گه‌ڕان

Shadow Shadow
سیاسه‌تی

وادەى پێشبینیکراوى شەپۆلى دووەمى کۆرۆنا لە عێراق و رێوشوێنە نوێیەکان راگەیەنرا

2020.10.25 - 20:00
وادەى پێشبینیکراوى شەپۆلى دووەمى کۆرۆنا لە عێراق و رێوشوێنە نوێیەکان راگەیەنرا

ناس کورد-

شانەى قەیرانەکان لە پەرلەمانى عێراق هۆشداریدا لە شەپۆلى دووەمى کۆرۆنا و ئەو رێوشوێنانە دیاریدەکات کە رەنگە بگیرێنەبەر لەکاتى هاتنى ئەو شەپۆلەدا.

 

جەواد موسەوى بڕیاردەرى شانەکە بە ئاژانسى فەرمى عێراقى راگەیاند (25ی تشرینی یەکەمی 2020)، پێشبینى دەکرێت لەدوو مانگى داهاتوودا شەپۆلى دووەمى کۆرۆنا بگاتە عێراق، ئەوەش پابەندبوون بە رێوشوێنەکانەوە پێویستدەکات.

 

وتیشى "ئەو شەپۆلە زۆربەى ئەو وڵاتانە دەگرێتەوە کە کەشوهەوایان ساردە، بەتایبەتى ئەوروپا".

 

موسەوى باسى لەوەشکردووە، لەئەگەرى کۆنتڕۆڵنەکردنى ڤایرۆسەکە و بەرزبوونەوەى ژمارەى توشبووان، چەند رێوشوێنێک دەگیرێتەبەر، وەکو کەرەنتینەى نیمچەیی لە ناوچە بازرگانى و ئایینى و بازاڕەکان و سنوردارکردنى هاتوچۆ.

 

بەپێی ئامارەکانى وەزارەتی تەندروستیی عێراق (25ی تشرینی یەکەمی 2020)، لە 24 کاتژمێری ڕابردوودا دوو هەزار و 554 حاڵەتی توشبوون بە کۆرۆنا دەستنیشان کراون، نزیکەى سێ هەزار و 140 توشبووش چاکبوونەتەوە.  هەروەها 55 حاڵەتی مردن بە نەخۆشییەکە تۆمارکراون کە زۆرترینی لە سلێمانی و هەولێرن.