ناس کورد-
هاوپەیمانێتی نەسری سەر بەحەیدەرعەبادی، سەرکۆنەی هێرشەکەی ئەمڕۆی سەر بارەگای پارتی دیموکراتی کوردستان لەشاری بەغدا دەکات و داواشی لەهەموو لایەنە سیاسییەکان کرد بە پەرۆش بن بۆ پارێزگاریکردن لەیەکریزی نیشتمانی، دەشڵێت، پێشمەرگە و حەشدی شەعبی شان بەشانی یەکتر دژی داعش جەنگاون.
کەناڵی ناس کورد لە تێلیگرام جۆین بکە
هاوپەیمانێتی نەسر کە حەیدرە عەبادی، سەرۆکوەزیرانی پێشووتری عێراق سەرۆکایەتی دەکات لەڕاگەیەندراوێکدا کە وێنەیەکی دەست ناس کورد کەوتووە ( 17ی تشرینی یەکەمی 2020) ڕایگەیاند: "هەموو جۆرە هێرشێک بۆسەر موڵکی گشتی و بارەگا و ناوەندە حیزبییەکان لەشاری بەغدا ڕەتیدەکەینەوە".
ئاماژەی بەوەشكردووە: "سیاسیەتی سوتاندنی ئاڵا و پەرەپێدان بە گرژییەکان دەبێتە مایەی لاوازکردنی یەکریزی نیشتیمانی، بۆیە ئەوجۆرە کارانە ڕەتدەکەینەوە".
هاوپەیمانی نەسر داواشی کردووە، حکومەت ئەرکی خۆی ببینێت لە پاراستنی بارەگا و ناوەند حیزبیەکان و دەسەڵاتی خۆی بسەپێنێت لە بەرقەرارکردنی ئەمن و ئاسایش لە هەموو شوێنێکی وڵاتدا."
هاوپەیمانێتییەکەی حەیدەر عەبادی باسی لەوەشکردووە: "پێشمەرگە و حەشدی شەعبی شان بە شانی یەکتر دژ بە ڕێکخراوی تیرۆرستیی داعش جەنگاون، دانایی نییە ئەو پەیوەندییە نیشتیمانییە درزی تێبکەوێت لە پێناو ژمارەیەک ئەجێندای سیاسی و هەڵبژاردندا".
لە ڕاگەیاندراوەکەدا هاوپەیمانێتی نەسر جەختیکردووەتەوە، دەبێت هەموولایەنە سیاسییەکان بەوپەڕی ئاگاداری و بەرپرسیارێتیەوە وتار و لێدوان بدەن، بۆ ئەوەی نەبێت بەهۆکاری درووستبوونی ئاڵۆزی و تێکدانی ئاشتەوایی کۆمەڵایەتی، بەتایبەتی لەم دۆخە نالەبارەی کە لە ێستاداعێراقی پێدا گوزەر دەکات.
سەرلەبەیانی ئەمڕۆ شەممە لایەنگرانی حەشدی شەعبی بەربەستی ئەمنییان تێپەڕاند و چوونە ناو بارەگای لقی پارتی لە بەغدا و بارەگاکەیان سوتاند و ئەوەش کاردانەوەی گەورەی لەناوخۆی عێراقدا لێکەوتەوە و زۆرینەی لایەنە سیاسییە کوردییەکان هەڵوێستی خۆیان لەوبارەیەوە ڕاگەیاند.
