گه‌ڕان

Shadow Shadow
سیاسه‌تی

دیوێكی شاراوە هەیە لە سەردانی كازمی بۆ پاریس

2020.10.20 - 17:57
دیوێكی شاراوە هەیە لە سەردانی كازمی بۆ پاریس

ناس کورد-

ڕۆژنامەی شەرقولئەوسەت بڵاویكردەوە، جگە لە پڕۆژە و بابەتە ڕاگەیەنراوەكان، دیوێكی تری تەوەری سەردانی مستەفا كازمی بۆ پاریس پەیوەستە بە چارەنوسی داعشە فەڕەنسییەكانەوە.

 

ڕۆژنامەكە كە لە شاری لەندەن دەردەچێت لە ڕاپۆرتێكدا ئەمڕۆ (20 تشرینی یەكەمی 2020) ئاماژەی بەوەكردووە، پرسێك هەیە میدیاكان لە سەردانەكەی كازمی باسیان نەكردووە، چارەنوسی ئەو داعشە فەڕەنسیانەن كە لای هێزەكانی سوریای دیموكراتن و ئەم هێزە دەیەوێ دووریان بخاتەوە لە ڕۆژئاوای كوردستان، بەڵام پاریس نایەوێ وەریان بگرێتەوە.


پێشتر عێراق 12 لەو داعشە فەڕەنسیانەی وەرگرت و پاش دادگاییكردن فەرمانی لە سێدارەدانی بەسەردا سەپاندن، بەڵام بەقسەی شەرقولئەوسەت پاریس ئەوەشی پێ خۆش نییە چونكە لە سیستمی قەزایی ئەودا ئەو سزایە پەیڕەو ناكرێت و ئەم پرسەش لەنێوان عێراق و فەرەنسادا ماوەتەوە.

 

دوێنێ کازمی گەڕێکی وەڵاتانی ئەوروپی دەستپێکرد و بەسەردانێکی فەرمی گەیشتە پاریسی پایتەختی فەڕەنسا و دواتر گەیشتە ئەڵمانیا، بڕیارە سەردانی بەریتانیاش بکات، نوسینگەی سەرۆک وەزیران دەڵێت، لەگەڵ بەرپرسانی باڵای ئەو سێ وڵاتە لەسەر سێ پرسی جیاواز گفتوگۆ دەکات.

 

نوسینگەی سەرۆک وەزیرانی عێراق ڕوونیکردووەتەوە، گفتوگۆکان تایبەت دەبن بە بوارەکانی، ئابوری و ئاسایش و تەندروستی، هەروەها پەرەپێدانی پەیوەندییەکان و بەهێزکردنی هاوکاریی هاوبەشی نێوان عێراق و ئەو وڵاتانە لە سەرجەم بوارەکاندا.