گه‌ڕان

Shadow Shadow
سیاسه‌تی

لێدوانی پەروەردەی سلێمانی سەبارەت بەدەستپێكردنەوەی دەوام دوای دابەشکردنى موچە

2020.10.15 - 11:13
لێدوانی پەروەردەی سلێمانی سەبارەت بەدەستپێكردنەوەی دەوام دوای دابەشکردنى موچە

ناس کورد-

بەڕێوەبەری پەروەردەی رۆژئاوای سلێمانی ڕایگەیاند، تەمەننا دەكەن دوای دابەشكردنی موچەی مانگی ئەیلول، مامۆستایان دەوام بكەنەوە، بەڵام ئەگەر دەوامیش دەست پێنەكات، هیچ بڕیارێك نییە بۆ سزادانیان، بەڵكو تەنها بەڕاپۆرتێك بۆ بەڕێوەبەرایەتی گشتی پەروەردەی بەرز دەكەنەوە و دەبێت وەزارەت بڕیار بدات.

 

بەكر محەمەد، بەڕێوەبەری پەروەردەی رۆژئاوای سلێمانی (15ی تشرینی یەكەمی 2020) لەلێدوانێكى تایبەتدا بە ناس کوردى راگەیاند "ئێستا فەرمانبەرانی ژمێریاری سەرقاڵی ئامادەكارین بۆ لیستی موچە، بەڵام بەهۆی وردەكاری زۆری لیستەكەوە گومانیان هەیە رۆژی شەممە بتوانن مووچەی مانگی نۆ لەكاتی خۆیدا تەواو بكەن، لەبەرئەوەی ژمارەی مامۆستا و فەرمانبەران زۆرن".

 

(14ى تشرینى یەکەمى 2020) وەزارەتى دارایى و ئابورى حکومەتى هەرێم لیستى دابەشکردنى موچەى مانگى ئەیلوولى 2020ى بڵاوکردەوە و بە گوێرەى ڕیزبەندى لیستەکە (17ى تشرینى یەکەمى 2020) موچەى وەزارەتى پەروەردە دابەش دەکرێت.

 

بەكر محەمەد روونیكردەوە، دوای دابەشكردنی مووچەش ئیلتیزام بەبڕیارەكانی وەزارەتی پەروەردەوە دەكەن و ئاگاداری مامۆستایان دەكەنەوە بۆ دەوامكردن، بەڵام مامۆستایانیش بەتەنها وابەستەی ئەوان نین، بەڵكو رێكخراوی یەكێتی مامۆستایانیش هەیە، پاشان شاری سلێمانیش دۆخێكی تایبەتی هەیە و مامۆستایانیش بەجۆرێك لەجۆرەكان تووڕەن، لەبەرئەوەی مووچەكە بەو شێوەیە رۆیشتووە.

 

"تەمەننا دەكەین (18ى تشرینى یەکەمى 2020) دەوام دەست پێبكاتەوە، بەڵام ئەگەر دەستی پێنەكردەوە، ئەوا ئێمە و پەروەردەكانی دیكەش راپۆرتی خۆمان دەدەینە بەڕێوەبەرایەتی گشتی پەروەردە با ئەو كاتە وەزارەت بڕیار بدات" بەڕێوەبەری پەروەردەی رۆژئاوای سلێمانی واى وت.

 

ڕەتیشیکردەوە هیچ بریارێکیان دابێت بۆ سزادانى مامۆستایان لەکاتى پابەندنەبوونیان بە دەوامەوە.

 

وەک خۆپارێزى لە پەتاى کۆرۆنا وەزارەتی پەروەردە بڕیاریدا دەوامی 12ی ئامادەیی و یەک و دووى بنەڕەتى لەنێو خوێندنگەكان بخوێنرێت و قۆناغەکانى تریش بەشێوەى ئەلەکترۆنى.