گه‌ڕان

Shadow Shadow
سیاسه‌تی

مامۆستایەکى ئاینى بە کۆرۆنا گیانى لەدەستدا

2020.10.26 - 10:31
مامۆستایەکى ئاینى بە کۆرۆنا گیانى لەدەستدا

ناس کورد-

مامۆسـتا تەحسین ئەحمەد پێشنوێژ و وتاربێژ لە هەڵەبجە بە کۆرۆنا گیانى لەدەستدا.

 

بەپێی هەژمارەکانى چالاکانى هەڵەبجە لە تۆڕە کۆمەڵایەتییەکان  (26ى تشرینى یەکەمى 2020)، مامۆســتا تەحسین ئەحمەد فەرەج بەشـــارەتی، پێشنوێژ و وتاربێژی مزگەوتی چـوارچرا دواى توشبوونى بە کۆرۆنا کۆچی دوایى کرد. 



لاى خۆیەوە نوسینگەی ڕابەری گشتی بزووتنەوەی ئیسلامی لە راگەیەنراوێکدا کە وێنەیەکى دەست ناس کورد کەوتووە رایگەیاند "جارێکی تر بە نەخۆشی کۆرۆنا مامۆستایەکی ترمان لەدەستدا کە بە بەماڵئاوایی و وەفاتی دڵتەنگی کردین (مامۆستا تەحسین بەشارەتی) یەکێک بوو لە خۆشەویستان و نزیکانی ئێمە".

 

یەكێتی زانایانی ئاینی ئیسلامی كوردستان ڕایدەگەیەنێت، ئەمساڵ نزیكەی 170 مامۆستای ئاینی توشی كۆرۆنا بوون، لەو ژمارەیەش 12 مامۆستایان كۆچی دواییان كردووە.  

  

مەلا ڕەعد عومەر بلی، وتەبێژی لقی هەولێری یەكێتی زانایانی ئاینی ئیسلامی كوردستان (25ی تشرینی یەكەمی 2020) بە ناس كوردی ڕاگەیاند، ئەمساڵ بەگشتی 60 مامۆستای ئاینی كۆچی دواییان كردووە و لەوەش 12 مامۆستایان بە ڤایرۆسی كۆرۆنا گیانیان لەدەستداوە.  

  

ناوبراو ڕوونیكردەوە، ئەمساڵ 160 تا 170 مامۆستای تووشی كۆرۆنا بوون، بەڵام ئەوەی بەفەرمی تۆماركراوە یان ئەوان زانیویانە تووشی كۆرۆنا بوون نزیكەی 122 مامۆستای ئاینین، لەوەش نزیكەی 40 تا 50 مامۆستایان لەماڵەوە چارەسەریان وەرگرتووە یان نەیویستووە خەڵك بزانێت كۆرۆنایەتی یان بەسووكی گرتوویەتی و بەچارەسەری سەرەتایی باش بووە.  

  

مەلا ڕەعد بەئاماژەدان بەوەی ژمارەیەكی زۆر لەمامۆستای ئاینی توشی كۆرۆنا بوون، جەختی لەهۆكارەكان كردەوە كە بەشێكی بەركەوتەی نێو خەڵكن لە گۆڕستان یان لەمزگەوت، چونكە بەگشتیش خەڵك پابەندی رێنماییەكان نین بەتایبەتی لە مزگەوتەكان.  

  

لەو بارەیەوە نەبەز ئیسماعیل، وتەبێژی وەزارەتی ئەوقاف و كاروباری ئاینی حكومەتی هەرێمی كوردستان بە ناس كوردی راگەیاند، تووشبوونی مامۆستایانی ئاینی بە كۆرۆنا لەڕووی ئیدارییەوە هیچ كێشەیەك بۆ وەزارەت دروست نابێت بۆ شوێنگرەوەی ئەو مامۆستایانە، چونكە جگە لەفەرمانبەرانی وەزارەت، كەسانی خۆبەخشیش زۆرن كە بەمۆڵەتی وەزارەت، بەڕێوەبەرایەتییەكان شوێنگرەوەیان بۆ دەستنیشان دەكەن.  

  

لەماوەی رابردوودا هاوشێوەی چین و توێژەكانی دیكە مامۆستایانی ئاینیش تووشی كۆرۆنا بوون لەدیاریترینیان محەمەد فایەق شارەزوری، سۆران محمەد و عەبدوللەتیف ئەحمەد سەلەفی.