گه‌ڕان

Shadow Shadow
سیاسه‌تی

وردەکاریی گیان لەدەستدانى باوکێک و سێ کوڕ لە تەقینەوەکەى مەخمور

2020.10.20 - 14:20
وردەکاریی گیان لەدەستدانى باوکێک و سێ کوڕ لە تەقینەوەکەى مەخمور

ناس کورد- هەڤاڵ فەتاح 

 

بەرپرسی کۆمیتەی یەکێتی لەمەخمور ئاشکرایکرد، ئەو سێ کەسەى لەتەقینەوەکەى ئەمڕۆدا گیانیان لەدەستداوە کوردن و لە پیاوێک و سێ کوڕى پێکهاتوون، کوڕێکى دیکەشیان تائێستا بێ سەرو شوێنە.

 

 

تەقینەوەکە کاتژمێر  10:00 سەر لەبەیانی ( 20ی تشرینی یەکەمی 2020) له‌سەر ڕێگای نێوان ‌ناحیه‌ی قه‌راج و قه‌زای مه‌خمور لە نزیک گوندی ڕواڵە کە دەکەوێتە دووری 18 کیلۆمەتر لەباشوری ڕۆژئاوای مەخمور روویدا بەهۆى تەقینەوەى مینێک بە ئۆتۆمبیلێکدا.

 

ڕەشاد گەڵالی، بەرپرسی کۆمێتەی یەکێتی لە مەخمور( 20ی تشرینی یەکەمی 2020) بە ناس کوردی ڕاگەیاند، "بۆمبەکە به‌ ئۆتۆمبێلێكی پیكابدا ته‌قییه‌وەتەوە‌، كه‌چوار كه‌سی تێدابووە، پیاوێک و چوار کوڕى، سه‌رجه‌میان كوردن و خەڵکی گوندی زۆرنان کە دەکەوێتە دووری  10 کیلۆمەتر لەناحییەی قەراجەوە".

 

وتیشى "ئەو ناوچەیەی کە تەقینەوەکەی تێیدا ڕوویداوە دەکەوێتە سنوری دەسەڵاتی لیوای (14)ی سەربە فیرقەی (51 )ی سوپای عێراق، بەهۆی گرتنی ڕێگاکانەوە لەلایەن ئەو فیرقەیەوە هاوڵاتیانى گوندەکانی ناوچەکە ناچاردەبن تەنها لەو ڕێگایەوە هاتووچۆ بکەن، ئەوەش مەترسی گەورەی بۆسەر ژیانیان درووستکردووە، چونکە ڕێگاکە نزیکە لەمۆڵگەکانی چەکدارانی داعش لەچیای قەرەچۆخ".

 

بەوتەی گەڵالی، لەتەقینەوەکەدا پیاوەکە و سیان لە کوڕەکانى گیانیان لەدەستداوە وکوڕێکی ترشیان کە لەناو پیکابەکەدا بووە بێ سەروشوێنە، پێدەچێت برینداربووبێت و سەربازەکانی لیوای (14) کەنزیک بوون لەشوێنی تەقینەوەکە بردبێتیان بۆتیمارکردن.

 

ئەوەشى خستەڕوو "ئەو هاووڵاتیانە بەمەبەستی کارو کاسبی ویستویانە بڕۆن بۆ شاری هەولێر، بەڵام لەڕێگەدا ئەو ڕووداوەیان بەسەردا هاتووە".

 

لەماوەی شەش مانگی ڕابردوودا ئەمە حەوتەم ڕووداوی تەقینەوەیە کە لەسنورەکەدا ڕووبدات، بەوتەى گەڵاڵى هەر لەو ماوەیەدا نزیکەی 15 هاووڵاتی  کوردی ناوچەکە گیانیان لەدەستداوە.