گه‌ڕان

Shadow Shadow
سیاسه‌تی

سلێمانی؛ هاووڵاتیان تمەن دەکڕن و ئومێد دەکەن ترەمپ شکست بهێنێت

2020.10.13 - 16:48
سلێمانی؛ هاووڵاتیان تمەن دەکڕن و ئومێد دەکەن ترەمپ شکست بهێنێت

ناس کورد-

لەگەڵ ئەوەی نرخی تمەن بەردەوامە لە دابەزین، بەڵام مامەڵەکەرێکی دراو دەڵێت، هاووڵاتیان بەردەوامن لە کڕینی تمەن، بە ئومێدی بەڕێوەچوونی هەڵبژاردنەکانی ئەمریکا و شکستی ترەمپ و بەرزبوونەوەی تمەن.

 

فەرید محەمەد، لە بازاڕی دۆلارەکەی شاری سلێمانی (سێشەممە 13ی تشرینی یەکەمی 2020 بە ناس کوردی ڕاگەیاند: "هێشتا دراوی تمەنی  ئێرانی لە بازاڕی دۆلارەکە بەشێوەیەکی بەرچاو مامەڵەی پێوەدەکرێت و هاووڵاتیانیش هەر بەردەوامن لەسەر کڕینی بەمەستی بەرزبوونەوەی بەهاکەی و قازانج کردن."

 

وتیشی: "چەند ڕۆژێکە تا ڕادەیەک نرخی تمەن جێگیرە یاخود بەڕێژەیەکی کەم بەرزدەبێتەوە و دادەبەزێت، بەڵام بە دڵنیایی بەڕێوەچوونی هەڵبژاردنەکانی ئەمریکا کاریگەری گەورە دەکاتەسەر نرخی تمەن لەدوای ئەنجامدانی هەڵبژاردنەکە و دەرکەوتنی ئەنجامەکان."

 

فەرید محەمەد باسی لەوەشکرد: "پەیوەندییەکانی ئەمریکا و ئێران یەکێکە لە گرنگترین کارتێکەرەکانی سەر نرخی تەمەن و بەهۆی چەقبەستوویی و نەبوونی هیچ ئەگەر و لێدوانێکی نوێی گرنگ لەوبارەیەوە، ئەم چەند رۆژە نرخی تمەن گۆڕانکاری گەورەی بەخۆیەوە نەدیوە."

 

دەربارەی بەردەوامیی کڕینی تمەن لەلایەن هاووڵاتیانەوە، ئەو مامەڵەکەرەی بازاڕی دۆلارەکە باسی لەوەکرد: "لەئێستادا هاووڵاتیان چاوەڕوانی بەڕێوەچوونی هەڵبژاردنەکانی ئەمریکان و ئەوانەشی دێن تمەن دەکڕن بە ئومێدی ئەوەن کە جۆ بایدن بەسەر ترەمپدا سەربکەوێت، چونکە لەو حاڵەتەدا بە ئەگەرێکی زۆر نرخی تمەن بەرزدەبێتەوە، ئەوەش بەهۆی ئەگەری ڕێککەوتنی ئەو دوو وڵاتە لەدوای کۆتایی هاتنی دەسەڵاتی ترەمپ."

 

لە چەند مانگی ڕابردوودا بەهۆی بەردەوامی سزا سەپێنراوەکانی ئەمریکا بەسەر ئێراندا، نرخی تمەنی ئێرانی بەشێوەیەکی بەرچاو دابەزی، لەدوای ئەوەش بەشێکی زۆر لە هاووڵاتیان ڕوویانکردە کڕینی تمەن بە ئومێدی بەرزبوونەوەی نرخەکەی، بەڵام تمەن بەتەواوی داڕما و بەشێک لەوانەشی تمەنیان کڕیوە، زیانێکی زۆریان بەرکەوت.