر بەو حزبە لەو سنورە جێگیرن. بەپێی ئاژانسى پەیامنێرى سەر بە پارتى، هێزەگەى پەکەکە بە ئارپیجى هێرشیان کردووەتە سەر پێشمەرگە.    

 

شەعبان خەلیل، بەرێوەبەرى ناحیەى دینارتە بە ناس کوردى راگەیاند (26ى تشرینى یەکەمى 2020) "ئەوەى روویدا تەنها چەند خولەکێک بوو، لەکاتێکدا هێزەکانى پێشمەرگە سەرقاڵى دانانى خاڵەکانى خۆیان بوون، چەند تەقەیەکیان لێکراوە و ئەوانیش وەڵامیان داوەتەوە".  

  

وتیشى "رووداوەکە کە کارێکى ئیستیفزازى بووە کەمتر لە پێنج خولەکى خایاندووە و دواتر رەوشەکە ئاسایی بووەتەوە و هیچ زیانێکى گیانى لێنەکەوتووەتەوە".