گه‌ڕان

Shadow Shadow
سیاسه‌تی

هەشت پارتی باکوری کوردستان لەبارەى رێککەوتنى نێوانیانەوە بڕیاریاندا

2020.10.24 - 22:04
هەشت پارتی باکوری کوردستان لەبارەى رێککەوتنى نێوانیانەوە بڕیاریاندا

ناس کورد- 

 

هەشت پارتی باکوری کوردستان ئەندام لە “یەکڕیزیی کوردستانی بۆ هەڵبژاردنەکان”، کۆبوونەوە و بڕیاریاندا ڕێککەوتنى نێوانیان بۆ هەماهەنگى و پێکەوە کارکردن بکەن بە هەمیشەیی.

 

ئاژانسى فورات نيوزى سەربە "پەكەكە" بڵاويكردەوە (24 ى تشرينى يەكەمى 2020)،  لەشارى ئامەد هەشت پارتی باکوری کوردستان کە ئەندامن لە پلاتفۆرمی “یەکڕیزیی کوردستانی بۆ هەڵبژاردنی شارەوانییەکان”، لەژێر چەتری پارتی دیموکراتی گەلان-هەدەپە، کۆبوونەوە.

 

ڕونيشكراوەتەوە، لە کۆبوونەوەکەدا بڕیاردرا ئەو یەکڕیزییەی پێشتر بۆ بەشداریی لە هەڵبژاردنی شارەوانییەکان ڕاگەیەندرابوو، بکرێت بە هەمیشەیی.

 

دوای کۆبوونەوەکە محەمەد ئەمین کارداش سەرۆکی پارتی دیموکراتی کوردستان-تورکیا لە كۆنگرەيەكى ڕۆژنامەوانيدا وتى، "بۆ ئەوەی هێڵی سیاسەتی نەتەوەیی بە شێوەیەکی ستراتیژیی بکەین بە هەمیشەیی کۆبووینەوە، موژدەیەکی خۆشمان بۆ گەلی کورد هەیەو ئێمە هێڵی نەتەوەییمان دروستکرد".

 

باسى لەوەشكرد، هێز و لایەنە کوردستانییەکان پێکەوەن و یەکێتییەک لە مەیدانی سیاسەتی نەتەوەیی بەرز دەکەنەوە، کۆبوونەوەكەش بۆ هەڵبژاردن نییەو بۆ پێکەوە کارکردنە، لەمەودواش بەردەوام دەبێت.

 

لاى خۆشيەوە مەدحەت سانجار هاوسەرۆکی گشتی هەدەپە وتى، "کۆبوونەوەیەکی ئەرێنی و باش بوو، لەسەر زۆر بابەت قسەمان کرد و بڕیارێکی گرنگماندا، لەسەر ئەم پلاتفۆرمەمان بۆ یەکڕیزیی لە هەڵبژاردنەکان پێکهاتین و بڕیاری هەمیشەیی کردنەوەی ئەم یەکڕیزییەماندا".

 

ئەو حزب و لایەنانەی هاوپەیمانێتیەکەیان پێکهێناوە بريتين لە هەريەكە لە پارتەكانى "هەدەپە، بەدەپە، تەڤگەری ئیسلامی کوردستان - ئازادی،PDK-T ،PDK ،KKP ،PIA ،DDKD".