گه‌ڕان

Shadow Shadow
سیاسه‌تی

هۆڵەندا پلانێكى گەورەى تيرۆرستیى شكستپێهێنا.. عێراقیيەك بەڕێوەى بردووە

2020.10.08 - 22:44
هۆڵەندا پلانێكى گەورەى تيرۆرستیى شكستپێهێنا.. عێراقیيەك بەڕێوەى بردووە

ناس کورد-

دادگاى هۆڵەندى سزاى زيندانى 10 بۆ 17 ساڵى بەسەر شەش كەسدا سەپاند كە لە ساڵى 2018 پلانى ئەوەيان داناوە هێرشێكى تيرۆرستى بەرفراوان لە شوێنە گشتيەكان ئەنجام بدەن و عێراقيشەكيش سەرپەرشتى كردوون.

 

دادگاى ڕۆتەردام لە هۆڵەندا (پێنجشەممە 8ى تشرينى يەكەمى 2020) لەڕاگەیەندراوێکدا بڵاويكردوەتەوە، ئەو شەش كەسە نيازى ئەوەيان هەبووە لە كۆتاييەكانى ساڵى 2018 هێرشێكى فراوان لە شوێنە گشتیيەكان لەڕێگەى چەكى كڵانشيكۆف و ئۆتۆمبێلى بۆمبڕێژكراوەوە ئەنجام بدەن، هەروەها ويستويانە پشتێنى بۆمبڕێژكراو ببەستن و لەكاتى گەيشتنى پۆليس خۆيان بتەقێننەوە.

 

ئەوەش هاتووە، دەزگاى هەواڵگرى هێزەكانى پۆليسى ئاگاداركردوەتەوە و سيخوڕێك توانيويەتى دزە بكاتە ناو گروپەكەوە و ئامادەكارييەكانيان شكستپێبهێنێت پێش ئەوەى هيچ هێرشێك ئەنجام بدەن، هەروەها هێزەكانى پۆليسى توانيويانە لەمانگى 9ى 2018 دا گومانلێكراوەكان دەستگير بكەن.

 

ڕاگەیەندراوەکە ئەوەشى ئاشكراكردوە، سەركردەى گروپەكە پياوێكى عێراقييە كە سزاى زيندانى 17 ساڵى بۆ بڕدراوەتەوە، بەهۆى ياساى تايبەتمەندى هۆڵەندى ناوى تاوانباران ئاشكرا ناكرێت.

 

دادگاى ڕۆتەردام تەئكيديشى كردوەتەوە، ئەو گروپە دەیانویست هاووڵاتيانى مەدەنى و پۆليس بكەنە ئامانجى هێرشێكى خوێناوى بەشێوەيەك كە ژمارەيەكى زۆر قوربانى لێبكەوێتەوە، بەڵام لەلايەن دەزگا ئەمنيەكانەوە لە كاتێكى گونجاودا پلانەكەيان شكستيپێهێنرا.